ឈ្នះភាពងងឹត
ដោយTim Gustafson
April 14, 2022
កាលវាបានទទួលចំណិតនំនោះ វាក៏ចេញទៅជា១រំពេច ពេលនោះ យប់ហើយ។ យ៉ូហាន ១៣:៣០ រឿងប្រលោមលោកដែលលោកអេលី វេសែល(Eli Wiesel) បាននិពន្ធមានចំណងជើងថា យប់ដ៏ងងឹត បាននាំអ្នកអានស្វែងយល់ អំពីរឿងដ៏រន្ធត់នៃអំពើប្រល័យពូជសាសន៍ដែលជនជាតិយូដាបានទទួលរង។ ផ្អែកទៅលើបទពិសោធន៍ដែលគាត់មាន នៅក្នុងជំនុំមរណៈរបស់ពួកណាហ្ស៊ី គាត់បានសរសេរអំពីភាពផ្ទុយគ្នារវាងរឿងក្នុងព្រះគម្ពីរនិក្ខមនំ និងរឿងពិតដែលជនជាតិគាត់បានជួប។ គាត់បានរៀបរាប់ថា លោកម៉ូសេ និងជនជាតិអ៊ីស្រាអែលបានរួចផុតពីភាពជាទាសករក្នុងទឹកដីអេស៊ីព្ទ បន្ទាប់ពីពួកគេបានប្រារព្ធធ្វើបុណ្យរំលងជាលើកទី១(និក្ខមនំ ១២) ប៉ុន្តែ ពួកណាហ្ស៊ីអ៊ីត្លែបានចាប់ខ្លួនអ្នកដឹកនាំជនជាតិយូដា នៅក្រោយថ្ងៃបុណ្យរំលង។ ដើម្បីកុំឲ្យយើងរិះគន់លោកវេសែល និងការប្រៀបធៀបដ៏ចម្លែករបស់គាត់ ចូរយើងពិចារណា អំពីភាពផ្ទុយគ្នាស្រដៀងនេះ ដែលមានក្នុងព្រះគម្ពីរ។ នៅពេលយប់ថ្ងៃបុណ្យរំលង គេបានរំពឹងថា ព្រះយេស៊ូវនឹងរំដោះរាស្រ្តរបស់ព្រះឲ្យរួចពីនឹមត្រួតត្រាដ៏ឈឺចាប់របស់ចក្រភពរ៉ូម៉ាំង តែផ្ទុយទៅវិញ ព្រះអង្គបានអនុញ្ញាតឲ្យគេចាប់ព្រះកាយព្រះអង្គ មុននឹងយកព្រះអង្គទៅកាន់ទោស ហើយធ្វើគុត។ លោកយ៉ូហានបាននាំយើង ចូលទៅក្នុងទិដ្ឋភាពដ៏បរិសុទ្ធ មុនពេលគេចាប់ព្រះកាយព្រះអង្គ។ នៅយប់នោះ ព្រះអង្គមានការតប់ប្រម៉ល់ក្នុងព្រះទ័យ ដោយសារព្រះអង្គជ្រាបអំពីរឿងដែលហៀបនឹងកើតឡើងចំពោះព្រះអង្គ ហើយក្នុងពិធីលៀងព្រះអម្ចាស់ ព្រះអង្គក៏បានថ្លែងទំនាយអំពីអ្នកដែលនឹងក្បត់ព្រះអង្គ(យ៉ូហាន ១៣:២១)។ បន្ទាប់មក ព្រះអង្គក៏បានធ្វើនូវរឿងមួយ ដែលយើងស្ទើរតែមិនអាចយល់ ដោយកាច់នំប៉័ងឲ្យសិស្សដែលក្បត់ព្រះអង្គ។ ព្រះគម្ពីរបានចែងថា “កាលវាបានទទួលចំណិតនំនោះ វាក៏ចេញទៅជា១រំពេច ពេលនោះ យប់ហើយ”(ខ.៣០)។ រឿងដែលអយុត្តិធម៌បំផុតក្នុងប្រវតិ្តសាស្ត្រហៀបនឹងកើតឡើងហើយ តែព្រះអង្គនៅតែប្រកាស់ថា “ឥឡូវនេះ កូនមនុស្សបានដំកើងឡើងហើយ ព្រះក៏បានដំកើងឡើងក្នុងកូនមនុស្សដែរ”(ខ.៣១)។ ព្រះអង្គក៏បានជ្រាបផងដែរថា ពីរបីម៉ោងទៀត ពួកសាវ័កនឹងជួបភាពតក់ស្លត់ បរាជ័យ និងការបាក់ទឹកចិត្តយ៉ាងខ្លាំង។ តែព្រះអង្គបានទតឃើញផែនការព្រះ កំពុងតែសម្រេច តាមបំណងព្រះទ័យទ្រង់។ ពេលដែលភាពងងឹតហាក់ដូចជាកំពុងមានជ័យជម្នះ យើងអាចនឹកចាំថា ព្រះទ្រង់ក៏ធ្លាប់ប្រឈមមុខដាក់ពេលយប់ដ៏ងងឹត ហើយមានជ័យជម្នះមកលើវា។ សព្វថ្ងៃនេះ ព្រះអង្គដើរជាមួយយើង។ យើងនឹងមិនជួបភាពងងឹតជារៀងរហូតឡើយ។—Tim Gustafson តើអ្នកបានជួបភាពតក់ស្លត់ និងបាត់បង់ក្តីសង្ឃឹម នៅពេលណា? តើអ្នកអាចពិពណ៌នាដូចម្តេចខ្លះ អំពីអារម្មណ៍របស់អ្នក បន្ទាប់ពីបានឆ្លងកាត់ពេលដ៏ងងឹតនោះហើយ? ឱព្រះយេស៊ូវ ទូលបង្គំសូមអរព្រះគុណ សម្រាប់ការប្រកាន់ខ្ជាប់តាមផែនការព្រះវរបិតា ពេលដែលព្រះអង្គកំពុងបោះជំហានទៅរកឈើឆ្កាង។ ទូលបង្គំសូមអរព្រះគុណ សម្រាប់ការឈ្នះអំពើបាប ដើម្បីយើងខ្ញុំ។ គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ២៥:២៦ និង លូកា ១២:៣២-៥៩