ពេលណាអ្នកមានការភ័យខ្លាច
ដោយKaren Huang
December 26, 2022
ទេវតានៃព្រះយេហូវ៉ា ក៏លេចមកឲ្យលោកឃើញ ហើយប្រាប់ថា នែ អ្នកពូកែក្លាហានអើយ ព្រះយេហូវ៉ាទ្រង់គង់ជាមួយនឹងឯង។ ពួកចៅហ្វាយ ៦:១២ ខ្ញុំដល់ពេលត្រូវទៅពិនិត្យសុខភាព តាមការណាត់ជួបជាមួយគ្រូពេទ្យ ហើយទោះខ្ញុំមិនមានការព្រួយបារម្ភអំពីសុខភាពក៏ដោយ ក៏ខ្ញុំនៅតែមានអារម្មណ៍ខ្លាចមិនចង់ទៅពេទ្យ។ ខ្ញុំមានការភ័យខ្លាច ដោយសារខ្ញុំបាននឹកចាំ អំពីបទពិសោធន៍ដ៏អាក្រក់ ក្នុងការពិនិត្យសុខភាពតាំងពីយូរមកហើយ។ ខ្ញុំដឹងថា ព្រះទ្រង់គង់នៅជាមួយខ្ញុំ ហើយខ្ញុំត្រូវតែទុកចិត្តព្រះអង្គ តែខ្ញុំនៅតែមានការភ័យខ្លាច។ ពេលនោះ ខ្ញុំមានការខកចិត្ត ចំពោះខ្លួនឯង ដែលមានការភ័យខ្លាច និងខ្វះជំនឿ។ បើព្រះទ្រង់តែងតែគង់នៅក្បែរខ្ញុំ ហេតុអ្វីខ្ញុំនៅតែថប់បារម្ភ? បន្ទាប់មក នៅពេលព្រឹកថ្ងៃមួយ ខ្ញុំជឿថា ព្រះអង្គបានដឹកនាំខ្ញុំ ឲ្យមើលរឿងលោកគេឌាន។ ព្រះទ្រង់បានហៅលោកគេឌានថា “អ្នកប្រយុទ្ធដ៏ខ្លាំងពូកែ”(ពួកចៅហ្វាយ ៦:១២) តែគាត់មានការភ័យខ្លាច ក្នុងការបំពេញភារកិច្ចដឹកនាំទ័ពវាយលុកពួកម៉ាឌាន។ ទោះព្រះទ្រង់បានសន្យាថា នឹងគង់នៅជាមួយ និងប្រទានជ័យជម្នះក៏ដោយ ក៏លោកគេឌាននៅតែទូលសូមទីសម្គាល់ម្តងហើយម្តងទៀត(ខ.១៦-២៣,៣៦-៤០)។ ទោះជាយ៉ាងណាក៏ដោយ ព្រះទ្រង់មិនបានថ្កោលទោសលោកគេឌាន ដោយសារគាត់មានការភ័យខ្លាចនោះទេ។ ព្រះអង្គយល់ចិត្តគាត់។ នៅពេលយប់នៃការប្រយុទ្ធ ព្រះអង្គបានធានាលោកគេឌានម្តងទៀត អំពីជ័យជម្នះ ហើយថែមទាំងបានប្រទានគាត់ នូវវិធីជម្នះការភ័យខ្លាចផងដែរ(៧:១០-១១)។ ព្រះទ្រង់ក៏ជ្រាបអំពីការភ័យខ្លាចរបស់ខ្ញុំផងដែរ។ ការធានារបស់ព្រះអង្គ បាននាំឲ្យខ្ញុំមានចិត្តក្លាហាន ក្នុងការទុកចិត្តព្រះអង្គ។ ខ្ញុំបានស្គាល់សន្តិភាពរបស់ព្រះអង្គ ដោយដឹងថា ព្រះអង្គគង់នៅជាមួយខ្ញុំ ទោះខ្ញុំនឹងទទួលលទ្ធផលយ៉ាងណាក៏ដោយ។ នៅចុងបញ្ចប់ ការពិនិត្យសុខភាពរបស់ខ្ញុំមិនមានអ្វីគួរឲ្យភ័យខ្លាចទេ។ យើងមានព្រះដែលជ្រាបអំពីការភ័យខ្លាចរបស់យើង ហើយធានាយើង តាមរយៈព្រះគម្ពីរ និងព្រះវិញ្ញាណបរិសុទ្ធ(ទំនុកដំកើង ២៣:៤ យ៉ូហាន ១៤:១៦-១៧)។ ចូរយើងថ្វាយបង្គំព្រះអង្គ ដោយការអរព្រះគុណ ដូចលោកគេឌានផងដែរ(ពួកចៅហ្វាយ ៧:១៥)។—KAREN HUANG តើមានការភ័យខ្លាច ឬបញ្ហាប្រឈមអ្វី ដែលអ្នកកំពុងជួបប្រទះ? តើអ្នកមានការលើកទឹកចិត្តយ៉ាងណា ពេលដែលបានដឹងថា ព្រះគង់នៅជាមួយ និងសព្វព្រះទ័យនឹងជួយអ្នក? ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលមិនបានថ្កោលទោសទូលបង្គំ ដោយសារទូលបង្គំមានការភ័យខ្លាច តែព្រះអង្គតែងតែធានាទូលបង្គំជាថ្មីម្តងទៀតថា ព្រះអង្គគង់នៅជាមួយទូលបង្គំ។ សូមព្រះអង្គជួយទូលបង្គំឲ្យងាកទៅរកព្រះអង្គ ពេលណាទូលបង្គំមានការភ័យខ្លាច ហើយរៀនទុកចិត្តព្រះអង្គ។ For further study, read Clinging to Hope in the Storm at DiscoverySeries.org/Q0746. គម្រោងអានព្រះគម្ពីររយៈពេល១ឆ្នាំ : ហាកាយ ១-២ និង វិវរណៈ ១៧