អនុវត្តតាមអ្វីដែលអ្នកបានចែកចាយ
ដោយXochitl Dixon
January 14, 2022
ចូរឲ្យអ្នករាល់គ្នាប្រព្រឹត្តតាមព្រះបន្ទូលទៅ កុំឲ្យគ្រាន់តែស្តាប់ប៉ុណ្ណោះ ហើយបញ្ឆោតខ្លួនវិញនោះឡើយ។ យ៉ាកុប ១:២២ ខ្ញុំបានចាប់ផ្តើមអានព្រះគម្ពីរឲ្យកូនៗរបស់ខ្ញុំស្តាប់ ពេលដែលហ្សេវា(Xavier) ដែលជាកូនប្រុសពៅ ចូលសាលាមត្តេយ្យ។ ខ្ញុំតែងតែស្វែងរកពេលដែលខ្ញុំអាចបង្រៀនពួកគេ ហើយចែកចាយខគម្ពីរ ដែលអាចប្រើក្នុងកាលៈទេសៈរបស់យើង ហើយលើកទឹកចិត្តពួកគេឲ្យអធិស្ឋានជាមួយខ្ញុំ។ ហ្សេវាបានចាំខគម្ពីរជាច្រើន ដោយមិនពិបាកទន្ទេញ។ ពេលដែលយើងស្ថិតក្នុងស្ថានភាពដ៏លំបាក ដែលត្រូវការប្រាជ្ញា គាត់ច្រើនតែសូតខគម្ពីរ ដែលបញ្ចេញពន្លឺនៃសេចក្តីពិតរបស់ព្រះ។ ថ្ងៃមួយ ខ្ញុំមានកំហឹង ហើយក៏បាននិយាយ ដោយសម្លេងកាច។ ពេលគាត់ស្តាប់ឮ គាត់ក៏បានឱបខ្ញុំ ហើយនិយាយថា “សូមម៉ាក់ ធ្វើតាមព្រះបន្ទូលដែលម៉ាក់បង្រៀន”។ ការរំឭកដ៏សុភាពរបស់ហ្សេវា បានធ្វើឲ្យខ្ញុំនឹកចាំ អំពីការបង្រៀនប្រកបដោយប្រាជ្ញារបស់សាវ័កយ៉ាកុប ទៅកាន់អ្នកជឿជាជនជាតិយូដា ដែលខ្ចាត់ខ្ចាយ ក្នុងទឹកដីសាសន៍ដទៃ(យ៉ាកុប ១:១)។ ដោយគាត់បាននិយាយសង្កត់ធ្ងន់អំពីរបៀប ដែលអំពើបាបអាចរំខានការធ្វើបន្ទាល់ថ្វាយព្រះយេស៊ូវ នោះគាត់ក៏បានលើកទឹកចិត្តពួកគេ ឲ្យទទួលព្រះបន្ទូលដែលបានដាំក្នុងចិត្តពួកគេ ដោយចិត្តសុភាព(ខ.២១)។ កាលណាយើងបានឮព្រះបន្ទូល តែមិនធ្វើតាម នោះយើងប្រៀបដូចជាមនុស្សដែលឆ្លុះកញ្ចក់ ហើយភ្លេចអ្វីដែលយើងបានឃើញក្នុងកញ្ចក់(ខ.២៣-២៤)។ យើងអាចភ្លេចឯកសិទ្ធិ ដែលព្រះបានប្រទានយើង ឲ្យធ្វើជាតំណាងរបស់ព្រះ ដោយយើងបានជានឹងព្រះ តាមរយៈព្រះលោហិតព្រះគ្រីស្ទ។ ព្រះយេស៊ូវបានបង្គាប់អ្នកជឿព្រះអង្គ ឲ្យផ្សាយដំណឹងល្អ។ ព្រះវិញ្ញាណបរិសុទ្ធកែប្រែជីវិតយើង ហើយទន្ទឹមនឹងនោះ ទ្រង់ប្រទានកម្លាំងយើង ឲ្យធ្វើជាអ្នកតំណាងព្រះគ្រីស្ទ ឲ្យបានល្អឡើង និងធ្វើជាអ្នកនាំសារនៃដំណឹងល្អ។ ការស្តាប់បង្គាប់ដោយក្តីស្រឡាញ់ នាំឲ្យគេឃើញពន្លឺនៃសេចក្តីពិត និងសេចក្តីស្រឡាញ់របស់ព្រះ នៅកន្លែងណាដែលព្រះអង្គចាត់យើងទៅ នោះយើងអាចនាំអ្នកដទៃឲ្យស្គាល់ព្រះយេស៊ូវ ដោយអនុវត្តតាមព្រះបន្ទូល ដែលយើងបានផ្សាយ។—Xochitl Dixon តើអ្នកមានការពិបាកអ្វីខ្លះ ក្នុងការអនុវត្តតាមព្រះគម្ពីរ? តើព្រះទ្រង់បានកែប្រែអ្នកយ៉ាងដូចម្តេចខ្លះ? ឱព្រះនៃសេចក្តីស្រឡាញ់ សូមព្រះអង្គជួយទូលបង្គំឲ្យផ្លាស់ប្រែ មានលក្ខណៈកាន់តែដូចព្រះអង្គ ដើម្បីឲ្យទូលបង្គំប្រើឱកាសនីមួយៗ ដែលព្រះអង្គប្រទាន ដើម្បីចែកចាយសេចក្តីស្រឡាញ់របស់ព្រះអង្គ ដល់អ្នកដទៃ។ គម្រោងអានព្រះគម្ពីររយៈពេល១ឆ្នាំ : លោកុប្បត្តិ ៣៣-៣៥ និង ម៉ាថាយ ១០:១-២០