ការរស់នៅជាតំណាងព្រះយេស៊ូវ
ដោយArthur Jackson
November 7, 2021
ហើយក្នុងគ្រប់ទាំងអស់ ទោះបើការអ្វីដែលអ្នករាល់គ្នានឹងធ្វើ ដោយពាក្យសំដី ឬកិរិយាក៏ដោយ ចូរធ្វើទាំងអស់ ដោយព្រះនាមនៃព្រះអម្ចាស់យេស៊ូវ។ -កូល៉ុស ៣:១៧ “កូនប្រុស ពុកមិនមានរបស់ទ្រព្យអ្វីច្រើន ទុកឲ្យកូនទេ។ តែពុកមានកេរ្តិ៍ឈ្មោះល្អ សម្រាប់កូន ដូចនេះ កុំធ្វើឲ្យខូចឈ្មោះពុក”។ នេះជាពាក្យសម្តីប្រកបដោយប្រាជ្ញា ដែលលោកចននី បេធីស(Johnnie Bettis) និយាយទៅកាន់កូនប្រុសគាត់ ឈ្មោះ យេរ៉ូម មុនពេលយេរ៉ូមទៅរៀននៅមហាវិទ្យាល័យ។ យេរ៉ូមបានដកស្រង់ពាក្យសម្តីនេះ នៅក្នុងការសរសេរពាក្យលើកទឹកចិត្ត សម្រាប់ដាក់តាំងនៅក្នុងសាលកិត្តិយស នៃកីឡាបាល់ទាត់អាមេរិក។ ពាក្យលើកទឹកចិត្តទាំងនេះ ដែលយេរ៉ូមបានដាក់ជាប់តាមខ្លួន ពេញមួយជីវិត មានឥទ្ធិពលយ៉ាងខ្លាំង គាត់បាននិយាយផ្តាំផ្ញើកូនប្រុសរបស់គាត់ ដោយប្រើពាក្យស្រដៀងនេះផងដែរថា “កូនប្រុស ពុកគ្មានអ្វីច្រើន ដែលអាចផ្តល់ឲ្យកូន ដែលសំខាន់ជាងកេរ្តិ៍ឈ្លោះល្អនោះទេ”។ កេរ្តិ៍ឈ្មោះល្អ ក៏សំខាន់សម្រាប់អ្នកជឿព្រះយេស៊ូវផងដែរ។ ពាក្យពេចន៍របស់សាវ័កប៉ុល ក្នុងបទគម្ពីរកូល៉ុស ៣:១២-១៧ បានរំឭកយើង អំពីព្រះមួយអង្គ ដែលយើងកំពុងតែរស់នៅ ជាតំណាងឲ្យទ្រង់(ខ.១៧)។ ចារិកលក្ខណៈរបស់យើង គឺប្រៀបដូចជាសំលៀកបំពាក់ ដែលយើងស្លៀកពាក់ ហើយបទគម្ពីរនេះបានប្រាប់យើងឲ្យ “ប្រដាប់កាយ ដោយចិត្តក្តួលអាណិត សប្បុរស សុភាព សំឡូត និងចិត្តអត់ធ្មត់ ទុកដូចជាពួកអ្នករើសតាំង ដែលបរិសុទ្ធ ហើយស្ងួនភ្ងាដល់ព្រះចុះ ហើយទ្រាំទ្រគ្នា ទាំងអត់ទោសទៅវិញទៅមក បើអ្នកណាមានហេតុទាស់នឹងអ្នកណា នោះចូរអត់ទោសឲ្យគេចុះ ដូចជាព្រះគ្រីស្ទបានអត់ទោសឲ្យអ្នករាល់គ្នាដែរ ចូរបន្ថែមទាំងសេចក្តីស្រឡាញ់ថែមទៀត ជាចំណងនៃសេចក្តីគ្រប់លក្ខណ៍(ខ.១២-១៤)។ ទាំងនេះ គឺជាសំលៀកបំពាក់ដែលយើងត្រូវពាក់ មិនមែនសម្រាប់តែថ្ងៃអាទិត្យប៉ុណ្ណោះឡើយ។ យើងត្រូវប្រដាប់កាយ ដោយសេចក្តីទាំងនេះ នៅគ្រប់ទីកន្លែង គ្រប់ពេលវេលា ខណៈពេលដែលព្រះទ្រង់ធ្វើការក្នុងយើង ដើម្បីនាំគេឲ្យស្គាល់ព្រះអង្គ។ ពេលណាជីវិតយើង មានលក្ខណៈសម្បត្តិទាំងនេះ នោះមានន័យថា យើងកំពុងតែមានព្រះនាមព្រះអង្គ ជាប់ខ្លួនយើង។ ចូរយើងធ្វើជាតំណាងព្រះអង្គ ដោយការអធិស្ឋានយ៉ាងខ្ជាប់ខ្ជួន និងដោយការប្រុងប្រយ័ត្ន ខណៈពេលដែលព្រះអង្គប្រទានអ្វីដែលយើងត្រូវការ។—Arthur Jackson ខណៈពេលដែលអ្នកវាយតម្លៃទូខោអាវរបស់អ្នក តើអ្នកបានដណ្តប់កាយដោយចរិយាសម្បត្តិមកពីព្រះយេស៊ូវ យ៉ាងណាខ្លះ? តើអ្នកអាចស្វែងរកប្រាជ្ញា អំណាចចេស្តា និងការដឹកនាំមកពីព្រះអង្គយ៉ាងណាខ្លះ ដើម្បីនាំឲ្យគេស្គាល់ព្រះអង្គកាន់តែច្បាស់? ឱព្រះវរបិតា សូមព្រះអង្គអត់ទោសបាប ឲ្យទូលបង្គំ ដែលធ្វើជាតំណាងព្រះយេស៊ូវមិនបានល្អ។ សូមព្រះអង្គប្រទានកម្លាំង និងសេចក្តីក្លាហាន ដើម្បីឲ្យទូលបង្គំប្រដាប់កាយ ដើម្បីថ្វាយសិរីល្អដល់ព្រះអង្គ និងដើម្បីព្រះនាមព្រះគ្រីស្ទ។ To learn more about the importance of living a life that honors Christ, visit ChristianUniversity.org/Hypocrisy. គម្រោងអានព្រះគម្ពីររយៈពេល១ឆ្នាំ : យេរេមា ៤០-៤២ និង ហេព្រើរ ៤