រូបព្រះដែលគេបានលួច
ដោយTim Gustafson
May 9, 2023
ពីព្រោះឯងមានអំណាចចំពោះព្រះ ហើយនឹងមនុស្ស ក៏បានឈ្នះផង។ លោកុប្បត្តិ ៣២:២៨ មានរូបចម្លាក់មួយ ជារូបព្រះប្រចាំគ្រួសារ ត្រូវគេលួចពីស្រ្តីម្នាក់ ឈ្មោះអេឃូវ៉ា(Ekuwa)។ នាងក៏បានទៅប្តឹងប៉ូលិស។ ប៉ូលិសក៏បានអញ្ជើញនាងឲ្យទៅមើលរូបចម្លាក់មួយ ដែលពួកគេបានរកឃើញ។ ពួកគេសួរនាងថា “តើនេះជារូបចម្លាក់របស់អ្នកឬ?” នាងក៏បានឆ្លើយយ៉ាងសោកសៅថា “ទេ ព្រះរបស់ខ្ញុំធំ និងស្អាតជាងនេះ”។ មនុស្សជាតិបានព្យាយាមឆ្លាក់រូបព្រះ ទៅតាមការយល់ដឹងរបស់ខ្លួន ដោយសង្ឃឹមថា ព្រះដែលមនុស្សបង្កើត នឹងការពារពួកគេ។ ហេតុនេះហើយបានជាភរិយារបស់លោកយ៉ាកុប គឺនាងរ៉ាជែលបានលួចរូបព្រះប្រចាំគ្រួសាររបស់ឪពុកនាង ខណៈពេលដែលពួកគេគេចខ្លួន(លោកុប្បត្តិ ៣១:១៩)។ តែព្រះទ្រង់បានដាក់ព្រះហស្តព្រះអង្គ នៅលើលោកយ៉ាកុប ទោះនាងកំពុងលាក់រូបព្រះក្នុងជំរុំរបស់គាត់ក៏ដោយ(ខ.៣៤)។ ក្រោយមក នៅក្នុងការធ្វើដំណើរដដែលនោះ លោកយ៉ាកុបក៏បានបោកចំបាប់ជាមួយ “បុរសម្នាក់”(៣២:២៤)។ គាត់ប្រាកដជាបានយល់ថា គូរប្រកួតរបស់គាត់ មិនមែនជាមនុស្សធម្មតាទេ ព្រោះនៅពេលថ្ងៃរះ លោកយ៉ាកុបក៏បានទទូចថា “ខ្ញុំមិនឲ្យលោកទៅទេ ទាល់តែបានឲ្យពរដល់ខ្ញុំសិន”(ខ.២៦)។ បុរសនោះក៏បានប្តូរឈ្មោះគាត់ ទៅជា អ៊ីស្រាអែលវិញ (មានន័យថា “បោកចំបាប់ជាមួយព្រះ”) ហើយក៏បានឲ្យពរគាត់(ខ.២៨-២៩)។ លោកយ៉ាកុបក៏បានហៅកន្លែងនោះថា ព្នីអែល(មានន័យថា “ព្រះភ័ក្ត្រព្រះ”) ដ្បិតគាត់នឹកថា “អញបានឃើញព្រះនៅប្រទល់មុខ ហើយជីវិតអញបានគង់វង្សនៅ”(ខ.៣០)។ ព្រះអង្គជាព្រះពិតដែលធំជាង និងស្រស់ស្អាតជាងរូបព្រះ ដែលអ្នកស្រីអេគូវ៉ាអាចស្រមៃទៅទៀត។ គេមិនអាចឆ្លាក់រូបព្រះអង្គ មិនអាចលួច ឬលាក់ព្រះអង្គបានទេ។ តែយើងអាចចូលទៅរកព្រះអង្គ គឺដូចដែលលោកយ៉ាកុបក៏បានដឹងដែរ កាលយប់នោះ។ ព្រះយេស៊ូវបង្រៀនសិស្សព្រះអង្គ ឲ្យហៅព្រះរបស់លោកយ៉ាកុបថា “ឱព្រះវរបិតា ដែលគង់នៅស្ថានសួគ៌”(ម៉ាថាយ ៦:៩)។—TIM GUSTAFSON
តើអ្នកអាចពិពណ៌នាថា ព្រះទ្រង់មានលក្ខណៈដូចម្តេចខ្លះ? តើការយល់ដឹងរបស់អ្នកអំពីព្រះអង្គមានកំរិតប៉ុណ្ណា?
ឱព្រះវរបិតា ដែលគង់នៅស្ថានសួគ៌ សូមព្រះអង្គអត់ទោសឲ្យទូលបង្គំ ដែលមិនបានទទួលស្គាល់ភាពធំប្រសើររបស់ព្រះអង្គ។ សូមព្រះអង្គជួយទូលបង្គំឲ្យឱបក្រសោបយកការពិតដែលថា ព្រះអង្គជានរណា។
គម្រោងអានព្រះគម្ពីររយៈ១ឆ្នាំ : ២ពង្សាវតាក្សត្រ ១០-១២ និង យ៉ូហាន ១:២៩-៥១