តើឯកោ ហើយអស់សង្ឃឹមឬ?
ដោយAnne Cetas
March 6, 2023
ព្រះទ្រង់ឮសំឡេងកូនជំទង់នោះ។ លោកុប្បត្តិ ២១:១៧ គ្រួសាររបស់អ្នកស្រីស៊ូ(Sue) បានបែកបាក់ នៅចំពោះមុខគាត់។ ស្វាមីគាត់ស្រាប់តែចាកចោលផ្ទះ ហើយគាត់ និងកូនៗរបស់គាត់មានការភ័ន្តភាំង ហើយខឹង។ គាត់ក៏បានបបួលស្វាមីគាត់ ឲ្យទៅជួបអ្នកប្រឹក្សាយោបល់អាពាហ៍ពិពាហ៍ ជាមួយគាត់ តែស្វាមីគាត់មិនព្រម ដោយអះអាងថា គាត់ជាអ្នកបង្កបញ្ហា។ ភាពតក់ស្លុត និងភាពអស់សង្ឃឹមក៏បានកើតមានក្នុងចិត្តគាត់ ពេលដែលគាត់បានដឹងថា ស្វាមីគាត់មិនអាចវិលមកវិញបានទេ។ តើគាត់អាចចិញ្ចឹមកូន តែម្នាក់ឯងបានទេ? នាងហាកាជាអ្នកបម្រើលោកអ័ប្រាហាំ និងនាងសារ៉ា ក៏ធ្លាប់មានអារម្មណ៍ដូចនេះផងដែរ។ នាងសារ៉ាមានចិត្តអន្ទះសា ក្នុងការរង់ចាំព្រះទ្រង់ប្រទានកូនប្រុសម្នាក់ តាមព្រះបន្ទូលសន្យា(លោកុប្បត្តិ ១២,១៥) ដូចនេះ នាងក៏បានឲ្យស្វាមីនាងរួមដំណេកជាមួយនាងហាកា ហើយហាកាក៏បានបង្កើតអ៊ីស្មាអែល(១៦:១-៤,១៥)។ ទោះជាយ៉ាងណាក៏ដោយ ពេលដែលព្រះទ្រង់សម្រេចព្រះបន្ទូលសន្យា ដោយនាងសារ៉ាបង្កើតបានអ៊ីសាក ភាពតានតឹងនៅក្នុងគ្រួសារក៏បានផ្ទុះឡើង ដែលបណ្តាលឲ្យលោកអ័ប្រាហាំបង្ខំចិត្ត ឲ្យនាងហាកាចាកចេញទៅជាមួយកូនប្រុស ដោយមានតែទឹក និងអាហារខ្លះៗប៉ុណ្ណោះ(២១:៨-២១)។ តើនាងមានអារម្មណ៍អស់សង្ឃឹមយ៉ាងណា នៅពេលនោះ? មិនយូរប៉ុន្មាន ពួកគេក៏បានអស់អាហារបរិភោគ ក្នុងវាលរហោស្ថាន។ នាងហាកាមិនដឹងថា ត្រូវធ្វើដូចម្តេច ហើយមិនចង់ឃើញកូនប្រុសនាងស្លាប់ នាងក៏បានដាក់គាត់ នៅក្រោមគុម្ពោតព្រៃ ហើយក៏បានដើរចេញទៅ។ អ្នកទាំងពីរក៏បានចាប់ផ្តើមទួញយំ។ តែព្រះទ្រង់ស្តាប់ឮកូននាងយំ(ខ.១៧)។ ព្រះអង្គស្តាប់ឮសម្រែករបស់ពួកគេ ហើយក៏បានបំពេញតម្រូវការពួកគេ ហើយគង់នៅជាមួយផងដែរ។ ភាពអស់សង្ឃឹម នៅពេលដែលយើងមានអារម្មណ៍ឯកោ អាចបណ្តាលឲ្យយើងស្រែករកព្រះ។ យើងមានការកម្សាន្តចិត្ត ពេលដែលបានដឹងថា ក្នុងពេលនោះ ក៏ដូចជាពេញមួយជីវិតយើង ព្រះអង្គតែងតែស្តាប់ឮយើង ផ្គត់ផ្គង់យើង និងគង់នៅជាមួយយើងជានិច្ច។—ANNE CETAS
តើព្រះទ្រង់បានផ្គត់ផ្គង់អ្នកដូចម្តេចខ្លះ ពេលអ្នកមានអារម្មណ៍ឯកោ? តើអ្នកបានឆ្លើយតបដូចម្តេចខ្លះ ចំពោះព្រះអង្គ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលមិនបានទុកឲ្យទូលបង្គំដើរតែម្នាក់ឯង។ សូមព្រះអង្គជួយទូលបង្គំ ក្នុងពេលដែលទូលបង្គំអស់សង្ឃឹម។
To learn more about speaking to God, visit ODBU.org/SF120.
គម្រោងអានព្រះគម្ពីររយៈពេល១ឆ្នាំ : ចោទិយកថា ១-២ និង ម៉ាកុស ១០:១-៣១