ការមើលឃើញព្រះយេស៊ូវ
ដោយKenneth Petersen
February 8, 2023
អ្នកណាដែលឃើញខ្ញុំ នោះក៏បានឃើញព្រះវរបិតាដែរ។ យ៉ូហាន ១៤:៩ លេអូ(Leo) ជាក្មេងតូចអាយុ៤ខែ ដែលមិនដែលបានឃើញឪពុកម្តាយរបស់គាត់ឡើយ។ គាត់មានបញ្ហាភ្នែកពីកំណើត ដែលធ្វើឲ្យគាត់ព្រិលភ្នែក មិនអាចមើលឃើញអ្វីច្បាស់។ គាត់ហាក់ដូចជាកំពុងរស់នៅ ក្នុងកន្លែងចុះអ័ភ្រយ៉ាងក្រាស់ជានិច្ច។ តែពេទ្យភ្នែកក៏បានកាត់កញ្ចក់វ៉ែនតាពិសេសមួយឈុតឲ្យគាត់។ ក្រោយមក ឪពុករបស់លេអូក៏បានបង្ហោះវីដេអូមួយ ដែលក្នុងនោះ គេឃើញម្តាយគាត់បំពាក់វ៉ែនតាពីលើភ្នែកគាត់ ជាលើកដំបូង។ គេឃើញភ្នែកគាត់មានការផ្ដោតបន្តិចម្តងៗ។ ស្នាមញញឹមស្រស់ក៏បានលេចឡើង នៅលើផ្ទៃមុខគាត់ ខណៈពេលដែលគាត់បានឃើញម្តាយគាត់យ៉ាងច្បាស់ជាលើកដំបូង។ នៅពេលនោះ ក្មេងតូចលេអូ អាចមើលឃើញច្បាស់ហើយ។ កណ្ឌគម្ពីរយ៉ូហានបានចែងអំពីការសន្ទនារវាងព្រះយេស៊ូវ ជាមួយពួកសិស្សព្រះអង្គ។ កាលនោះ សាវ័កភីលីពបានទូលសូម ព្រះអង្គថា “ព្រះអម្ចាស់អើយ សូមបង្ហាញព្រះវរបិតាឲ្យយើងខ្ញុំឃើញផង”(យ៉ូហាន ១៤:៨)។ ទោះពួកសាវ័កបានចំណាយពេលច្រើន ជាមួយព្រះយេស៊ូវហើយក៏ដោយ ក៏ពួកគេនៅតែមិនអាចស្គាល់ព្រះអង្គ ដែលកំពុងគង់នៅពីមុខពួកគេ។ ព្រះអង្គក៏បានឆ្លើយតបថា “អ្នកណាដែលឃើញខ្ញុំ នោះក៏បានឃើញព្រះវរបិតាដែរ” យ៉ូហាន ១៤:៩។ មុននោះ ព្រះអង្គក៏បានមានបន្ទូលផងដែរថា “ខ្ញុំជាផ្លូវ ជាសេចក្តីពិត និងជាជីវិត”(ខ.៦)។ ព្រះអង្គមានបន្ទូល៧ដង ដោយប្រើពាក្យ “ខ្ញុំគឺជា”។ ហើយពេលនោះ ព្រះអង្គប្រើពាក្យនេះជាលើកទី៦ហើយ។ ត្រង់ចំណុចនេះ ព្រះយេស៊ូវកំពុងប្រាប់យើង ឲ្យឆ្លុះមើលតាមកញ្ចក់នៃព្រះបន្ទូល “ខ្ញុំគឺជា” ដើម្បីឲ្យបានឃើញច្បាស់ថាព្រះអង្គជានរណា គឺព្រះអង្គជាព្រះ។ យើងក៏មិនខុសពីពួកសាវ័កប៉ុន្មានដែរ។ ក្នុងពេលដ៏ពិបាក យើងមានការតស៊ូ ហើយភ្នែកខាងវិញ្ញាណរបស់យើងក៏បានព្រិល។ យើងមិនបានផ្តោតចក្ខុយើង ទៅលើការអ្វីដែលព្រះអង្គបានធ្វើ និងអាចធ្វើ។ ពេលដែលក្មេងតូចលេអូបានពាក់វ៉ែនតាពិសេស គាត់ក៏អាចមើលឃើញឪពុកម្តាយគាត់ច្បាស់។ យើងប្រហែលជាត្រូវការវ៉ែនតាខាងវិញ្ញាណមកពីព្រះអង្គ ដើម្បីឲ្យយើងអាចមើលឲ្យដឹងច្បាស់ថា ព្រះយេស៊ូវជានរណា។—KENNETH PETERSEN
តើមានកត្តាអ្វីខ្លះ ដែលធ្វើឲ្យភ្នែករបស់អ្នកមើលឃើញព្រះយេស៊ូវព្រាលៗ? តើធ្វើដូចម្តេចឲ្យអ្នកអាចមើលឃើញព្រះអង្គបានច្បាស់?
ឱព្រះយេស៊ូវសូមព្រះអង្គជួយទូលបង្គំ ឲ្យមើលទៅព្រះអង្គ។ សូមព្រះអង្គបង្ហាញឲ្យទូលបង្គំឃើញផ្លូវព្រះអង្គច្បាស់។
គម្រោងអានព្រះគម្ពីររយៈពេល១ឆ្នាំ : លេវីវិន័យ ៦-៧ និង ម៉ាថាយ ២៥:១-៣០