ព្រះអង្គអនុញ្ញាតឲ្យសម្រាក
ដោយElisa Morgan
March 22, 2023
លុះដល់ថ្ងៃទី៧ ការដែលព្រះទ្រង់ធ្វើ នោះបានហើយជាស្រេច ទ្រង់ក៏ឈប់ផ្អាកសំរាកនៅថ្ងៃទី៧នោះ…។ លោកុប្បត្តិ ២:២ មានពេលមួយ ខ្ញុំ និងមិត្តភក្ដិខ្ញុំឈ្មោះ ស៊ូហ្ស៊ី(Soozi) បានអង្គុយលេងនៅលើថ្មធំមួយ មើលពពុះទឹកខ្ជោលឡើងទៅលើ ដោយសារការរុញច្រានរបស់រលកទឹកដែលមានរាងកោង។ ស៊ូហ្ស៊ីបានមើលទៅទឹករលកបក់ប៉ប្រាស់ថ្មម្តងហើយម្តងទៀត ហើយក៏បានប្រាប់ខ្ញុំថា គាត់ស្រឡាញ់សមុទ្រណាស់ ព្រោះវាមានចលនាជានិច្ច ដើម្បីឲ្យគាត់អាចសម្រាក។ វាជារឿងដែលគួរឲ្យចាប់អារម្មណ៍ណាស់ ដែលអ្នកខ្លះមានអារម្មណ៍ថា ពួកគេត្រូវការ “ការអនុញ្ញាត” ឲ្យផ្អាកការងារ ដើម្បីសម្រាក? នេះជាអ្វីដែលព្រះដ៏ល្អនៃយើងបានប្រទានមកយើងហើយ! ព្រះទ្រង់បានចំណាយពេល៦ថ្ងៃ ដើម្បីបង្កើតផែនដីឲ្យមានរូបរាងឡើង បង្កើតពន្លឺ ដី រុក្ខជាតិ សត្វ និងមនុស្ស។ បន្ទាប់មក នៅថ្ងៃទី៧ ព្រះទ្រង់បានសម្រាក(លោកុប្បត្តិ ១:៣១-២:២)។ ក្នុងក្រឹត្យវិន័យ១០ប្រការ ព្រះអង្គក៏បានប្រទានច្បាប់ ដើម្បីឲ្យយើងរស់នៅឲ្យបានល្អ ដើម្បីថ្វាយព្រះកិត្តិនាមដល់ព្រះអង្គ(និក្ខមនំ ២០:៣-១៧) ដោយរាប់បញ្ចូលទាំងការបង្គាប់ ឲ្យនឹកចាំថ្ងៃឈប់សម្រាក(ខ.៨-១១)។ ក្នុងព្រះគម្ពីរសញ្ញាថ្មី យើងឃើញព្រះយេស៊ូវប្រោសអ្នកជំងឺឲ្យជា(ម៉ាកុស ១:២៩-៣៤) ហើយបន្ទាប់មក នៅពេលព្រឹកព្រលឹម ព្រះអង្គក៏បានយាងទៅរកកន្លែងស្ងប់ស្ងាត់ ដើម្បីអធិស្ឋាន(ខ.៣៥)។ ព្រះនៃយើងទ្រង់បានធ្វើការ និងសម្រាក តាមបំណងព្រះទ័យព្រះអង្គ។ នៅជុំវិញខ្លួនយើង មានសុទ្ធតែស្នាព្រះហស្តព្រះអង្គ ដែលបានរំឭកយើងជានិច្ច អំពីកិច្ចការដែលព្រះអង្គបានធ្វើ និងអំពីការអញ្ជើញរបស់ព្រះអង្គ ឲ្យយើងសម្រាក។ ព្រះទ្រង់បានបង្កើតឲ្យមានរដូវខុសៗគ្នា សម្រាប់ឲ្យយើងធ្វើការងារ និងសម្រាកលំហែរ។ ហើយក៏បានបង្កើតពេលព្រឹក ពេលថ្ងៃរសៀល ពេលល្ងាច និងពេលយប់។ ព្រះទ្រង់បានរៀបចំជីវិតយើងមក សម្រាប់ឲ្យធ្វើការ និងសម្រាក ដោយអនុញ្ញាតឲ្យយើងមានពេលធ្វើការ និងពេលសម្រាក។—ELISA MORGAN
តើអ្នកអាចថ្លឹងថ្លែងពេលធ្វើការ និងពេលសម្រាកដូចម្តេចខ្លះ ឲ្យមានតុល្យភាព? តើអ្នកអាចឈប់បង្អង់ដូចម្តេចខ្លះ ជារៀងរាល់ថ្ងៃ ដើម្បីជញ្ជឹងគិតអំពីគំរូនៃការធ្វើការ និងការសម្រាករបស់ព្រះអង្គ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានបង្កើតទូលបង្គំ ឲ្យរស់នៅ ដើម្បីផ្គាប់ព្រះទ័យព្រះអង្គ ដោយការធ្វើការ និងការសម្រាក ដើម្បីថ្វាយសិរីល្អរបស់ព្រះអង្គ និងដើម្បីប្រយោជន៍ទូលបង្គំ។
គម្រោងអានព្រះគម្ពីររយៈពេល១ឆ្នាំ : យ៉ូស្វេ ១០-១២ និង លូកា ១:៣៩-៥៦