ការធ្វើដំណើរដែលមានតម្លៃបំផុត
ដោយAnne Cetas
November 17, 2023
អេភេសូរ ១:៣-១៤ ដោយទ្រង់បានតម្រូវយើងទុកជាមុន តាមដំរិះសំរេចរបស់ព្រះ ...បានសំរាប់នឹងសរសើរដល់សិរីល្អទ្រង់។ អេភេសូរ ១:១១-១២ មានពេលមួយយុវនារីម្នាក់បានប្រាប់ខ្ញុំថា “ជំនឿលើព្រះគ្រីស្ទគួរឲ្យធុញទ្រាន់ណាស់ ខ្ញុំមិនចូលចិត្តទេ។ ខ្ញុំឲ្យតម្លៃមកលើការដើរផ្សងព្រេងជាង។ ព្រោះការរស់នៅដូចនេះ ទើបមានតម្លៃ”។ ខ្ញុំមានអារម្មណ៍សោកស្តាយ ពេលបានដឹងថា នាងមិនចង់ស្គាល់ក្តីអំណរ និងភាពរំភើបរីករាយដ៏អស្ចារ្យ ដែលកើតចេញពីការប្រកបជាមួយព្រះយេស៊ូវ ជាការធ្វើដំណើរដែលល្អលើសការធ្វើដំណើរផ្សេងទៀត។ ខ្ញុំក៏បានចែកចាយដល់គាត់ អំពីព្រះយេស៊ូវ ដោយអំណរ និងអំពីជីវិតពិត ដែលនាងអាចរកឃើញក្នុងព្រះអង្គ។ ពាក្យសម្តីតែម្យ៉ាង មិនមានភាពគ្រប់គ្រាន់ ដើម្បីពិពណ៌នា អំពីការធ្វើដំណើរខាងវិញ្ញាណ នៅក្នុងការស្គាល់ និងដើរជាមួយព្រះយេស៊ូវ ជាព្រះរាជបុត្រានៃព្រះបានឡើយ។ តែក្នុងបទគម្ពីរអេភេសូរ ជំពូក១ សាវ័កប៉ុលបានធ្វើការបកស្រាយខ្លី តែមានអំណាច អំពីការរស់នៅជាមួយព្រះអង្គ។ ព្រះទ្រង់បានប្រទានយើងនូវព្រះពរខាងវិញ្ញាណ ដែលមកពីស្ថានសួគ៌ដោយផ្ទាល់(ខ.៣) សេចក្តីបរិសុទ្ធ និងឥតកន្លែងបន្ទោសបាន នៅក្នុងព្រះនេត្រព្រះអង្គ(ខ.៤) និងការទទួលយើងធ្វើជាកូនចិញ្ចឹម ក្នុងមហាគ្រួសារព្រះអង្គ(ខ.៥)។ ព្រះអង្គបានប្រទានយើងនូវអំណោយដ៏ហូរហៀរនៃការអត់ទោសបាប និងព្រះគុណ(ខ.៧-៨) ការយល់អំពីអាថ៌កំបាំងនៃបំណងព្រះទ័យព្រះអង្គ(ខ.៩) និងគោលបំណងថ្មីនៃការរស់នៅ “ដើម្បីសរសើរដល់សិរីល្អព្រះអង្គ”(ខ.១២)។ ព្រះវិញ្ញាណបរិសុទ្ធគង់នៅក្នុងយើង ដើម្បីប្រទានព្រះចេស្ដា និងដឹកនាំយើង(ខ.១៣) ហើយព្រះអង្គធានាថា យើងនឹងបាននៅក្នុងព្រះវត្តមានព្រះអង្គអស់កល្បជានិច្ច(ខ.១៤)។ ពេលណាព្រះយេស៊ូវគ្រីស្ទយាងចូលគង់ក្នុងជីវិតយើង យើងនឹងបានដឹងថា ការស្គាល់ព្រះអង្គកាន់តែច្បាស់ និងការដើរតាមព្រះអង្គយ៉ាងជិតស្និទ្ធ គឺជាការធ្វើដំណើរដ៏ប្រសើរបំផុត។ ចូរយើងស្វែងរកជីវិតពិត ក្នុងព្រះអង្គក្នុងពេលបច្ចុប្បន្ន និងជារៀងរាល់ថ្ងៃ។—Anne Cetas
ចូរពិពណ៌នា អំពីជីវិតដែលស្គាល់ និងដើរជាមួយព្រះយេស៊ូវ? តើព្រះអម្ចាស់សព្វព្រះទ័យឲ្យអ្នកចែកចាយអំពីជីវិតនេះ ដល់នរណាខ្លះ?
ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការស្រឡាញ់ទូលបង្គំ និងតែងតែដើរជាប់ជាមួយទូលបង្គំ។ ព្រះអង្គបានប្រទានពរទូលបង្គំលើសក្តីស្រមៃរបស់ទូលបង្គំ។ សូមព្រះអង្គជួយទូលបង្គំ ឲ្យចែកចាយអំពីព្រះអង្គ ដល់អ្នកដទៃ។
គម្រោងអានព្រះគម្ពីររយៈពេល១ឆ្នាំ : អេសេគាល ៥-៧ និង ហេព្រើរ ១២