ក្តីសង្ឃឹមដ៏ស្ថិតស្ថេរ
ដោយXochitl Dixon
November 25, 2022
ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ និងគ្មានសេចក្តីស្លាប់ ឬសេចក្តីសោកសង្រេង ឬសេចក្តីយំទួញ ឬទុក្ខលំបាកណាទៀតឡើយ។ វិវរណៈ ២១:៤ មានពេលមួយ ក្រុមវេជ្ជបណ្ឌិតបានពិនិត្យសុខភាពរបស់សាឡូម៉ូន ជាក្មេងអាយុ៤ឆ្នាំរកឃើញថា គាត់មានជំងឺសាច់ដុំ ដែលធ្វើឲ្យសាច់ដុំគាត់អន់ខ្សោយបន្តិចម្តងៗ។ មួយឆ្នាំក្រោយមក គ្រូពេទ្យបានពិភាក្សាជាមួយក្រុមគ្រួសារគាត់ ដើម្បីឲ្យគាត់ប្រើរទេះរុញ។ តែសាឡូម៉ូនបានប្រកែកថា គាត់មិនចង់ប្រើរទេះរុញទេ។ ក្រុមគ្រួសារ និងមិត្តភក្តិទាំងឡាយក៏បានអធិស្ឋានឲ្យគាត់ ហើយក៏បានរ៉ៃអង្គាសប្រាក់ ដើម្បីស្វែងរកឆ្កែដែលគេបង្វឹកឲ្យជួយជនពិការ ដើម្បីជួយគាត់ឲ្យអាចផ្លាស់ទី ដោយមិនចាំបាច់ប្រើរទេះរុញ ឲ្យបានយូរបំផុតតាមដែលអាចធ្វើទៅបាន។ អង្គការផ្លូវសម្រាប់ជីវិត ដែលបានបង្វឹកសត្វឆ្កែរបស់ខ្ញុំឈ្មោះ ខូលី កំពុងតែរៀបចំសត្វឆ្កែឈ្មោះ វ៉ាហ្វ៊ល ឲ្យបម្រើសាឡូម៉ូន។ សាឡូម៉ូនបានទទួលយកការព្យាបាលនេះ ដែលជាញឹកញាប់ គាត់បានច្រៀងសរសើរដំកើងព្រះ តែថ្ងៃខ្លះ គាត់មានការពិបាកកាន់តែខ្លាំង។ ថ្ងៃមួយ សាឡូម៉ូនមានការពិបាកខ្លាំង តែគាត់បានឱបម្តាយគាត់ ហើយនិយាយថា “កូនសប្បាយចិត្តណាស់ ដែលនៅស្ថានសួគ៌ គ្មានជំងឺសាច់ដុំ”។ ការអន់ខ្សោយ ដែលបណ្តាលមកពីជំងឺ បានប៉ះពាល់មនុស្សទាំងអស់ ដែលមានជីវិតរស់នៅលើផែនដីនេះ។ ទោះជាយ៉ាងណាក៏ដោយ យើងមានក្តីសង្ឃឹមដ៏ស្ថិតស្ថេរ ដែលអាចជួយឲ្យយើងមានការប្តេជ្ញាចិត្តកាន់តែរឹងមាំ នៅថ្ងៃដ៏ពិបាក ដែលមិនអាចជៀសរួច។ ព្រះទ្រង់បានសន្យាថា នឹងប្រទាន “ផ្ទៃមេឃ និងផែនដីថ្មី” (វិវរណៈ ២១:១)។ ព្រះអាទិករ និងព្រះដ៏ទ្រទ្រង់ជីវិត នឹង “គង់នៅ” កណ្តាលចំណោមយើង(ខ.៣)។ ព្រះអង្គនឹងជូតអស់ទឹកភ្នែកចេញពីភ្នែកយើង និងគ្មានសេចក្តីស្លាប់ ឬសេចក្តីសោកសង្រេង ឬសេចក្តីយំទួញ ឬទុក្ខលំបាកណាទៀតឡើយ (ខ.៤)។ ពេលដែលយើងមានអារម្មណ៍ថា ការរង់ចាំហាក់ដូចជាមានរយៈពេល “យូរពេក” ឬ “ពិបាកខ្លាំងពេក” យើងនៅតែអាចមានសន្តិភាពក្នុងចិត្ត ដោយដឹងថា ព្រះបន្ទូលសន្យារបស់ព្រះនឹងបានសម្រេច។—XOCHITL DIXON
តើការទទួលស្គាល់ព្រះបន្ទូលសន្យារបស់ព្រះ អំពីការប្រទានផ្ទៃមេឃ និងផែនដីថ្មី បានកម្សាន្តចិត្តអ្នកយ៉ាងណាខ្លះ? តើអ្នកអាចលើកទឹកចិត្តមិត្តភក្តិដែលកំពុងមានការឈឺចាប់ដូចម្តេចខ្លះ ឲ្យមានក្តីសង្ឃឹមចំពោះព្រះបន្ទូលសន្យារបស់ព្រះអង្គ?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ សម្រាប់ការជួយពង្រឹងជំនឿទូលបង្គំ ដោយប្រទានសេចក្តីសង្ឃឹមដ៏ស្ថិតស្ថេរ និងច្បាស់លាស់។
For further study, read Prophetic Priorities: Wrestling with the End Times at DiscoverySeries.org
គម្រោងអានព្រះគម្ពីររយៈពេល១ឆ្នាំ : អេសេគាល ២៤-២៦ និង ១ពេត្រុស ២