ធនធាន

ជួនកាល ការជាប់រវល់នឹងសកម្មភាពប្រចាំថ្ងៃ អាចធ្វើឲ្យយើងមិនសូវមានពេលប្រកបជាមួយព្រះ។ ក្នុងសៀវភៅនេះ លោកអ្នកអាចស្វែងយល់ អំពីរបៀបចំណាយពេលអានព្រះគម្ពីរ និងអធិស្ឋាន ឲ្យបានទៀងទាត់ ដើម្បីរក្សាពេលណាត់ជួបជាមួយព្រះអង្គជាប្រចាំថ្ងៃ តាមលំនាំដែលអ្នកនិពន្ធបានបង្ហាញក្នុងទំព័រសៀវភៅនេះ។ លោកអ្នកនឹងបានដឹងថា ការចំណាយពេលស្ងាត់ស្ងៀមជាមួយព្រះ ជាឱកាសតភ្ជាប់ទំនាក់ទំនងឡើងវិញ ជាមួយព្រះនៃព្រះគុណ ដែលកំពុងរង់ចាំយើងចំណាយពេលជាមួយព្រះអង្គ។

សៀវភៅ ការស្រេកឃ្លានខាងវិញ្ញាណ គឺជាកូនសៀវភៅសម្រាប់អានប្រចាំថ្ងៃ រយៈពេល៣០ថ្ងៃ ដែលត្រូវបានរៀបចំមក ជាពិសេសសម្រាប់អ្នកដែលមិនទាន់ស្គាល់ព្រះ ឬអ្នកជឿថ្មី ដែលចង់ស្វែងរកការស្កប់ស្កល់ចិត្ត សន្តិភាព និងក្តីសង្ឃឹមដ៏ពិត។ អ្នកមិនទាន់ជឿព្រះជាច្រើន មិនមានព្រះគម្ពីរអាន ឬចេះបើកមើលខគម្ពីរយោងទេ តែពួកគេអាចអានបទគម្ពីរប្រចាំថ្ងៃ ដែលមានក្នុងទំព័រសៀវភៅនេះ ដែលងាយស្រួលយល់ និងមានអមទៅដោយការដកស្រង់ខគម្ពីរគន្លឹះ មានការពន្យល់ខ្លីៗ។ ម្យ៉ាងទៀត ពេលដែលគេអាន ដល់ចុងបញ្ចប់សប្តាហ៍នីមួយៗ គេអាចអានអត្ថបទ ស្តីអំពី មូលហេតុទាំង១០យ៉ាង ដែលត្រូវជឿថា ព្រះពិតជាមានមែន ដែលបង្ហាញអំពីមូលហេតុដែលមនុស្សម្នាក់ៗគួរទទួលជឿព្រះយេស៊ូវ។ នៅចុងបញ្ចប់នៃសៀវភៅនេះ មានការលើកទឹកចិត្តឲ្យទទួលព្រះយេស៊ូវ ជាព្រះសង្រ្គោះ និងព្រះអម្ចាស់។ លោកអ្នកអាចជូនសៀវភៅនេះ ដល់មិត្តភ័ក្រ ឬក្រុមគ្រួសារ ដើម្បីនាំពួកគេឲ្យស្គាល់ប្រាជ្ញានៃព្រះគម្ពីរ ដែលធ្វើឲ្យជីវិតផ្លាស់ប្រែ ហើយអធិស្ឋានសូមឲ្យព្រះទ្រង់ ប្រើព្រះបន្ទូលព្រះអង្គ ប៉ះពាល់ចិត្ត និងគំនិតពួកគេ ហើយដឹកនាំពួកគេឲ្យទទួលសេចក្តីសង្រ្គោះពីព្រះអង្គ។

យើងប្រហែលជាចង់ទំនាក់ទំនងជាមួយព្រះណាស់ តែជួនកាល យើងពិបាកនឹងរកពាក្យអធិស្ឋាន ដើម្បីបង្ហាញចេញនូវអារម្មណ៍ ដែលមានក្នុងចិត្តយើង។ ក្នុងសៀវភៅ ចូរយើងអធិស្ឋាន យើងអាចរៀនអធិស្ឋានតាមលំនាំ ដែលអ្នកនិពន្ធ បានដកស្រង់ចេញពីព្រះគម្ពីរ ដែលជាការអធិស្ឋានរបស់តួអង្គសំខាន់ៗ ក្នុងព្រះគម្ពីរ ដើម្បីបង្ហាញយើង ពីរបៀបដែលយើងអាចប្រើព្រះបន្ទូលព្រះ ដើម្បីនិយាយទៅកាន់ព្រះអង្គ ក្នុងគ្រប់កាលៈទេសៈទាំងអស់នៃជីវិត។ សៀវភៅនេះរំឭកយើងថា “ព្រះអង្គសព្វព្រះទ័យនឹងប្រទានពរដល់យើង ហើយនាំយើងចូលជិតព្រះអង្គ ដោយសេចក្តីស្រឡាញ់ ដែលនាំឲ្យវិញ្ញាណទាំងឡាយមានជីវិតជាថ្មី” ហើយសៀវភៅនេះក៏បានលើកទឹកចិត្តយើង ឲ្យចូលទៅជិតព្រះអង្គ ដោយការសរសើរដំកើង និងទូលអង្វរ។ 

មាតិការ : 

1. ការអធិស្ឋាន
2. ដើម្បីសរសើរដំកើង និងគោរពព្រះ
3. ការអធិស្ឋានដើម្បីលន់តួបាប និងបន្ទាបខ្លួន
4. ការអធិស្ឋានសម្រាប់តម្រូវការប្រចាំថ្ងៃ
5. អធិស្ឋានសូមការដឹកនាំ និងទិសដៅ
6. អធិស្ឋាន ដើម្បីពោលពាក្យអរព្រះគុណ 

លោកបណ្ឌិត ចេមស៍ ប៊ែងស៍ ជាអ្នកនិពន្ធសៀវភៅនេះ។ គាត់ចូលចិត្តលើកទឹកចិត្តគេឲ្យអធិស្ឋាន។ គាត់បាននិពន្ធសៀវភៅដ៏ពេញនិយមជាច្រើនទៀត ក៏បាននិពន្ធអត្ថបទសម្រាប់អាននៅក្នុង blogs និងទស្សនាវដ្តី អំពីការអធិស្ឋាន។ គាត់ជាគ្រូគង្វាល និងជាអ្នកបង្កើតពួកជំនុំ អស់រយៈពេល២៥ឆ្នាំ ហើយកំពុងរស់នៅជាមួយភរិយារបស់គាត់ គឺអ្នកស្រី ខារី ក្នុងក្រុងឌ័រហាម រដ្ឋខារ៉ូលីណាខាងជើង។

តើព្រះពិតជាមានមែនឬ? មានមនុស្សជាច្រើនអះអាងថា ខ្លួនមិនជឿទេថា ព្រះពិតជាមានមែន តែពួកគេគ្មានភស្តុតាង ដើម្បីបញ្ជាក់ថា ព្រះពិតជាមិនមានមែន ដូចការអះអាងរបស់ខ្លួនឡើយ។ ទន្ទឹមនឹងនោះ ក៏មានអ្នកខ្លះមិនដឹងច្បាស់ថា ព្រះមានពិតមែន ឬអត់នោះឡើយ។ ទោះជាយ៉ាងណាក៏ដោយ តើមានភស្តុតាងបញ្ជាក់ថា ព្រះទ្រង់ពិតជាមានមែន ហើយព្រះអង្គកំពុងតែមានព្រះជន្មរស់នៅឬទេ? ខិតប័ណ្ណនេះនឹងបង្ហាញលោកអ្នក នូវហេតុផល និងភស្តុតាងយ៉ាងប្រុងប្រយ័ត្ន ដើម្បីបញ្ជាក់ថា ព្រះទ្រង់ពិតជាមានមែន មិនតែប៉ុណ្ណោះ ខិតប័ណ្ណនេះ ថែមទាំងប្រាប់យើង ពីមូលហេតុដែលយើងត្រូវទទួលជឿព្រះអង្គផងដែរ។ បើសិនជាអ្នកបានបើកចំហរចិត្ត ព្រមទទួលជឿថា ព្រះពិតជាមានមែន តែអ្នកមិនដឹងច្បាស់ថា អ្នកអាចទទួលស្គាល់ថា ព្រះយេស៊ូវជា “ព្រះដែលបានយាងមកយកកំណើតជាមនុស្ស”ឬក៏អត់ នោះមិនមែនមានតែអ្នកទេដែលមានបញ្ហានេះ។ ព្រះយេស៊ូវជាគ្រូបង្រៀនព្រះបន្ទូលមកពីស្រុកណាសារ៉ែត  ដែលបានសន្យាថា  នឹងជួយដល់អស់អ្នកដែលយកចិត្តទុកដាក់ អំពីការធ្វើតាមបំណងព្រះហឫទ័យព្រះ។ ព្រះអង្គបានមានបន្ទូលថា “បើអ្នកណាចង់ធ្វើតាមព្រះហឫទ័យទ្រង់ នោះនឹងបានដឹងជាសេចក្តីបង្រៀននេះមកពីព្រះ ឬជាខ្ញុំនិយាយដោយអាងខ្លួនខ្ញុំ”(យ៉ូហាន ៧:១៧)។ 

មាតិការ: 

1. មនុស្សមិនអាចជៀសផុតពីសេចក្តីជំនឿ
2. ដែនកំណត់នៃវិទ្យាសាស្រ្ត
3. បញ្ហារបស់ទ្រឹស្តីអំពីការវិវត្តន៍
4. ទំលាប់នៃចិត្តរបស់មនុស្ស
5. ប្រវត្តិរបស់កណ្ឌលោកុប្បត្តិ
6. ប្រជាជាតិអ៊ីសា្រអែល
7. ការអៈអាងរបស់ព្រះគ្រីស្ទ
8. ភស្តុតាងនៃការអស្ចារ្យ
9. ភាពលម្អិតនៃធម្មជាតិ
10. បទពិសោធន៍របស់បុគ្គលអាចឆ្លើយប្រាប់បាន
11. ភស្តុតាងនៃការអស្ចារ្យ
12. ភាពលម្អិតនៃធម្មជាតិ
13. បទពិសោធន៍របស់បុគ្គលអាចឆ្លើយប្រាប់បាន 

បើអ្នកបានទទួលស្គាល់ភស្តុតាង ដែលព្រះបានបើកសម្តែងព្រះអង្គទ្រង់ តាមរយៈព្រះរាជបុត្រាព្រះអង្គហើយ នោះសូមចាំថា ព្រះគម្ពីរបានចែងថា ព្រះគ្រីស្ទបានសុគត ដើម្បីលោះយើងឲ្យរួចពីបាប ហើយអស់អ្នក ដែលជឿព្រះអង្គ នឹងបានទទួលការអត់ទោសបាប និងជីវិតអស់កល្បជានិច្ច ជាអំណោយ ដោយឥតគិតថ្លៃ។ សេចក្តីសង្រ្គោះដែលព្រះគ្រីស្ទប្រទាន មិនមែនជារង្វាន់ សម្រាប់ការខិតខំធ្វើការល្អនោះទេ តែជាអំណាយដល់អស់អ្នក   ដែលបានទទួលជឿព្រះអង្គ  ទោះបានឃើញភស្តុតាងឬអត់ក៏ដោយ(យ៉ូហាន ៥:២៤ រ៉ូម ៤:៥ អេភេសូរ ២:៨-១០)។

ក្នុងពិភពលោកនេះ សេចក្តីស្រឡាញ់ជាពាក្យដែលមនុស្សបានឲ្យនិយមន័យខុសៗគ្នា ដូចនេះ តើធ្វើដូចម្តេច ឲ្យយើងអាចដឹងថា សេចក្តីស្រឡាញ់នោះជាសេចក្តីស្រឡាញ់ពិត? ក្នុងសៀវភៅនេះ លោកប៊ីល ក្រោដឺរ(Bill Crowder) ដែលជាអ្នកនិពន្ធ បានលើកយកបទគម្ពីរ ១កូរិនថូស ១៣:៤-៨ ដើម្បីបង្ហាញនូវអត្ថន័យដ៏ល្អបំផុត នៃសេចក្តីស្រឡាញ់ដ៏ពិត តាមបំណងព្រះទ័យព្រះគ្រីស្ទ។ យើងនឹងបានស្វែងយល់ អំពីសេចក្តីស្រឡាញ់ដែលធន់នៅ គ្រប់កាលៈទេសៈ ពេលដែលយើងបើកចិត្តទទួលសេចក្តីស្រឡាញ់ដ៏ស្ថិតស្ថេររបស់ព្រះ។ លោកប៊ីល ក្រោដឺរបានចូលរួមការងារបម្រើព្រះ នៅក្នុងអង្គការនំម៉ាណាប្រចាំថ្ងៃ បន្ទាប់ពីបានបម្រើការជាគ្រូគង្វាលអស់រយៈពេលជាង២០ឆ្នាំ។ លោកប៊ីល បានធ្វើការយ៉ាងជិតស្និទ្ធជាមួយលោកម៉ាត ឌីហាន(Mart Dehaan) ក្នុងនាមជាអនុប្រធានផ្នែកបង្រៀនព្រះបន្ទូល តាមរយៈសៀវភៅ។ លោកប៊ីល បានអធិប្បាយជាទៀតទាត់ តាមកម្មវិធីវិទ្យុ ស្វែងយល់ព្រះបន្ទូលព្រះ ហើយបានចំណាយពេលភាគច្រើន ក្នុងការបង្រៀនព្រះគម្ពីរ ដល់អ្នកដឹកនាំគ្រីស្ទបរិស័ទ នៅទូទាំងពិភពលោក។

តើ​ព្រះ​យេស៊ូវ​ជា​នរណា? មនុស្ស​ជា​ច្រើន​ថា ព្រះ​យេស៊ូវ​ជា​គ្រូ​បង្រៀន ឬ​ទស្សនវិទូ​ដ៏​ល្បី​ល្បាញ អ្នក​ខ្លះ​ទៀត​ថា ទ្រង់​ជា​មនុស្ស​ក្លែង​បន្លំ។ តែ​ព្រះ​យេស៊ូវ​បាន​មាន​បន្ទូល​ថា ទ្រង់​ជា​ព្រះ​ដ៏​ពិត។ ដើម្បី​ឲ្យ​យើង​ដឹង​ថា ទ្រង់​ជានរណា ហើយ​ដឹង​ថា ហេតុ​អ្វី​បាន​ជា​ទ្រង់​យាង​ចុះ​ មក​យក​កំណើត​ជា​មនុស្ស​នៅ​ផែនដី យើង​ចាំ​បាច់​ត្រូវ​បើក​មើល​ព្រះ​គម្ពីរ​ប៊ីប។ តើ​ព្រះ​យេស៊ូវ​ជា​ព្រះ​ពិត​មែន​ទេ? ចម្លើយ​សម្រាប់​សំណួរ​នេះ គឺ​ពិត​ជា​សំខាន់​ណាស់ បានជា​យើង​ត្រូវ​បើក​មើល​ព្រះ​គម្ពីរ​សញ្ញា​ចាស់ និង​សញ្ញា​ថ្មី ដើម្បី​ស្វែង​រក​ភស្តុតាង ក៏​ដូច​ជា ពិនិត្យ​មើល​ពាក្យ​សម្តី​របស់​សាក្សី ឬ​ស្មរ​បន្ទាល់ និង​ពិនិត្យ​មើល​ការ​អៈ​អាង​របស់​ព្រះយេស៊ូវ​ផ្ទាល់ ដែល​បាន​ថា ទ្រង់​ជា​ព្រះ។ យើង​ក៏ត្រូវ​ពិនិត្យ​មើល​ភស្តុតាង ដែល​បាន​មក​ពី​ប្រភព​ផ្សេង​ទៀត នៅ​ក្រៅ​ព្រះ​គម្ពីរ​ផង​ដែរ ដើម្បី​ឲ្យ​ដឹង​ថា ភស្តុតាង​ទាំងនោះ បាន​បញ្ជាក់​អ្វី​ខ្លះ អំពី​ព្រះ​យេស៊ូវ។ យើងអាច​ប្រើ​ភស្តុតាង​ទាំងនោះ ដើម្បី​ឲ្យ​បាន​ដឹង​ច្បាស់ អំពី​ភាព​អាច​ទុក​ចិត្ត​បាន នៃ​ព្រះ​គម្ពីរ​ប៊ីប និង​អត្ត​សញ្ញាណ​របស់​ព្រះ​យេស៊ូវ។

ហេតុអ្វី​បាន​ជា​យើង​មាន​ការ​ភ័យ​ខ្លាច ចំពោះ​សេចក្តី​ស្លាប់? កូន​សៀវភៅ​សម្រាប់​ផ្សាយ​ដំណឹង​ល្អ​នេះ នឹង​ពន្យល់​លោក​អ្នក​អំពី​ទំនាក់​ទំនង​រវាង​សេចក្តី​ស្លាប់ និង​អំពើ​បាប ព្រម​ទាំង​ប្រាប់ប្រិយមិត្ត​អ្នក​អាន​ទាំង​ឡាយ អំពី​របៀប​ដែល​ព្រះយេស៊ូវគ្រីស្ទ បាន​ឈ្នះ​សេចក្តី​ស្លាប់ និង​អំពី​របៀប​ដែល​យើង​អាច​យក​ជ័យ​ជម្នះ​លើ​សេចក្តី​ស្លាប់ ជា​មួយ​នឹង​ទ្រង់។

ហេតុ​អ្វី​បាន​ជា​ពិភព​លោក មាន​រឿង​ច្រើន​ម្ល៉េះ? ហេតុ​អ្វី​ការ​រស់​នៅ មាន​ការ​ពិបាក​យ៉ាង​នេះ? ក្នុង​ចំណោម​មនុស្ស​ដែល​អ្នក​ស្គាល់ តើ​មាន​អ្នក​ដែល​បាន​សួរ​សំណួរ​ទាំង​នេះ​ឬ​ទេ? សូម​បង្ហាញ​ពួក​គេ ឲ្យ​ស្គាល់​សេចក្តី​សង្ឃឹម ក្នុង​ព្រះ​គ្រីស្ទ! សៀវភៅ​ដែល​មាន​ចំណង​ជើង​ថា រឿង​នៃ​សេចក្តី​សង្ឃឹម គឺ​ជា​ខិត​ប័ណ្ណ​ដំណឹង​ល្អ ដែល​បក​ស្រាយ​អំពី​សេចក្តី​ស្រឡាញ់​របស់​ព្រះជាម្ចាស់ និង​ផែនការ ដែល​ទ្រង់មាន​សម្រាប់​មនុស្ស ដែល​ទ្រង់​បាន​បង្កើត ហើយ​សៀវ​ភៅ​នេះ ក៏​បាន​បង្ហាញ​អំពី​មូល​ហេតុ​ដែល​មាន​តែ​ព្រះ​យេស៊ូវ​ទេ ដែល​អាច​ប្រទាន​សេចក្តី​សង្ឃឹម​ដ៏​ពិត។ សូម​ចែក​រំលែក​សៀវភៅ​នេះ ដល់​មិត្ត​ភក្តិ​របស់​អ្នក។

ការ​ស្វែង​រក​ការងារ​ក្នុង​ក្តី​ស្រមៃ បាន​នាំ​ឲ្យ​មនុស្ស​ជា​ច្រើន​មាន​ការ​នឿយ​ណាយ និង​ការ​ខក​ចិត្ត។ កូនសៀវ​ភៅនេះ បង្ហាញ​អំពី​របៀប​ដែល​ព្រះ​យេស៊ូវ អាច​ប្រទាន​ឲ្យ​មនុស្ស​ម្នាក់​ៗ មាន​ភាព​ស្កប់​ចិត្ត​ដ៏​ពិត នៅ​ក្នុង​ជីវិត​។

នេះ​ជា​សំណួរ​ដ៏​ធំ​មួយ សម្រាប់​យើង​រាល់​គ្នា។ ក្នុង​ពិភព​លោក ដែល​មាន​ពេញ​ដោយ​ការ​ឈឺ​ចាប់ ទុក្ខ​ព្រួយ និងការ​បាត់​បង់ យើង​ចង់​ដឹង​ថា ហេតុ​អ្វី​មនុស្ស​មាន​ការ​ឈឺ​ចាប់? តើ​ព្រះ​ជា​ម្ចាស់​មាន​ដំណោះ​ស្រាយ​អ្វី សម្រាប់​បញ្ហា​នេះ? កូន​សៀវ​ភៅ​នេះ​នឹង​បង្ហាញ​ឲ្យ​អ្នក​បាន​ដឹង​ថា ព្រះ​ជា​ម្ចាស់​ក៏​ធ្លាប់​បាន​ឆ្លង​កាត់​ទុក្ខ​វេទនា ដោយ​ផ្ទាល់​ផង​ដែរ បាន​ជា​ទ្រង់​អាច​ប្រទាន​ក្តី​សង្ឃឹម​ដល់​យើង​រាល់​គ្នា ដោយ​ធានា​ថា​ ​យើង​នឹង​បាន​ទៅ​នៅ​កន្លែង​ថ្មី​មួយ នៅពេល​អនាគត ដែល​គ្មាន​ការ​ឈឺចាប់ ដោយ​យើង​គ្រាន់​តែ​ទទួល​ជឿ​ទ្រង់​ប៉ុណ្ណោះ។

តើ​លុយ​ធ្វើ​ឲ្យ​ពិភព​លោក​វិល ឬ​មួយ​យ៉ាង​ណា? សម្រាប់​ខ្លួន​យើង​ផ្ទាល់ ក៏​ដូច​ជា​សម្រាប់​មនុស្ស​ជា​ច្រើន ដែល​យើង​បាន​ស្គាល់ ការ​ដេញ​តាម​លុយ គឺ​ជា​បញ្ហា​ដែល​កើត​មាន​ជា​រៀង​រាល់​ថ្ងៃ។ យើង​ត្រូវ​បង់​ថ្លៃ​នេះ​បង់​ថ្លៃ​នោះ មិន​ចេះ​ចប់ ហើយ​ក្នុង​ក្រុម​គ្រួសារ ក៏​មាន​មនុស្ស​ដែល​ត្រូវ​ការ​អាហារ​ប្រចាំ​ថ្ងៃ។ ម្យ៉ាងទៀត យើង​ក៏​ត្រូវ​មាន​លុយ​ត្រៀម​ទុក សម្រាប់​ការ​បន្ទាន់​ផង​ដែរ ហើយ​យើង​នៅ​តែ​មាន​អារម្មណ៍​ថា ​លុយ​របស់​យើង​នៅ​តែ​មិន​គ្រប់​គ្រាន់។ ក្នុង​សៀវភៅ លុយ : ហេតុ​អ្វី​នៅ​តែ​មិន​គ្រប់? យើង​នឹង​បាន​ធ្វើ​ការ​ពិនិត្យ​ជា​ថ្មី អំពី​បញ្ហា​នេះ តាម​ការ​បក​ស្រាយ​របស់​ព្រះ​គម្ពីរ​ប៊ីប។ បើ​សិន​ជា​អ្នក​មាន​ក្រុម​គ្រួសារ និង​មិត្ត​ភក្តិ ដែល​មិន​មែន​ជា​គ្រីស្ទ​បរិស័ទ សួរ​អ្នក​ថា ហេតុ​អ្វី​បាន​ជា​លុយ​ចេះ​តែ​មិន​គ្រប់? អ្នក​អាច​ប្រើ​កូន​សៀវ​ភៅ​នេះ ជា​ជំនួយ ដើម្បី​បក​ស្រាយ​អំពីស្ថានភាព​ហិរញ្ញវត្ថុ​របស់​ពួក​គេ ដោយ​ចិត្ត​សប្បុរស និង​សេចក្តី​ស្រឡាញ់។ សៀវភៅ​នេះ​នឹង​ជួយ​ឲ្យ​ពួក​គេ​ដឹង​ថា ព្រះ​យេស៊ូវ​គឺ​ជា​ចម្លើយ​ដ៏​ពិត ដែល​ពួក​គេ​កំពុង​ស្វែង​រក ហើយ​ការ​រក​លុយ​ឲ្យ​បាន​ច្រើន​ជាង​មុន មិន​មែន​ជា​ដំណោះ​ស្រាយ​ឡើយ។

តើ​ជីវិត​របស់​យើង​នឹង​កាន់​តែ​មាន​ភាព​ល្អ​ប្រសើរ​ប៉ុណ្ណា ពេល​ដែល​យើង​អាច​រស់​នៅ ដោយ​មាន​មិត្ត​ភាព​ដ៏​ពិត? ខណៈ​ពេល​ដែល​យើង​ស្វែង​រក​មិត្ត​ល្អ ហើយ​ថែរក្សា​មិត្ត​ភាព​ដែល​យើង​មាន​ជា​មួយ​គាត់ យើង​ក៏​គួរ​តែ​មាន​ចិត្ត​ចង់​ធ្វើ​ជា​មិត្ត​ល្អ​សម្រាប់​គាត់​ផង​ដែរ។ ប៉ុន្តែ តើ​ធ្វើ​ដូច​ម្តេច ឲ្យ​យើង​អាច​ធ្វើ​ជា​មិត្ត​ភក្តិ​ពិត​ប្រាកដ? តើ​ធ្វើ​ដូចម្តេច​ឲ្យ​យើង​អាច​ធ្វើ​ឲ្យ​មិត្ត​ភាព​យើង​កាន់​តែ​មាន​ភាព​រឹង​មាំ? តើ​នរណា​នឹង​ធ្វើ​ជា​មិត្ត​ភក្តិ​ដ៏​ល្អ​ឥត​ខ្ចោះ​របស់​យើង? សូម​ទទួល​ការ​លើក​ទឹក​ចិត្ត ពី​សៀវ​ភៅ មិត្ត​ភាព​ដ៏​ពិត សម្រាប់​អាន​ប្រចាំ​ថ្ងៃ រយៈ​ពេល​៧​ថ្ងៃ ដើម្បី​ស្វែង​យល់​អំពី​អត្ថ​ន័យ​នៃ​មិត្ត​ភាព​ដ៏​ពិត។