មេរៀននៃការស៊ូទ្រំា
ដោយDave Branon
September 5, 2022
មានពរហើយ មនុស្សណាដែលស៊ូទ្រាំនឹងសេចក្តីល្បួង។ យ៉ាកុប ១:១២ គេបានប៉ាន់ប្រមាណថា ជារៀងរាល់ថ្ងៃ គេបានលក់គ្រាប់ជ័រឡេហ្គោបានជាង ៧៥ពាន់លានគ្រាប់ ក្នុងមួយឆ្នាំ បានសេចក្តីថា បើគេលក់ឲ្យមនុស្សម្នាក់ៗនៅលើផែនដីនេះ នោះក្នុង១នាក់ ទទួលបានគ្រាប់ជ័រឡេហ្គោ១០គ្រាប់។ ប៉ុន្តែ បើមិនមែនដោយសារការតស៊ូរបស់លោក អូលេ ឃើក គ្រីស្ទានស៊ែន(Ole Kirk Christiansen) ដែលជាអ្នកផលិតប្រដាប់ក្មេងលេង នៅប្រទេសដាណឺម៉ាកទេ នោះគេក៏គ្មានគ្រាប់ជ័រឡេហ្គោលេង ក្នុងពេលបច្ចុប្បន្នដែរ។ លោកគ្រីស្ទានស៊ែនបានធ្វើការយ៉ាងហត់នឿយ ក្នុងទីក្រុងប៊ីលុន ប្រទេសដាណឺម៉ាក អស់រយៈពេលជាច្រើនទសវត្សរ៍ មុនពេលគាត់បង្កើត ប្រដាប់ក្មេងលេង លេក ហ្កត់(Leg Godt) ដែលមានន័យថា “លេងសប្បាយ”។ រោងជាងរបស់គាត់បានជួបគ្រោះអគ្គីភ័យ២លើក។ គាត់បានស៊ូទ្រាំនឹងការក្ស័យធន់ និងសង្រ្គាមលោកលើកទី២ ដែលបណ្តាលឲ្យមានការខ្វះខាតវត្ថុធាតុដើម។ ទីបំផុត នៅចុងទសវត្សរ៍ឆ្នាំ១៩៤០ គាត់ក៏បានមានគំនិតបង្កើតដុំជ័រតូចៗ ដែលអាចផ្គំចូលគ្នា។ ពេលដែលគាត់បានលាចាកលោក នៅឆ្នាំ១៩៥៨ ពាក្យឡេហ្គោ ហៀបនឹងក្លាយជាពាក្យ ដែលក្រុមគ្រួសារនីមួយៗ នៅលោកខាងលិចបានស្គាល់។ ការអត់ធ្មត់ ក្នុងពេលដែលមានបញ្ហាប្រឈម ក្នុងការងារ និងជីវិត អាចមានការពិបាក។ បញ្ហានេះក៏កើតមានក្នុងជីវិតខាងវិញ្ញាណផងដែរ ព្រោះយើងត្រូវព្យាយាមលូតលាស់ ឲ្យមានលក្ខណៈកាន់តែដូចព្រះយេស៊ូវ។ បញ្ហាបានវាយប្រហារមកលើយើង ហើយយើងត្រូវការកម្លាំងពីព្រះ ដើម្បីស៊ូទ្រាំ។ សាវ័កយ៉ាកុបបានសរសេរថា “មានពរហើយ មនុស្សណាដែលស៊ូទ្រាំនឹងសេចក្តីល្បួង” (យ៉ាកុប ១:១២)។ ជួនកាល បញ្ហាដែលយើងជួបប្រទះ ជាការអន់ថយ ក្នុងទំនាក់ទំនង ឬបញ្ហាហិរញ្ញវត្ថុ ឬក៏សុខភាពជាដើម។ ជួនកាល យើងជួបការល្បួង ដែលរារាំងមិនឲ្យយើងថ្វាយព្រះកិត្តិនាមដល់ព្រះ តាមរយៈការរស់នៅរបស់យើង។ ប៉ុន្តែ ព្រះទ្រង់សន្យាថា នឹងប្រទានប្រាជ្ញាសម្រាប់ពេលបែបនេះ(ខ.៥) ហើយព្រះបង្គាប់យើងឲ្យទុកចិត្តព្រះអង្គ ខណៈពេលដែលព្រះអង្គបំពេញតម្រូវការយើង(ខ.៦)។ សរុបមក យើងនឹងរកឃើញព្រះពរពិតប្រាកដ(ខ.១២) ពេលណាយើងអនុញ្ញាតព្រះអង្គ ឲ្យជួយយើងអត់ទ្រាំ ក្នុងការថ្វាយព្រះកិត្តិនាមដល់ព្រះអង្គ តាមរយៈការរស់នៅរបស់យើង។—DAVE BRANON
តើអ្នកកំពុងជួបការល្បងលអ្វី សព្វថ្ងៃនេះ? តើធ្វើដូចម្តេច ឲ្យព្រះទ្រង់អាចជួយអ្នក ឲ្យរស់នៅអស់ពីចិត្ត ថ្វាយព្រះអង្គ?
ឱព្រះយេស៊ូវ យើងខ្ញុំបានរៀនសូត្រអំពីការអត់ទ្រាំ តាមរយៈគំរូរបស់ព្រះអង្គ។ សូមព្រះអង្គដឹកនាំជីវិតទូលបង្គំ តាមគំរូព្រះអង្គ ពេលណាទុក្ខលំបាក កើតមានក្នុងដំណើរជីវិតទូលបង្គំ។
For further study, read How to Read the Bible: The General Epistles at DiscoverySeries.org/Q0930.
គម្រោងអានព្រះគម្ពីរយៈពេល១ឆ្នាំ : ទំនុកដំកើង ១៤៦-១៤៧ និង ១កូរិនថូស ១៥:១-២៨