តើអ្នកជាអ្វី?
ដោយXochitl Dixon
December 16, 2021
ដ្បិតអ្នករាល់គ្នាសុទ្ធតែជាកូនព្រះ ដោយសារសេចក្តីជំនឿជឿដល់ព្រះគ្រីស្ទយេស៊ូវ។ កាឡាទី ៣:២៦ ពេលដែលខ្ញុំដើរចូលទៅក្នុងហាងលក់ការ៉េម ជាមួយកូនប្រុសខ្ញុំ អាយុ៥ឆ្នាំ ដែលជាកូនកាត់ពីរសាសន៍ អ្នកគិតលុយក៏បានមើលមកខ្ញុំ ហើយសម្លក់កូនខ្ញុំ។ គាត់សួរទៅកូនខ្ញុំថា “ឯងជាអ្វី?” ការចោទសួរ ដោយសម្លេងគំហកនេះ បានបញ្ឆេះកំហឹង និងការឈឺក្បាល ដែលខ្ញុំធ្លាប់មានកាលពីមុន ពេលដែលខ្ញុំកំពុងចម្រើនវ័យធំឡើង ជាជនជាតិអាមេរិកដើមកំណើតម៉ិចស៊ីកូ ដែលគេបានរើសអើង។ ខ្ញុំក៏បានទាញកូនប្រុសខ្ញុំចូលមកជិតខ្ញុំ ហើយក៏បានបែរទៅរកស្វាមីខ្ញុំជាជនជាតិស្បែកខ្មៅ ខណៈពេលដែលគាត់កំពុងដើរចូលហាងនោះ។ អ្នកគិតលុយ ក៏បានធ្វើមុខស្មើ ខណៈពេលដែលគាត់គិតលុយឲ្យយើង ដោយមិននិយាយស្តីមួយម៉ាត់។ ខ្ញុំក៏បានអធិស្ឋានក្នុងចិត្ត ឲ្យបុរសនោះ ខណៈពេលដែលកូនប្រុសខ្ញុំចង់សាករសជាតិផ្សេងៗ របស់ការ៉េម ដែលមានលក់ក្នុងហាងនោះ។ ខ្ញុំក៏បានប្រែចិត្តចេញពីភាពល្វីងជូរចត់ ហើយទូលសូមព្រះប្រទានខ្ញុំ នូវវិញ្ញាណដែលមានការអត់ទោស។ ដោយសារខ្ញុំមានពណ៌សម្បុរមិនសដូចគេ ខ្ញុំបានក្លាយជាគោលដៅនៃការសម្លក់សម្លឹង និងការចោទសួរដូចគ្នា អស់ពេលជាច្រើនឆ្នាំមកហើយ។ ខ្ញុំមានអារម្មណ៍ថា ខ្វះសុវត្ថិភាព និងគ្មានតម្លៃ ទាល់តែខ្ញុំបានចាប់ផ្តើមរៀនឱបក្រសោបយកអត្តសញ្ញាណថ្មី ក្នុងនាមជាកូនស្រីជាទីស្រឡាញ់របស់ព្រះ។ សាវ័កប៉ុលបានប្រកាសថា អ្នកជឿព្រះយេស៊ូវ សុទ្ធតែជាកូនរបស់ព្រះ ដោយសារជំនឿលើព្រះយេស៊ូវ មានតម្លៃស្មើគ្នា និងមានភាពស្រស់ស្អាតផ្សេងៗគ្នា។ ក្នុងនាមជាបងប្អូនក្នុងព្រះគ្រីស្ទ យើងមានការភ្ជាប់ទំនាក់ទំនងដ៏ជិតស្និទ្ធ ហើយព្រះអង្គបានរៀបចំយើងមក សម្រាប់ឲ្យធ្វើការជាមួយគ្នា(កាឡាទី ៣:២៦-២៩)។ ពេលដែលព្រះទ្រង់ចាត់ព្រះរាជបុត្រាព្រះអង្គ ឲ្យមកប្រោសលោះយើង យើងក្លាយជាគ្រួសារតែមួយ តាមរយៈព្រះលោហិតព្រះអង្គ ដែលបានហូរនៅលើឈើឆ្កាង ដើម្បីអត់ទោសបាបឲ្យយើង(៤:៤-៧)។ ក្នុងនាមយើងជាមនុស្សដែលព្រះបានបង្កើតឲ្យដូចរូបអង្គទ្រង់ តម្លៃរបស់យើង មិនអាស្រ័យទៅលើការគិត ការរំពឹងចង់បាន ឬភាពលម្អៀងរបស់អ្នកដទៃនោះឡើយ។ តើយើងជាអ្វី? យើងជាកូនរបស់ព្រះ។—Xochitl Dixon តើនៅពេលណា អ្នកធ្លាប់មានការសង្ស័យអំពីតម្លៃរបស់អ្នកជាមនុស្ស ដោយសារការគិត ការរំពឹងចង់បាន ឬភាពលម្អៀងរបស់អ្នកដទៃ? តើការដឹងថា កូនរបស់ព្រះទាំងអស់ សុទ្ធតែជាមនុស្សដែលព្រះបានបង្កើតឲ្យដូចរូបអង្គទ្រង់ បានជួយអ្នក ឲ្យស្រឡាញ់អ្នកដែលមានភាពខុសប្លែកពីអ្នក យ៉ាងណាខ្លះ? ឱព្រះវរបិតា សូមព្រះអង្គជួយទូលបង្គំ ឲ្យមើលឃើញខ្លួនឯង និងអ្នកដទៃ ដូចដែលព្រះអង្គបានទតឃើញយើងខ្ញុំ។ សូមព្រះអង្គជួយទូលបង្គំឲ្យស្រឡាញ់ និងមានចិត្តដូចព្រះអង្គ ពេលណាទូលបង្គំមានទំនាក់ទំនងជាមួយអ្នកដទៃ ដែលខុសប្លែកពីទូលបង្គំ។ គម្រោងអានព្រះគម្ពីររយៈពេល១ឆ្នាំ : អេម៉ុស ៤-៦ និង វិវរណៈ ៧