មានលក្ខណៈដូចយើង ដើម្បីយើង
ដោយKirsten Holmberg
April 12, 2022
ហេតុនោះបានជាគួរឲ្យទ្រង់ បានដូចបងប្អូនទ្រង់គ្រប់ជំពូកដែរ។ ហេព្រើរ ២:១៧ លោកឌែរែក(Derek) បានសង្កេតឃើញកូនប្រុសគាត់ មិនចង់ដោះអាវចេញ ដើម្បីហែលទឹក ហើយក៏បានដឹងថា តាមពិត កូនប្រុសគាត់មិនចង់ឲ្យគេឃើញស្នាមខ្នៅពីកំណើត ដែលមាននៅលើទ្រូង ពោះ និងដៃឆ្វេងរបស់ខ្លួន។ លោកឌែរែកក៏បានប្តេជ្ញាចិត្តថា នឹងជួយកូនប្រុសគាត់។ គាត់ក៏បានចាក់សាក់នៅលើខ្លួនគាត់ ដោយចំណាយពេលយ៉ាងយូរ និងមានការឈឺចាប់ជាច្រើនផង ដើម្បីបង្កើតស្នាមនៅលើខ្លួនគាត់ ឲ្យដូចស្នាមខ្នៅរបស់កូនប្រុសគាត់។ សេចក្តីស្រឡាញ់ដែលលោកឌែរែកមានចំពោះកូនប្រុសគាត់ បានធ្វើឲ្យខ្ញុំនឹកចាំ អំពីសេចក្តីស្រឡាញ់ដែលព្រះទ្រង់មាន ចំពោះកូនប្រុសស្រីរបស់ព្រះអង្គ។ ដោយសារយើងដែលជាកូនព្រះអង្គ “មានសាច់ឈាម”(ហេព្រើរ ២:១៤) នោះព្រះយេស៊ូវក៏បានយកកំណើតជាមនុស្ស ដែលមានសាច់ មានឈាម ដូចយើងដែរ ដើម្បីរំដោះយើង ឲ្យរួចពីអំណាចនៃសេចក្តីស្លាប់(ខ.១៤)។ “ហេតុនោះបានជាគួរឲ្យទ្រង់ បានដូចបងប្អូនទ្រង់គ្រប់ជំពូកដែរ”(ខ.១៧) ដើម្បីផ្សះផ្សាទំនាក់ទំនងរវាងយើង និងព្រះ។ លោកឌែរែកចង់ជួយកូនប្រុសគាត់ ឲ្យឈ្នះការខ្នាស់អៀន ដោយសារស្នាមខ្នៅនៅលើខ្លួន ដូចនេះ គាត់ក៏បានធ្វើឲ្យខ្លួនគាត់ មានស្នាមដូចកូនប្រុសគាត់ដែរ។ ព្រះយេស៊ូវក៏បានជួយយើងជម្នះបញ្ហាដែលធំជាងនេះទៀត គឺជម្នះភាពជាទាសករនៃអំពើបាប។ ព្រះអង្គបានជម្នះវា ដើម្បី យើង ដោយធ្វើឲ្យអង្គទ្រង់ មានលក្ខណៈដូច យើង ដោយទទួលទោសនៃអំពើបាបយើង តាមរយៈការសុគតជំនួសយើង។ កាលដែលព្រះយេស៊ូវស្ម័គ្រព្រះទ័យយកកំណើតជាមនុស្សដូចយើង គឺមិនគ្រាន់តែបានជួយឲ្យយើងមានទំនាក់ទំនងដ៏ត្រឹមត្រូវ ជាមួយព្រះប៉ុណ្ណោះឡើយ តែក៏បានជួយយើងឲ្យទុកចិត្តព្រះអង្គ ក្នុងពេលដែលយើងមានទុក្ខលំបាក។ ពេលណាយើងជួបការល្បួង និងទុក្ខលំបាក យើងអាចពឹងផ្អែកលើព្រះអង្គ ដើម្បីទទួលកម្លាំង និងជំនួយ ព្រោះព្រះអង្គ “អាចជួយយើង”(ខ.១៨)។ ព្រះអង្គយល់ចិត្តយើង ហើយយកព្រះទ័យទុកដាក់ចំពោះយើង ដូចជាឪពុកដែលស្រឡាញ់កូន។—Kirsten Holmberg តើព្រះយេស៊ូវធ្លាប់ជួបទុក្ខលំបាក ដូចអ្នក ត្រង់ចំណុចណាខ្លះ? តើមានអ្វីរារាំងអ្នក មិនឲ្យទុកចិត្តព្រះអង្គ នៅពេលនេះ? ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការយកកំណើតជាមនុស្ស ដើម្បីទទួលរងទុក្ខលំបាកដូចទូលបង្គំដែរ ហើយបង់ថ្លៃលោះទូលបង្គំ ឲ្យរួចពីបាប។ សូមព្រះអង្គជួយទូលបង្គំ ឲ្យទុកចិត្តព្រះអង្គកាន់តែខ្លាំងឡើង។ គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១៩-២១ និង លូកា ១១:២៩-៥៤