មិនភ្លេចសរសើរដំកើងព្រះអង្គ
ដោយJames Banks
April 16, 2023
ខ្ញុំនឹងថ្លែងប្រាប់ពីសេចក្តីសប្បុរសរបស់ព្រះយេហូវ៉ា។ អេសាយ ៦៣:៧ កាលពួកជំនុំរបស់ខ្ញុំរួមគ្នាសង់អគារដំបូងបំផុតរបស់យើង យើងក៏បានសរសេរពាក្យអរព្រះគុណ នៅលើជញ្ជាំង និងកំរាលឥដ្ឋ មុនពេលការសាងសង់ផ្នែកខាងក្នុងអគារបានបញ្ចប់។ បើសិនជាយើងដកជញ្ជាំងម្នាងសិលាចេញ យើងនឹងឃើញពាក្យពេចន៍ និងខគម្ពីរជាច្រើន ដែលពួកគេបានសរសេរនៅក្បែរសេចក្តីអធិស្ឋាន ដែលមានពាក្យសរសើរដំកើងថា “ព្រះអង្គល្អណាស់!” យើងបានរក្សាសំណេរទាំងនោះ ទុកជាភស្តុតាងដល់មនុស្សជំនាន់ក្រោយ ដែលបង្ហាញថា ទោះយើងជួបបញ្ហាប្រឈមអ្វីក៏ដោយ ព្រះទ្រង់នៅតែមានព្រះទ័យសប្បុរស និងថែរក្សាយើងជានិច្ច។ យើងចាំបាច់ត្រូវចងចាំ ការអ្វីដែលព្រះទ្រង់បានធ្វើសម្រាប់យើង និងប្រាប់អ្នកដទៃឲ្យបានដឹងផងដែរ។ គឺដូចដែលបទគម្ពីរអេសាយបានចែងថា “ខ្ញុំនឹងថ្លែងប្រាប់ពីសេចក្តីសប្បុរសរបស់ព្រះយេហូវ៉ា ហើយពីសេចក្តីដែលគួរសរសើររបស់ទ្រង់ តាមគ្រប់ទាំងសេចក្តីដែលព្រះយេហូវ៉ាទ្រង់បានប្រោសដល់យើងរាល់គ្នា”(អេសាយ ៦៣:៧)។ ក្រោយមក ហោរាអេសាយក៏បានរំឭកអំពីសេចក្តីអាណិត ដែលព្រះអង្គមានចំពោះរាស្រ្តព្រះអង្គ ក្នុងប្រវត្តិសាស្រ្ត ហើយថែមទាំងបានប្រាប់ពួកគេថា “ក្នុងគ្រប់ទាំងសេចក្តីទុក្ខវេទនារបស់គេ នោះទ្រង់ក៏រងទុក្ខដែរ”(ខ.៩)។ ប៉ុន្តែ បើអ្នកបន្តអានបទគម្ពីរនេះឲ្យបានមួយជំពូក អ្នកនឹងកត់សំគាល់ឃើញថា ពួកអ៊ីស្រាអែលបានជួបបញ្ហាម្តងទៀត ហើយលោកហោរាចង់ឲ្យព្រះទ្រង់ជួយពួកគេសាជាថ្មី។ ការនឹកចាំអំពីសេចក្តីសប្បុរសរបស់ព្រះ ពីអតីតកាលអាចជួយលើកទឹកចិត្តយើង ពេលណាយើងជួបទុក្ខលំបាក។ រដូវកាលដែលមានបញ្ហាប្រឈម កើតមានជាធម្មតា តែចារិកលក្ខណៈដ៏ស្មោះត្រង់របស់ព្រះអង្គ មិនដែលប្រែប្រួលឡើយ។ ពេលណាយើងងាកបែរមករកព្រះអង្គ ដោយចិត្តដែលដឹងគុណ ដោយនឹកចាំការអ្វីដែលព្រះអង្គបានធ្វើ យើងនឹងបាននឹកចាំជាថ្មីម្តងទៀតថា ព្រះអង្គតែងតែសក្តិសមនឹងឲ្យយើងសរសើរជានិច្ច។—JAMES BANKS
តើព្រះទ្រង់បានបង្ហាញសេចក្តីសប្បុរសដូចម្តេចខ្លះ ដល់អ្នក កាលពីមុន? តើការសរសើរដំកើងព្រះអង្គ ជួយអ្នកយ៉ាងណាខ្លះ ពេលអ្នកកំពុងឆ្លងកាត់ពេលដ៏ពិបាក?
ឱព្រះវរបិតា ព្រះអង្គមានអំណាចគ្រប់គ្រងមកលើស្នាព្រះហស្តទាំងអស់។ ទូលបង្គំសូមសរសើរដំកើងព្រះអង្គ ព្រោះសេចក្តីល្អរបស់ព្រះអង្គមិនប្រែប្រួលឡើង ហើយព្រះអង្គតែងតែគង់នៅជាមួយទូលបង្គំជានិច្ច។
For further study, read Worshipping God Means More than Singing at DiscoverySeries.org.
គម្រោងអានព្រះគម្ពីររយៈពេល១ឆ្នាំ: ២សាំយ៉ូអែល ១-២ និង លូកា ១៤:១-២៤