ការឲ្យអំណោយនៃការអធិស្ឋានឲ្យ
ដោយJames Banks
March 13, 2018
មានពេលមួយឡរ៉ា(Laura) បាននិយាយថា “កាលពីមុន ខ្ញុំមិនបានដឹងទេថា ដំណឹងល្អជាអំណោយដ៏អស្ចារ្យ។ តែពេលដែលបងប្រុសខ្ញុំឈឺ អ្នកទាំងអស់គ្នាបានអធិស្ឋានឲ្យគាត់។ ការអធិស្ឋានរបស់អ្នកទាំងអស់គ្នា ពិតជាបានធ្វើឲ្យខ្ញុំ មានការកម្សាន្តចិត្តណាស់”។ កាលនោះ ឡរ៉ាបានអរគុណខ្ញុំ ទាំងទឹកភ្នែករលីងរលោង គឺអរគុណ សម្រាប់ការអធិស្ឋានរបស់ពួកជំនុំរបស់យើង ឲ្យបងប្រុសនាង ដែលកំពុងតែឲ្យគ្រូពេទ្យពិនិត្យមើលជម្ងឺមហារីក។ គាត់ក៏បាននិយាយទៀតថា “ការអធិស្ឋានរបស់អ្នករាល់គ្នា បានជួយឲ្យគាត់មានកម្លាំងឡើង ក្នុងពេលដ៏ពិបាកនេះ ហើយក៏បានលើកទឹកចិត្តក្រុមគ្រួសាររបស់ខ្ញុំទាំងមូល”។ ការអធិស្ឋានឲ្យអ្នកដទៃ ស្ថិតក្នុងចំណោមមធ្យោបាយដ៏ល្អបំផុត ដែលយើងអាចបង្ហាញសេចក្តីស្រឡាញ់ដល់ពួកគេ។ ជាក់ស្តែង ព្រះយេស៊ូវបានធ្វើជាគំរូដ៏ល្អបំផុត នៅក្នុងរឿងនេះ។ ព្រះគម្ពីរសញ្ញាថ្មី បានចែងថា ព្រះយេស៊ូវបានអធិស្ឋានឲ្យអ្នកដទៃ ជាញឹកញាប់ ហើយថែមទាំងបានបង្ហាញឲ្យយើងដឹងថា ទ្រង់បានបន្តចូលទៅរកព្រះវរបិតាជួសយើង។ គឺដូចដែលបទគម្ពីរ រ៉ូម ៨:៣៤ បានចែងថា “ទ្រង់ក៏គង់នៅខាងស្តាំនៃព្រះ ហើយជាអ្នកអង្វរជំនួសយើងរាល់គ្នាដែរ”។ ព្រះអម្ចាស់យេស៊ូវគ្រីស្ទ បានបង្ហាញសេចក្តីស្រឡាញ់ ដែលមិនគិតប្រយោជន៍ខ្លួនឯង នៅលើឈើឆ្កាងរួចហើយ ទោះជាយ៉ាងណាក៏ដោយ បន្ទាប់ពីទ្រង់បានមានព្រះជន្មរស់ឡើងវិញ ទ្រង់នៅតែបន្តបង្ហាញការយកព្រះទ័យទុកដាក់ចំពោះយើង ដោយអធិស្ឋានឲ្យយើង ក្នុងពេលឥឡូវនេះ។ យើងចាំបាច់ត្រូវយកគំរូតាមព្រះយេស៊ូវ ហើយបង្ហាញសេចក្តីស្រឡាញ់ដល់អ្នកដទៃ ដោយការអធិស្ឋានឲ្យពួកគេ សូមឲ្យព្រះទ្រង់ធ្វើជាជំនួយដល់ពួកគេ នៅក្នុងការរស់នៅ។ យើងអាចសូមឲ្យព្រះទ្រង់ជួយឲ្យយើងអធិស្ឋាន ឲ្យពួកគេ ហើយទ្រង់នឹងជួយយើងមិនខាន! សូមឲ្យព្រះអម្ចាស់នៃសេចក្តីស្រឡាញ់ ចម្រើនកម្លាំងយើង ដើម្បីយើងឲ្យអំណោយនៃការអធិស្ឋាន ដល់អ្នកដទៃ នៅថ្ងៃនេះ។—JAMES BANKS
បទគម្ពីរប្រចាំថ្ងៃ
អ្នករាល់គ្នាខំប្រឹងជួយអង្វរជួសយើងខ្ញុំ។-២កូរិនថូស ១:១១