ព្រះទ្រង់ទតឃើញអ្នក
ដោយKaren Huang
July 20, 2022
នោះនាងក៏ហៅព្រះនាមព្រះយេហូវ៉ា ដែលកំពុងមានព្រះបន្ទូលនឹងនាងថា «ព្រះដ៏ទតឃើញ»។ លោកុប្បត្តិ ១៦:១៣ ពេលព្រឹកព្រលឹមអាចជាពេលដ៏ឈឺចាប់ សម្រាប់មិត្តភក្តិខ្ញុំ ឈ្មោះ អាល់ម៉ា(Alma) ដែលជាស្រ្តីមេម៉ាយ មានកូនពីរនាក់។ គាត់ប្រាប់ខ្ញុំថា “ពេលដែលអ្វីៗមានភាពស្ងប់ស្ងាត់ ការព្រួយបារម្ភក៏បានលេចចេញមក។ ខណៈពេលដែលខ្ញុំកំពុងធ្វើការងារផ្ទះ ខ្ញុំក៏បានគិតអំពីបញ្ហាហិរញ្ញវត្ថុ ហើយព្រួយបារម្ភអំពីសុខភាព និងការសិក្សារបស់កូន”។ កាលស្វាមីរបស់អាល់ម៉ាបោះបង់គាត់ចោល គាត់ត្រូវទទួលខុសត្រូវចំពោះការចិញ្ចឹមកូនតែម្នាក់ឯង។ គាត់ថា “ខ្ញុំមានការពិបាក តែខ្ញុំដឹងថា ព្រះទ្រង់ទតឃើញខ្ញុំ និងគ្រួសារខ្ញុំ។ ព្រះអង្គប្រទានកម្លាំង ឲ្យខ្ញុំអាចធ្វើការងារពីរកន្លែង ដើម្បីបំពេញតម្រូវការរបស់យើង ហើយអនុញ្ញាតឲ្យកូនៗរបស់ខ្ញុំ ពិសោធន៍នឹងការដឹកនាំរបស់ព្រះអង្គជារៀងរាល់ថ្ងៃ”។ ហាការជាបាវស្រីសាសន៍អេស៊ីព្ទ ដែលបានយល់អំពីអត្ថន័យនៃការដែលព្រះទតឃើញនាង។ បន្ទាប់ពីនាងមានផ្ទៃពោះជាមួយលោកអ័ប្រាហាំ នាងក៏បានចាប់ផ្តើមស្អប់ខ្ពើមនាងសារ៉ាយ(លោកុប្បត្តិ ១៦:៤) ជាហេតុនាំឲ្យនាងសារ៉ាយ ធ្វើបាបនាង ទាល់តែនាងរត់គេចខ្លួនទៅវាលរហោស្ថាន។ ពេលនោះ នាងហាការស្ថិតក្នុងភាពឯកោ ដោយប្រឈមមុខដាក់ពេលអនាគត ដែលហាក់ដូចជាងងឹត និងគ្មានសង្ឃឹម សម្រាប់នាង និងកូនក្នុងផ្ទៃនាង។ ប៉ុន្តែ “ទេវតានៃព្រះយេហូវ៉ា”(ខ.៧) ក៏បានមកជួបនាង ហើយប្រាប់នាងថា “ព្រះយេហូវ៉ាទ្រង់ជ្រាបពីសេចក្តីទុក្ខលំបាករបស់ឯង”(ខ.១១)។ ទេវតារបស់ព្រះក៏បានណែនាំនាងហាការ អំពីការអ្វីដែលត្រូវធ្វើ ហើយក៏បានធានាដល់នាង អំពីពេលអនាគតរបស់នាង។ តាមរយៈនាង យើងរៀនបានថា ព្រះទ្រង់មានព្រះនាមថា យេហូវ៉ា អែល រ៉ូអ៊ី ដែលមានន័យថា “ព្រះទ្រង់ទតឃើញខ្ញុំ”(ខ.១៣)។ អ្នកប្រហែលជាកំពុងស្ថិតនៅក្នុងការធ្វើដំណើរដ៏ពិបាក ដោយមានអារម្មណ៍ឯកោ មិនដឹងថា ត្រូវទៅតាមទិសដៅមួយណា។ ប៉ុន្តែ សូមចាំថា ព្រះទ្រង់ទតឃើញអ្នក ទោះអ្នកទៅដល់វាលរហោស្ថានក៏ដោយ។ ចូរឈោងទៅរកព្រះអង្គ ហើយទុកចិត្តថា ព្រះអង្គនឹងដឹកនាំអ្នកឆ្លងកាត់ពេលដ៏ពិបាកនោះ។—Karen Huang តើទស្សនៈរបស់អ្នក អំពីកាលៈទេសៈក្នុងពេលបច្ចុប្បន្ន មានការផ្លាស់ប្តូរយ៉ាងណា ពេលដែលបានដឹងថា ព្រះអង្គ ជាយេហូវ៉ា អែលរ៉ូអី មានន័យថា ព្រះដែលទតឃើញ? តើអ្នកអាចឆ្លើយតបចំពោះព្រះអង្គ យ៉ាងដូចម្តេចខ្លះ? ឱព្រះអម្ចាស់ ទូលបង្គំសូមអរព្រះគុណ សម្រាប់ការធានាថា ទូលបង្គំនឹងមិនធ្វើដំណើរឆ្លងកាត់ជីវិតនេះ តែម្នាក់ឯងឡើយ។ ទូលបង្គំដឹងថា ព្រះអង្គទតឃើញទូលបង្គំ ហើយព្រះអង្គតែងតែគង់នៅក្បែរទូលបង្គំជានិច្ច។ គម្រោងអានព្រះគម្ពីររយៈពេល១ឆ្នាំ : ទំនុកដំកើង ២៩-៣០ និង កិច្ចការ ២៣:១-១៥