ពិនិត្យប្រេងម៉ាស៊ីន
ដោយDavid C. McCasland
April 3, 2016
ពេលខ្ញុំបង្រៀនកូនស្រីខ្ញុំ ឲ្យចេះបើកឡាន ខ្ញុំរាប់បញ្ចូលការបង្រៀនបន្តិចបន្តួច អំពីមូលដ្ឋានគ្រឹះនៃការមើលថែរគ្រឿងម៉ាស៊ីនរបស់ឡានផងដែរ។ យើងក៏បានទៅយាន្តដ្ឋានមួយកន្លែងក្នុងតំបន់ ជាកន្លែងដែល គេរៀនពិនិត្យមើលប្រេងម៉ាស៊ីនឡាន នៅពេលគេចាក់សាំង។ ជាច្រើនឆ្នាំក្រោយមក ការនេះនៅតែធ្វើឲ្យខ្ញុំនឹកចាំ អំពីពាក្យស្លោក ដែលពោលថា “ប្រេងម៉ាស៊ីនថោកទេ តែម៉ាស៊ីនឡានថ្លៃ”។ បានសេចក្តីថា ការចំណាយទៅលើការផ្លាស់ប្តូរប្រេងម៉ាស៊ីនឲ្យទៀងទាត់ គឺអស់លុយតិចជាងការផ្លាស់ប្តូរម៉ាស៊ីនឡាន។ ការថែទាំព្រលឹងវិញ្ញាណ ក៏សំខាន់ចំពោះការរស់នៅរបស់យើងផងដែរ។ ការចំណាយពេលប្រចាំថ្ងៃ ដើម្បីអានព្រះគម្ពីរ អធិស្ឋាន និងស្តាប់ព្រះបន្ទូលព្រះ ជាគន្លឹះ ដែលជួយមិនឲ្យមានការខូចខាតខាងវិញ្ញាណ។ ក្នុងទំនុកដំកើង ជំពូក៥ ស្តេចដាវីឌបានមានបន្ទូលថា “ឱព្រះយេហូវ៉ាអើយ នៅពេលព្រឹក ទ្រង់នឹងឮសំឡេងរបស់ទូលបង្គំ គឺនៅពេលព្រឹក ទូលបង្គំនឹងទូលដល់ទ្រង់ ដោយលំដាប់ ព្រមទាំងរក្សាពេលចាំយាមផង”(ខ.៣)។ ក្នុងខបន្ទាប់ទៀត ទ្រង់បានសរសើរដំកើង អរព្រះគុណ និងទូលសូមអស់ពីចិត្តដល់ព្រះ។ មានមនុស្សជាច្រើនបានយល់អំពីភាពចាំបាច់ នៃការចាប់ផ្តើមការរស់នៅប្រចាំថ្ងៃ ជាមួយព្រះអម្ចាស់។ មុនពេលពួកគេបើកមើលទូរស័ព្ទ មើលពត៌មាន ឬញាំអាហារពេលព្រឹក ពួកគេតែងតែចំណាយពេលស្ងាត់ស្ងៀម មួយរយៈពេលសិន ដោយអានព្រះបន្ទូលព្រះ សរសើរដំកើងព្រះអង្គ សម្រាប់ភាពធំឧត្តម្ភរបស់ព្រះអង្គ និងអរព្រះគុណព្រះអង្គ សម្រាប់សេចក្តីស្រឡាញ់ ហើយស្វែងរកការដឹកនាំពីព្រះអង្គ។ ចំណែកអ្នកផ្សេងទៀត ក៏បានចំណាយពេលអានព្រះគម្ពីរ និងអធិស្ឋាន ក្នុងម៉ោងផ្សេងទៀត នៅថ្ងៃនីមួយៗ។ យើងចំាបាច់ត្រូវមានការប្រកបស្និទ្ធស្នាល ជាមួយព្រះអង្គជារៀងរាល់ថ្ងៃ ដើម្បីថែរទាំព្រលឹងវិញ្ញាណរបស់យើង និងសូមឲ្យព្រះអង្គបំពេញចិត្តយើង ដោយព្រះវត្តមានព្រះអង្គ នៅលើវិថីជីវិត។-David McCasland
បទគម្ពីរប្រចាំថ្ងៃ
ឱព្រះយេហូវ៉ាអើយ នៅពេលព្រឹក ទ្រង់នឹងឮសំឡេងរបស់ទូលបង្គំ គឺនៅពេលព្រឹក ទូលបង្គំនឹងទូលដល់ទ្រង់ ដោយលំដាប់ ព្រមទាំងរក្សាពេលចាំយាមផង។-ខ.៣