ស្រឡាញ់ខ្មាំងសត្រូវរបស់អ្នក
ដោយTim Gustafson
November 10, 2024
លូកា ២២:៦៣-៦៥ និង ២៣:៣២-៣៨
ខ្ញុំប្រាប់ថា ត្រូវស្រឡាញ់ពួកខ្មាំងសត្រូវ ត្រូវឲ្យពរដល់អ្នកណាដែលប្រទេចផ្តាសា។ ម៉ាថាយ ៥:៤៤
ក្នុងអំឡុងសម័យសង្គ្រាមលោកលើកទី២ លោកលីន វេស្តុន(Lynne Weston) ជាពេទ្យទាហាន ក្នុងជួរកងទ័ពជើងទឹកអាមេរិកបានជិះទូកទៅកាន់ឆ្នេរសមុទ្រជាមួយកងទ័ពជើងទឹក ខណៈពេលដែលពួកគេវាយលុកប្រជុំកោះដែលកងទ័ពសត្រូវកំពុងកាន់កាប់។ នៅពេលនោះ ការរបួស និងការស្លាប់របស់ទាហានដ៏គួរឲ្យតក់ស្លុត គឺជារឿងដែលជៀសមិនរួចនៅក្នុងសង្គ្រាម។ គាត់បានព្យាយាមអស់ពីលទ្ធភាព ដើម្បីរុំរបួសឲ្យទាហានដែលមានរបួស ដើម្បីឲ្យគេសែងពួកគេចេញពីសមរភូមិ។ មានពេលមួយនោះ កងពលរបស់គាត់បានប្រទះឃើញទាហានសត្រូវម្នាក់ កំពុងមានរបួសនៅត្រង់ពោះធ្ងន់ធ្ងរ។ ដោយសារភាពធ្ងន់ធ្ងរនៃរបួសនោះ គាត់មិនអាចឲ្យទាហាននោះផឹកទឹកបានទេ។ ដើម្បីជួយទាហាននោះឲ្យនៅមានជីវិត ពេទ្យទាហានរូបនោះក៏បានចាក់ថ្នាំប្លាស្មាចូលទៅក្នុងសរសៃឈាមរបស់គាត់។
ក្នុងចំណោមទាហានជើងទឹកទាំងនោះ មានម្នាក់បានស្រែកប្រាប់គាត់ កុំឲ្យចាក់ថ្នាំឲ្យសត្រូវ តែឲ្យទុកថ្នាំចាក់នោះ សម្រាប់មិត្តរួមអាវុធរបស់ពួកគេវិញ។ តែពេទ្យទាហានដែលមានក្តីអាណិត មិនបានស្តាប់តាមពាក្យសម្តីនេះទេ។ គាត់បានចាំការបង្រៀនរបស់ព្រះយេស៊ូវ ដែលបានបង្គាប់ឲ្យគាត់ស្រឡាញ់ខ្មាំងសត្រូវរបស់គាត់(ម៉ាថាយ ៥:៤៤)។
ព្រះយេស៊ូវមិនគ្រាន់តែបានមានបន្ទូលបង្គាប់ដូចនេះទេ តែព្រះអង្គក៏បានអនុវត្តន៍ដោយផ្ទាល់ផងដែរ។ កាលហ្វូងមនុស្សបានចាប់ព្រះកាយព្រះអង្គ នាំទៅជួបសម្តេចសង្ឃ ពួកអ្នកយាមព្រះអង្គ គេចំអកឲ្យ ហើយវាយព្រះអង្គ(លូកា ២២:៦៣)។ ការវាយដំ និងជេរប្រមាថនេះបានបន្តមាន ក្នុងការកាត់ទោសដ៏អយុត្តិធម៌នោះ រហូតដល់ពេលដែលគេកាត់ទោសប្រហារជីវិតព្រះអង្គ។ ព្រះយេស៊ូវមិនគ្រាន់តែបានស៊ូទ្រាំប៉ុណ្ណោះទេ។ នៅពេលដែលពួកទាហានរ៉ូម៉ាំងឆ្កាងព្រះអង្គ ព្រះអង្គក៏បានអធិស្ឋានសូមឲ្យព្រះវរបិតាអត់ទោសឲ្យពួកគេ(២៣:៣៤)។
យើងប្រហែលមិនដែលជួបខ្មាំងសត្រូវជាមនុស្ស ដែលព្យាយាមសម្លាប់យើងនោះទេ។ ប៉ុន្តែ មនុស្សម្នាក់ៗសុទ្ធតែយល់អំពីអារម្មណ៍ នៅពេលដែលពួកគេអត់ទ្រាំនឹងការចំអក និងជេរប្រមាថ។ តាមធម្មតា យើងចង់ឆ្លើយតបទាំងកំហឹង តាមនិស្ស័យសាច់ឈាមរបស់យើង។ ប៉ុន្តែ ព្រះយេស៊ូវបានឲ្យយើងធ្វើផ្ទុយពីនេះ ដោយបង្គាប់យើងឲ្យអធិស្ឋានឲ្យអ្នកបៀតបៀនយើង(ម៉ាថាយ ៥:៤៤)។
នៅថ្ងៃនេះ ចូរយើងដើរក្នុងសេចក្តីស្រឡាញ់ប្រភេទនេះ ដោយបង្ហាញចេញនូវចិត្តសប្បុរស តាមគំរូព្រះយេស៊ូវ សូម្បីតែចំពោះខ្មាំងសត្រូវរបស់យើងក៏ដោយ។—Tim Gustafson
តើអ្នកឆ្លើយតបដូចម្តេចខ្លះ ចំពោះអ្នកដែលស្អប់ ឬយល់ច្រឡំចំពោះអ្នក? តើព្រះអម្ចាស់សព្វព្រះទ័យឲ្យអ្នកឆ្លើយតប ដូចម្តេចខ្លះ?
ឱព្រះវរបិតាដែលគង់នៅស្ថានសួគ៌ សូមព្រះអង្គជួយទូលបង្គំឲ្យស្រឡាញ់អ្នកដទៃ ដូចដែលព្រះអង្គស្រឡាញ់ទូលបង្គំ។
Heavenly Father, please help me love others the way You love me.
គម្រោងអានព្រះគម្ពីររយៈពេល១ឆ្នាំ: យេរេមា ៥០ និង ហេព្រើរ ៨