ពន្លឺបណ្តេញភាពងងឹត
ដោយDave Branon
July 29, 2022
ឯបណ្តាជន ដែលអង្គុយក្នុងសេចក្តីងងឹត គេបានឃើញពន្លឺយ៉ាងធំ។ ម៉ាថាយ ៤:១៦ នៅថ្ងៃដែលមានអាកាសធាតុក្តៅល្មម ខ្ញុំ និងចៅរបស់ខ្ញុំ ឈ្មោះ ម៉ូលី(Mollie) អាយុ៤ឆ្នាំ បានឈប់សម្រាកមួយភ្លែត បន្ទាប់ពីបានលេងបាល់ជាមួយគ្នា។ ពេលយើងកំពុងអង្គុយញាំទឹក នៅលើរានហាល ម៉ូលីក៏បានមើលទីធ្លាផ្ទះ ហើយនិយាយថា “មើលន៍ ពន្លឺថ្ងៃនៅក្នុងថ្លុកទឹក”។ ពេលនោះ ពន្លឺថ្ងៃបានចាំងចូលទៅក្នុងម្លប់ដ៏ក្រាស់ មើលទៅដូចថ្លុកទឹក ដែលចាំងពន្លឺ នៅក្នុងស្រមោល។ ទិដ្ឋភាពនេះ ប្រៀបដូចជាក្តីសង្ឃឹម ដែលយើងអាចរកបាន ក្នុងថ្ងៃដ៏ងងឹត។ ក្នុងពេលមានបញ្ហាប្រឈមដ៏ពិបាក ដែលហាក់ដូចជាមិនសូវមានរឿងល្អៗកើតឡើង យើងមិនត្រូវផ្តោតចិត្តទៅលើស្រមោលដ៏ងងឹតនោះឡើយ តែផ្ទុយទៅវិញ ចូរយើងផ្តោតទៅលើពន្លឺវិញ។ ព្រះយេស៊ូវជាពន្លឺ។ កណ្ឌគម្ពីរម៉ាថាយបានដកស្រង់កណ្ឌគម្ពីរអេសាយ ដើម្បីពិពណ៌នា អំពីពន្លឺដែលចុះមកផែនដី ពេលដែលព្រះយេស៊ូវបានប្រសូត យ៉ាងដូចនេះថា “ឯបណ្តាជន ដែលអង្គុយក្នុងសេចក្តីងងឹត គេបានឃើញពន្លឺយ៉ាងធំ មានពន្លឺរះឡើង បំភ្លឺដល់ពួកអ្នកដែលអង្គុយក្នុងកំលុង ហើយនឹងម្លប់នៃសេចក្តីស្លាប់”(ម៉ាថាយ ៤:១៦ និងអេសាយ ៩:២)។ ឥទ្ធិពលនៃអំពើបាប នៅមានជុំវិញខ្លួនយើង ខណៈពេលដែលយើងនៅមានជីវិត ក្នុង “ម្លប់នៃសេចក្តីស្លាប់”។ ប៉ុន្តែ ព្រះយេស៊ូវ ជាពន្លឺដែលចាំងចូលទៅក្នុងម្លប់នោះ ដែលជាពន្លឺដ៏ធំ និងរុងរឿងនៃលោកិយនេះ(យ៉ូហាន ១:៤-៥)។ ពន្លឺនៃសេចក្តីស្រឡាញ់ និងការអាណិតរបស់ព្រះយេស៊ូវ បានចែងចាំងចូលទៅក្នុងម្លប់ ដោយប្រទានយើង នូវពន្លឺដើម្បីបំភ្លឺការរស់នៅរបស់យើង ជារៀងរាលថ្ងៃ ហើយជួយឲ្យចិត្តយើងមានពន្លឺភ្លឺឡើង ដោយក្តីសង្ឃឹម។—Dave Branon តើមានភាពងងឹតអ្វីដែលកំពុងគ្របដណ្តប់មកលើការរស់នៅរបស់អ្នក សព្វថ្ងៃនេះ? តើអ្នកអាចអនុញ្ញាតព្រះវត្តមាន និងក្តីស្រឡាញ់របស់ព្រះយេស៊ូវ ឲ្យបណ្តេញពពកខ្មៅនោះយ៉ាងដូចម្តេចខ្លះ ខណៈពេលដែលទ្រង់ប្រទានក្តីអំណរ និងក្តីសង្ឃឹម? ឱព្រះយេស៊ូវ ខណៈពេលដែលយើងខ្ញុំកំពុងជួបការលំបាក ក្នុងលោកិយដែលពេញដោយបញ្ហា ទូលបង្គំត្រូវការព្រះវត្តមានព្រះអង្គ។ ទូលបង្គំត្រូវការសេចក្តីស្រឡាញ់របស់ព្រះអង្គ ដែលលើកទូលបង្គំឡើង ចេញពីភាពងងឹត ហើយជួយឲ្យទូលបង្គំឈរ ក្នុងពន្លឺរបស់ព្រះអង្គ។ គម្រោងអានព្រះគម្ពីររយៈពេល១ឆ្នាំ : ទំនុកដំកើង ៥១-៥៣ និង រ៉ូម ២