បានចាក់ឫសជាប់ក្នុងដីព្រះអង្គ
ដោយPatricia Raybon
June 16, 2022
អ្នកនោះនឹងបានដូចជាដើមឈើដាំនៅមាត់ទឹក ដែលចាក់ឫសទៅក្បែរទន្លេ។ យេរេមា ១៧:៨ ក្នុងឃ្លាដំបូងនៃបទកំណាព្យរបស់អ្នកស្រី ស៉ារ៉ា ថេសដេល(Sara Teasdale) គាត់បានសរសេរថា “ខ្យល់បានបក់បោកដើមផ្កាលីឡាក”។ ក្នុងឃ្លានេះ គាត់បាននាំឲ្យអ្នកអានស្រមៃអំពីទិដ្ឋភាពរបស់មែកដើមផ្កាលីឡាក ដែលរេចុះឡើងៗ ដោយសារកម្លាំងខ្យល់បក់។ តែតាមពិត គាត់កំពុងឆ្លុះបញ្ចាំងអំពីទំនួញនៃការបាត់បង់មនុស្សជាទីស្រឡាញ់ ហើយមិនយូរប៉ុន្មាន កំណាព្យរបស់គាត់ក៏បានប្រែក្លាយជាការសោកសង្រេង។ ដើមផ្កាលីឡាកក្នុងទីធ្លាក្រោយផ្ទះខ្ញុំ ក៏បានជួបបញ្ហាប្រឈមផងដែរ។ បន្ទាប់ពីរដូវកាលនៃការលូតលាស់ដ៏រឹងមាំ និងស្រស់ស្អាតបំផុត ពួកវាក៏បានប្រឈមមុខដាក់អ្នកថែសួន ដែលបាន “កាត់តម្រឹម” គុម្ពផ្កានីមួយៗ ហើយក៏បានជ្រុលដៃកាត់ពួកវានៅសល់តែដើម។ ខ្ញុំក៏បានយំ ដោយការសោកស្តាយ។ បីឆ្នាំក្រោយមក មែករបស់វាមិនចេញផ្កា ហើយដើមវាក៏បានដុះផ្សិតទៀត។ ខ្ញុំក៏មានគម្រោងជីករំលើងដើមផ្កាដែលបានវេទនាជាយូរមកហើយនោះ តែពួកវាក៏បានលូតលាស់ ហើយចេញផ្កាយ៉ាងស្រស់ស្អាតឡើងវិញ។ ពួកវាគ្រាន់តែត្រូវការពេលវេលា ហើយខ្ញុំគ្រាន់តែចាំបាច់ត្រូវរង់ចាំអ្វីដែលខ្ញុំមិនអាចមើលឃើញ។ ព្រះគម្ពីរបានចែងអំពីមនុស្សជាច្រើន ដែលបានរង់ចាំ ដោយជំនឿ ទោះជាមានទុក្ខលំបាកយ៉ាងណាក៏ដោយ។ លោកណូអេបានរង់ចាំភ្លៀងដែលបានរាំងជាយូរមកហើយ។ លោកកាឡែបបានរង់ចាំអស់រយៈពេល៤០ឆ្នាំ ដើម្បីចូលទឹកដីសន្យា។ នាងរេបេកាបានរង់ចាំ២០ឆ្នាំ ទំរាំតែមានកូន។ លោកយ៉ាកុបបានរង់ចាំអស់៧ឆ្នាំ ទំរាំតែបានរៀបការជាមួយនាងរ៉ាជែល។ លោកស៊ីម្មានក៏បានរង់ចាំមើលព្រះឱរសតូចយេស៊ូវ អស់ពេលជាច្រើនឆ្នាំ។ ព្រះទ្រង់ក៏បានប្រទានរង្វាន់ដល់ពួកគេ សម្រាប់ការអត់ធ្មត់ក្នុងការរង់ចាំនោះ។ ផ្ទុយទៅវិញ អ្នកដែលមើលទៅមនុស្ស តែមិនមើលទៅព្រះ គឺ“នឹងបានដូចជាដើមឈើសោះកក្រោះនៅសមុទ្រខ្សាច់”(យេរេមា ១៧:៦)។ អ្នកស្រីថេសដេលបានបញ្ចប់ល្បះទី១នៃបទកំណាព្យគាត់ ដោយពាក្យដ៏ក្រៀមក្រំថា គាត់ទៅតាមផ្លូវដ៏ក្រៀមក្រោះ។ ប៉ុន្តែ លោកយេរេមាបានបន្លឺសម្លេងដ៏មានអំណរថា “មានពរហើយ អ្នកណាដែលទីពឹងដល់ព្រះយេហូវ៉ា ហើយដែលទុកចិត្តនឹងទ្រង់ ដ្បិតអ្នកនោះនឹងបានដូចជាដើមឈើដាំនៅមាត់ទឹក”(ខ.៧-៨)។ អ្នកដែលទុកចិត្តព្រះ គឺបានដុះជាប់នៅក្នុងព្រះអង្គ ដែលដើរជាមួយយើង ក្នុងពេលមានអំណរ ក៏ដូចជាពេលដែលមានទុក្ខលំបាក ក្នុងជីវិត។—Patricia Raybon តើការយល់ដឹងអំពីព្រះត្រង់ចំណុចណា ដែលបណ្តាលចិត្តអ្នកឲ្យទុកចិត្តព្រះអង្គ? តើក្នុងអំឡុងពេលណានៃជីវិតអ្នក ដែលជំនឿអ្នកចាក់ឫសចូលកាន់តែជ្រៅ ក្នុងដីរបស់ព្រះអង្គ? ឱព្រះវរបិតា ដែលគង់នៅស្ថានសួគ៌ ពេលណាជីវិតទូលបង្គំមានភាពក្រៀមក្រោះ ឬត្រូវខ្យល់ខ្លាំងបក់បោក សូមព្រះអង្គជួយទូលបង្គំឲ្យទុកចិត្តព្រះអង្គ ដោយចាក់ឫសកាន់តែជ្រៅ ក្នុងសេចក្តីស្រឡាញ់ដ៏ស្ថិតស្ថេររបស់ព្រះអង្គ។ គម្រោងអានព្រះគម្ពីររយៈពេល១ឆ្នាំ : នេហេមា ៧-៩ និង កិច្ចការ ៣