ព្រះនាមទ្រង់ជាសញ្ញាសំគាល់
ដោយBill Crowder
May 27, 2017
ក្នុងខែកក្កដា ឆ្នាំ១៨៦០ គេបានបើកសាលាបង្រៀនគិលានុបដ្ឋាយិកាដំបូងបំផុត របស់ពិភពលោក នៅមន្ទីរពេទ្យសង់ ថូម៉ាស នៅទីក្រុងឡុង។ សព្វថ្ងៃនេះ សាលារៀនមួយនេះជាផ្នែកមួយនៃមហាវិទ្យាល័យរបស់ស្តេច ដែលនៅទីនោះ គេបានហៅសិស្សសាលាទាំងនោះថា ណៃធីងហ្គេល។ សាលារៀននោះ ក៏ដូចជាការងារគិលានុបដ្ឋាយិកាសម័យទំនើប សុទ្ធតែត្រូវបានបង្កើតឡើង ដោយអ្នកស្រីផ្លូរិន ណៃធីងហ្គេល(Florence Nightingale) ដែលបានកែប្រែរបៀបនៃការថែទាំងអ្នកជម្ងឺ ក្នុងអំឡុងសម័យសង្រ្គាមគ្រីមមា។ ពេលដែលគិលានុបដ្ឋាយិកា បានបញ្ចប់ការបណ្តុះបណ្តាលហើយ ពួកគេក៏បាន “ធ្វើការសច្ចាប្រណិធានតាមអ្នកស្រីណៃធីងហ្គេល” ដែលឆ្លុះបញ្ចាំងពីឥទ្ធិពលដែលគាត់នៅតែបន្តជះ មកលើការថែទាំអ្នកជម្ងឺ។ មនុស្សជាច្រើនបានជិះឥទ្ធិពលយ៉ាងខ្លាំង មកលើពិភពលោកសព្វថ្ងៃ គឺមិនខុសពីអ្នកស្រីផ្លូរិន ណៃធីងហ្គេលទេ។ ប៉ុន្តែ គ្មាននរណាម្នាក់ ដែលមានប្រសិទ្ធិភាពដូចព្រះយេស៊ូវទេ ដែលការប្រសូត្រ ការសុគត និងការមានព្រះជន្មរស់ឡើងវិញរបស់ទ្រង់ បានធ្វើឲ្យជីវិតមនុស្សជាច្រើនផ្លាស់ប្រែ ជាង២ពាន់ឆ្នាំមកហើយ។ នៅទូទាំងពិភពលោក គេបានហៅគ្រីស្ទបរិស័ទថា គ្រីស្ទាន ដោយព្រះនាមព្រះគ្រីស្ទបានធ្វើជាសញ្ញាសំគាល់របស់អ្នកដែលដើរតាមទ្រង់ រាប់ចាប់តាំងពីសម័យដំបូងនៃពួកជំនុំរបស់ទ្រង់។ គឺដូចមានសេចក្តីចែងថា “កាល[លោកបាណាបាស]បានឃើញលោកសូលហើយ នោះក៏នាំគាត់មកឯអាន់ទីយ៉ូកវិញ រួចអ្នកទាំង២នោះ បានប្រជុំគ្នានឹងពួកជំនុំ ព្រមទាំងបង្រៀនដល់មនុស្សសន្ធឹកណាស់ ក្នុងរវាង១ឆ្នាំ គឺនៅអាន់ទីយ៉ូកនេះឯង ដែលគេហៅពួកសិស្សថា «ពួកគ្រីស្ទាន» ជាមុនដំបូង”(កិច្ចការ ១១:២៦)។ អ្នកដែលមានព្រះនាមព្រះគ្រីស្ទជាសញ្ញាសំគាល់ខ្លួន គឺជាកម្មសិទ្ធិរបស់ទ្រង់ហើយ ព្រោះយើងបានផ្លាស់ប្រែ ដោយក្តីស្រឡាញ់ និងព្រះគុណទ្រង់។ យើងប្រកាសដល់លោកិយថា ទ្រង់បាននាំឲ្យមានការផ្លាស់ប្រែក្នុងជីវិតយើង ហើយយើងចង់ឃើញអ្នកដទៃ មានការផ្លាស់ប្រែផងដែរ។-Bill Crowder
បទគម្ពីរប្រចាំថ្ងៃ
គឺនៅអាន់ទីយ៉ូកនេះឯង ដែលគេហៅពួកសិស្សថា «ពួកគ្រីស្ទាន» ជាមុនដំបូង។-ខ.២៦