ពេលដែលការយល់ដឹងនាំឲ្យឈឺចាប់
ដោយMike Wittmer
August 30, 2022
ដ្បិតដែលមានប្រាជ្ញាច្រើន នោះក៏កើតទុក្ខច្រើន ហើយអ្នកណាដែលចំរើនចំណេះ នោះក៏ចំរើនសេចក្តីព្រួយឡើងដែរ។ សាស្តា ១:១៨ លោកហ្ស៊ែក អ៊ែលឌ័រ(Zach Elder) និងមិត្តភក្តិរបស់គាត់បានជិះទូកកម្សាន្តក្នុងទឹកទន្លេ កាត់តាមជ្រលងភ្នំ ហ្គ្រែន ខានញានអស់រយៈពេល២៥ថ្ងៃ។ ពេលដែលពួកគេទាញទូកឡើងច្រាំង អ្នកដែលមកទទួលពួកគេបានប្រាប់ពួកគេ អំពីជំងឺកូវីត១៩ កំពុងរាតត្បាតពិភពលោក។ ពួកគេគិតថា បុរសនោះកំពុងតែនិយាយលេង។ ប៉ុន្តែ ពេលដែលពួកគេចាកចេញពីជ្រលងភ្នំនោះ ពួកគេក៏បានទទួលសារបន្ទាន់ ពីឪពុកម្តាយរបស់ពួកគេ។ លោកហ្ស៊ែក និងមិត្តភក្តិរបស់គាត់មានអារម្មណ៍តក់ស្លត់ ហើយចង់វិលត្រឡប់ទៅរកទន្លេនោះវិញ ដើម្បីគេចចេញពីជំងឺ ដែលពួកគេទើបបានទទួលដំណឹងនោះ។ ក្នុងលោកិយដែលធ្លាក់ចូលក្នុងអំពើបាប ការយល់ដឹងច្រើនតែនាំឲ្យមានការឈឺចាប់។ គ្រូប្រកបដោយប្រាជ្ញានៃកណ្ឌគម្ពីរសាស្តាបានសង្កេតឃើញថា "ដ្បិតដែលមានប្រាជ្ញាច្រើន នោះក៏កើតទុក្ខច្រើន ហើយអ្នកណាដែលចំរើនចំណេះ នោះក៏ចំរើនសេចក្តីព្រួយឡើងដែរ"(សាស្តា ១:១៨)។ តើមាននរណាខ្លះ ដែលមិនច្រណែនកូនក្មេង ដែលមិនដឹងអី? ពួកគេមិនស្គាល់អ្វីជាការប្រកាន់ពូជសាសន៍ អំពើហឹង្សា ឬជំងឺមហារីកឡើយ។ កាលយើងនៅក្មេង តើយើងមិនសប្បាយចិត្តជាងពេលដែលយើងធំដឹងក្តី ហើយដឹងអំពីភាពកម្សោយ និងគុណវិបត្តិរបស់ខ្លួនឯងទេឬ? តើមិនសប្បាយចិត្តជាងពេលដែលយើងដឹងអំពីរឿងអាថ៌កំបាំងរបស់គ្រួសារយើង ហេតុអ្វីពូយើងក្លាយជាមនុស្សប្រមឹក ឬដឹងថា ឪពុកម្តាយយើងលែងលះគ្នា ដោយសារអ្វីជាដើម? ការឈឺចាប់ដែលកើតឡើងពីការយល់ដឹង យើងមិនអាចរំពឹងថា វានឹងបាត់ទៅវិញដោយឯកឯងបានឡើយ។ ពេលយើងបានដឹងហើយ ការធ្វើជាមិនដឹងមិនឮក៏នៅតែគ្មានប្រយោជន៍។ តែមានការយល់ដឹង ឬប្រាជ្ញាដែលខ្ពង់ខ្ពស់និងប្រសើរជាង ដែលចម្រើនកម្លាំងយើង ឲ្យអត់ទ្រាំ ហើយថែមទាំងចម្រើនឡើងផងដែរ។ ព្រះយេស៊ូវជាព្រះបន្ទូលព្រះ ជាពន្លឺដែលចែងចាំងចូលទៅក្នុងភាពងងឹត(យ៉ូហាន ១:១-៥)។ ព្រះអង្គ "បានតាំងឡើង ទុកជាប្រាជ្ញាដែលមកពីព្រះ ហើយជាសេចក្តីសុចរិត សេចក្តីបរិសុទ្ធ និងសេចក្តីប្រោសលោះដល់យើងផង"(១កូរិនថូស ១:៣០)។ ការឈឺចាប់របស់អ្នក គឺជាមូលហេតុដែលអ្នកត្រូវរត់ទៅរកព្រះយេស៊ូវ។ ព្រះអង្គស្គាល់អ្នក ហើយថែរក្សាអ្នក។—Mike Wittmer តើមានរឿងអ្វីខ្លះ ដែលអ្នកគិតថា បើមិនដឹងអំពីវា ល្អជាង? ចូរទូលថ្វាយព្រះយេស៊ូវអំពីរឿងនោះ។ បន្ទាប់មក ចូលថ្វាយវាដាច់ដល់ព្រះអង្គ។ ពេលណាវារំខានអ្នក ចូលទូលថ្វាយវាដល់ព្រះយេស៊ូវម្តងទៀត។ ឱព្រះយេស៊ូវ ទូលបង្គំមិនចូលចិត្តការឈឺចាប់ តែបើវានាំទូលបង្គំឲ្យចូលទៅជិតព្រះអង្គ នោះវាមានតម្លៃចំពោះទូលបង្គំ។ For further study, read Why? Seeing God in Our Pain at DiscoverySeries.org/CB151. គម្រោងអានព្រះគម្ពីររយៈពេល១ឆ្នាំ : ទំនុកដំកើង ១៣២-១៣៤ និង ១កូរិនថូស ១១:១៧-៣៤