ជម្លោះក្នុងពេលបច្ចុប្បន្ន
ដោយDave Branon
October 7, 2021
ពេលដែលអ្នកដាក់ចំណិតនំប៉័ងចូលក្នុងឧបករណ៍ដុតនំប៉័ង អ្នកអាចនឹកចាំថា ឧបករណ៍នេះគឺជាលទ្ធផល នៃជម្លោះដ៏ជូរចត់មួយ នៅចុងសតវត្សរ៍ទី១៩។ នៅសម័យនោះ អ្នកច្នៃបង្កើតពីរនាក់ គឺលោកថូម៉ាស អេឌីសិន(Thomas Edison) និងនីកូឡា ថេស្លា(Nikola Tesla) មានការប្រជែងគ្នា អំពីប្រភេទនៃចរន្តអគ្គិសនីសម្រាប់ការអភិវឌ្ឍន៍ គឺចរន្តជាប់(DC) ដែលមានដូចជាចរន្តអគ្គិសនី ចេញពីថ្មពិល ចូលទៅក្នុងពិលជាដើម និងចរន្តឆ្លាស់(AC) ដែលចេញពីម៉ាស៊ីនភ្លើង។ ទីបំផុត គំនិតរបស់លោកថែស្លា អំពីចរន្តឆ្លាស់ បានទទួលជោគជ័យ ហើយត្រូវបានគេយកមកប្រើប្រាស់ ដើម្បីផ្គត់ផ្គង់អគ្គីសនី ដល់ផ្ទះ កន្លែងអាជីវកម្ម និងសហគមន៍ នៅទូទាំងពិភពលោក។ ចរន្តឆ្លាស់ AC ក៏មានប្រសិទ្ធភាពជាង នៅក្នុងការបញ្ជូនចរន្តអគ្គីសនី ទៅតំបន់ឆ្ងាយៗ និងជាជម្រើសដែលឆ្លាតវ័យជាង។ ជួនកាល យើងត្រូវការប្រាជ្ញា ខណៈពេលដែលយើងជួបបញ្ហាជម្លោះរវាងអ្នកជឿ(មើលរ៉ូម ១៤:១-១២)។ សាវ័កប៉ុលបានបង្រៀនយើង ឲ្យស្វែងរកជំនួយពីព្រះ ដើម្បីឲ្យយើងមានការយល់ច្បាស់ ក្នុងបញ្ហាទាំងនោះ។ គឺដូចដែលគាត់បានមានប្រសាសន៍ថា “បើអ្នករាល់គ្នាមានគំនិតណាផ្សេងក្នុងការអ្វី នោះព្រះទ្រង់នឹងសំដែងឲ្យអ្នករាល់គ្នាបានឃើញសេចក្តីនេះដែរ”(ភីលីព ៣:១៥)។ ក្នុងពីរបីខបន្ទាប់មកទៀត យើងឃើញលទ្ធផលរបស់មនុស្សពីរនាក់ ដែលបែកបាក់គ្នា ដោយសារការខ្វែងគំនិតគ្នា បានជាសាវ័កប៉ុលមានការសោកស្តាយយ៉ាងខ្លាំង ហើយក៏បានប្រាប់ពួកគេថា “ខ្ញុំសូមទូន្មានដល់នាងអ៊ើរ៉ូឌា និងនាងស៊ុនទីចដែរ ឲ្យមូលគំនិតតែ១ក្នុងព្រះអម្ចាស់”(៤:២)។ ពេលណាការមិនចុះសម្រុងគ្នា ចាប់ផ្តើមបំបែកបំបាក់យើង ចូរយើងស្វែងរកព្រះគុណ និងប្រាជ្ញាមកពីព្រះ ក្នុងព្រះគម្ពីរប៊ីប ការប្រឹក្សាយោបល់ពីអ្នកជឿដែលពេញវ័យខាងវិញ្ញាណ និងអំណាចនៃការអធិស្ឋាន។ ចូរយើងព្យាយាម ឲ្យមានចិត្តគំនិតតែមួយ ក្នុងព្រះអង្គ(ខ.២)។—Dave Branon
បទគម្ពីរប្រចាំថ្ងៃ
តែបើអ្នករាល់គ្នាមានគំនិតណាផ្សេងក្នុងការអ្វី នោះព្រះទ្រង់នឹងសំដែងឲ្យអ្នករាល់គ្នាបានឃើញសេចក្តីនេះដែរ។ ភីលីព ៣:១៥