សេចក្តីមួយដែលពិតជាសំខាន់
ដោយAmy Boucher Pye
November 15, 2023
លូកា ១០:៣៨-៤២ នាងព្រួយចិត្តខំប្រឹងរៀបចំធ្វើអីច្រើនម៉្លេះ មានសេចក្តីតែ១ទេ ដែលសំរាប់ត្រូវការ។ លូកា ១០:៤១-៤២ ក្នុងការធ្វើដំណើរប្រកបគ្នា នៅពេលចុងសប្តាហ៍ កាលពីខែមីនា ខ្ញុំបានដឹកនាំការសិក្សាព្រះបន្ទូលអំពីរឿងនាងម៉ារា និងនាងម៉ាថា ជាបងប្អូនរបស់លោកឡាសា(យ៉ូហាន ១១:៥)។ អ្នកទាំងបីជាមិត្តជិតស្និទ្ធរបស់ព្រះយេស៊ូវ។ កាលនោះ យើងបានជួបជុំគ្នា ក្នុងតំបន់ដាច់ស្រយាលមួយ នៅតាមបណ្តោយឆ្នេរសមុទ្រប្រទេសអង់គ្លេស។ បន្ទាប់ពីបានរៀនព្រះគម្ពីរជាមួយគ្នាហើយ អ្នកចូលរួមជាច្រើនបានចែកចាយថា ការចំណាយពេលជាមួយគ្នាប៉ុន្មានថ្ងៃនោះ ពួកគេបានរៀនអង្គុយ នៅទាបព្រះបាទព្រះយេស៊ូវ តាមគំរូនាងម៉ារា។ ពួកគេចង់ចង់ដេញតាមសេចក្តីមួយដែលពិតជាសំខាន់ (លូកា ១០:៤២) គឺដូចដែលព្រះយេស៊ូវបានប្រាប់នាងម៉ាថា ដោយសេចក្តីស្រឡាញ់ ឲ្យដេញតាមសេចក្តីនោះ ដែលជាការចូលទៅជិត ហើយរៀនសូត្រពីព្រះអង្គ។ កាលព្រះយេស៊ូវបានទៅលេងផ្ទះនាងម៉ារា នាងម៉ាថា និងលោកឡាសា នាងម៉ាថាមិនបានដឹងជាមុនថា ព្រះអង្គនឹងយាងមកទេ ដូចនេះ យើងអាចដឹងថា ហេតុអ្វីនាងមិនសប្បាយចិត្តចំពោះនាងម៉ារា ដែលមិនបានជួយរៀបចំម្ហូបអាហារថ្វាយព្រះអង្គ និងមិត្តសំឡាញ់របស់ព្រះអង្គ។ តែនាងបានមើលរំលងសេចក្តីដែលពិតជាសំខាន់ គឺការរៀនព្រះបន្ទូលព្រះអង្គ។ ព្រះគ្រីស្ទមិនបានស្តីបន្ទោសនាង ដោយសារនាងចង់បម្រើព្រះអង្គនោះទេ តែបានរំឭកនាងថា នាងបានខកខានមិនបានទទួលសេចក្តីអ្វីដែលសំខាន់បំផុតនៅថ្ងៃនោះ។ យើងអាចឈប់បង្អង់ ហើយរំឭកខ្លួនឯង អំពីសេចក្តីដែលពិតជាសំខាន់ក្នុងជីវិត ពេលណាមានការរំខានដែលធ្វើឲ្យយើងមានអារម្មណ៍មិនល្អ ឬមានអារម្មណ៍ថាពិបាកពេក ដោយសារមានកិច្ចការជាច្រើនដែលយើងចង់ធ្វើឲ្យជោគជ័យ។ ពេលណាយើងបន្ថយល្បឿន ដោយស្រមៃថា យើងកំពុងអង្គុយនៅទៀបព្រះបាទព្រះយេស៊ូវ យើងអាចទូលសូមព្រះអង្គបំពេញយើង ដោយក្តីស្រឡាញ់ និងជីវិត។ យើងអាចអរសប្បាយ ដោយចាំថា យើងជាសិស្សជាទីស្រឡាញ់របស់ព្រះអង្គ។—Amy Boucher Pye
តើមានការរំខានអ្វី ដែលរារាំងអ្នកមិនឲ្យទទួលព្រះយេស៊ូវ? តើអ្នកអាចអង្គុយនៅទៀបព្រះបាទព្រះអង្គ ដូចម្តេចខ្លះ នៅថ្ងៃនេះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការចូលចិត្តបង្រៀនទូលបង្គំ តាមរបៀបរបស់ព្រះអង្គ។ សូមព្រះអង្គជួយទូលបង្គំ កុំឲ្យមានការរំខាន ដោយសារសកម្មភាពប្រចាំថ្ងៃ តែឲ្យផ្ដោតចិត្តទៅលើព្រះអង្គវិញ។
គម្រោងអានព្រះគម្ពីររយៈពេល១ឆ្នាំ : អេសេគាល ១-២ និង ហេព្រើរ ១១:១-១៩