សេចក្តីស្រឡាញ់ ដែលបានរំដោះឲ្យរួចពីអតីតកាល
ដោយXochitl Dixon
April 3, 2022
កុំតែមានសេចក្តីសប្បុរសរបស់ព្រះយេហូវ៉ា នោះយើងបានសូន្យបាត់អស់រលីងទៅហើយ ឯសេចក្តីមេត្តាករុណារបស់ទ្រង់ នោះមិនចេះផុតឡើយ។ បរិទេវ ៣:២២ កាលពីក្មេង មិត្តភក្តិខ្ញុំបានសុំឲ្យខ្ញុំទៅចែកចាយទីបន្ទាល់ ដល់ក្មេងស្រីជំទង់មួយក្រុម ក្នុងសិក្ខាសាលាមួយ ដែលលើកទឹកចិត្តយុវជនឲ្យរក្សាភាពបរិសុទ្ធ។ ពេលនោះ ខ្ញុំក៏បានបដិសេធ។ កាលខ្ញុំនៅវ័យជំទង់ ខ្ញុំនិងមិត្តប្រុសខ្ញុំបានជំរត់គ្នា។ រឿងនេះបាននាំឲ្យខ្ញុំមានការលំបាកជាច្រើន ហើយអំពើអសីលធម៌របស់ខ្ញុំ បានបណ្តាលឲ្យខ្ញុំមានស្នាមសម្លាក ក្នុងចិត្តអស់ជាច្រើនទសវត្សរ៍។ បន្ទាប់ពីខ្ញុំបានរៀបការ ហើយបាត់បង់កូនដំបូង ដោយសារការរលូតកូន ខ្ញុំក៏បានគិតថា ព្រះទ្រង់កំពុងដាក់ទោសខ្ញុំ ដោយសារអំពើបាបដែលខ្ញុំបានប្រព្រឹត្តកាលពីមុន។ ពេលដែលខ្ញុំបានថ្វាយជីវិតខ្ញុំដល់ព្រះគ្រីស្ទ នៅអាយុ៣០ឆ្នាំ ខ្ញុំបានសារភាពបាបរបស់ខ្ញុំ ហើយក៏បានប្រែចិត្ត…តែខ្ញុំនៅតែប្រព្រឹត្តអំពើបាប ហើយលន់តួបាបជាថ្មីម្តងហើយម្តងទៀត ។ ការប្រកាន់ទោសខ្លួនឯង និងភាពអាម៉ាស់បានស៊ីបំផ្លាញជីវិតខ្ញុំ។ តើខ្ញុំអាចចែកចាយអំពីព្រះគុណរបស់ព្រះយ៉ាងដូចម្តេច ពេលដែលខ្ញុំមិនទាន់បានទទួលទាំងស្រុង នូវអំណោយនៃសេចក្តីស្រឡាញ់ដែលព្រះអង្គមានចំពោះខ្ញុំ? តែអរព្រះគុណព្រះអង្គ ដែលក្រោយមក ទ្រង់ក៏បានលប់ចោលការកុហក ដែលបានចងខ្ញុំជាប់នឹងជីវិតចាស់ មុនពេលខ្ញុំសារភាពបាប។ ដោយព្រះគុណព្រះអង្គ ទីបំផុត ខ្ញុំក៏បានទទួល ការអត់ទោស ដែលព្រះអង្គបានប្រទានមកខ្ញុំតាំងពីដើមមក។ ព្រះទ្រង់យល់ចិត្តយើង ពេលដែលយើងពោលទំនួញ អំពីការឈឺចាប់ និងផលវិបាកនៃអំពើបាបរបស់យើង។ ទោះជាយ៉ាងណាក៏ដោយ ព្រះអង្គក៏បានប្រទានកម្លាំងឲ្យយើងអាចឈ្នះភាពអស់សង្ឃឹម ងាកចេញពីអំពើបាប ហើយងើបឡើង ដោយក្តីសង្ឃឹម ក្នុង “សេចក្តីស្រឡាញ់” “សេចក្តីអាណិត” “សេចក្តីស្មោះត្រង់” ដ៏អស្ចារ្យរបស់ព្រះអង្គ(បរិទេវ ៣:១៩-២៣)។ ព្រះគម្ពីរបានចែងថា ព្រះទ្រង់ជា ប្រភពនៃក្តីសង្ឃឹម និងសេចក្តីសង្គ្រោះរបស់យើង ហើយយើងអាចរៀនទុកចិត្តលើសេចក្តីល្អរបស់ព្រះអង្គ(ខ.២៤-២៦)។ ព្រះវរបិតានៃយើងមានពេញដោយសេចក្តីអាណិត។ ព្រះអង្គជួយយើងឲ្យទុកចិត្តលើសេចក្តីសន្យារបស់ព្រះអង្គ។ ពេលណាយើងបានទទួលសេចក្តីស្រឡាញ់ដ៏អស្ចារ្យរបស់ព្រះអង្គ ឲ្យបានពេញលេញ យើងអាចផ្សាយដំណឹងល្អ អំពីព្រះគុណព្រះអង្គ។—Xochitl Dixon តើពេលណា អ្នកមានអារម្មណ៍ថា អំពើបាបរបស់អ្នកកាលពីអតីតកាល កំពុងស៊ីបំផ្លាញជីវិតអ្នក? តើព្រះទ្រង់បានជួយអ្នកយ៉ាងដូចម្តេចខ្លះ ដើម្បីឲ្យអ្នកបានសម្រាក ក្នុងសេចក្តីសង្ឃឹមដ៏ច្បាស់លាស់ ចំពោះសេចក្តីស្រឡាញ់ និងព្រះគុណរបស់ព្រះអង្គ ដែលមិនអាចវាស់បាន? ឱព្រះវរបិតា ដែលមានពេញដោយសេចក្តីអាណិត សូមព្រះអង្គជួយទូលបង្គំ ឲ្យសង្ឃឹមដល់សេចក្តីស្រឡាញ់ដ៏អស្ចារ្យ ដែលព្រះអង្គមានចំពោះទូលបង្គំ ខណៈពេលដែលទូលបង្គំផ្សាយដំណឹងល្អនៃព្រះគុណព្រះអង្គ នៅកន្លែងណាដែលទូលបង្គំទៅដល់។ គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ១៩-២១ និង លូកា ៧:៣១-៥០