ព្រះយេស៊ូវមិនប្រកាន់អតីតកាលរបស់យើង
ដោយJames Banks
May 1, 2024
ម៉ាថាយ ២៨:១៦-២០
គ្រប់ទាំងអំណាចបានប្រគល់មកខ្ញុំនៅលើស្ថានសួគ៌ ហើយលើផែនដីផង។ ម៉ាថាយ ២៨:១៨
បន្ទាប់ពីព្រះយេស៊ូវបានរំដោះកូនប្រុសខ្ញុំ ឈ្មោះចេហ្វ(Geoff) ឲ្យរួចផុតពីការញៀនថ្នាំ ខ្ញុំនៅតែមានការព្រួយបារម្ភអំពីគាត់។ យើងបានឆ្លងកាត់ការលំបាកជាច្រើនជាមួយគ្នា ហើយជួនកាល ខ្ញុំនៅតែផ្ដោតចិត្តទៅលើអតីតកាលដ៏ពិបាករបស់គាត់ ជាជាងផ្ដោតចិត្តទៅលើអនាគតដែលព្រះទ្រង់បានរៀបចំសម្រាប់គាត់។ ឪពុកម្តាយដែលមានកូនញៀនថ្នាំ ច្រើនតែមានការព្រួយបារម្ភថា ពួកគេនឹងវិលត្រឡប់ទៅរកការសេពគ្រឿងញៀនទៀត ហើយថ្ងៃមួយ ក្នុងការជួបជុំគ្រួសារ ខ្ញុំក៏បានប្រាប់ចេហ្វថា “កូនកុំភ្លេច យើងមានខ្មាំងសត្រូវមួយ ហើយវាមានអំណាចខ្លាំងណាស់”។ គាត់ក៏បានឆ្លើយតបថា “បាទប៉ាខ្ញុំដឹងហើយ វាមានអំណាច តែវាមិនអាចគ្រប់គ្រងកូនបានទេ”។
ក្នុងពេលនោះ ខ្ញុំក៏បាននឹកចាំ អំពីអំណាចរបស់ព្រះយេស៊ូវដែលបានជួយសង្គ្រោះយើង ឲ្យរួចពីបាប ហើយបានកែប្រែជីវិតយើង ពេលណាយើងមើលទៅព្រះអង្គ។ ភ្លាមៗនោះ ខ្ញុំក៏បាននឹកចាំពាក្យពេចន៍ដែលព្រះអង្គមានបន្ទូល ទៅកាន់សិស្សព្រះអង្គ មុនពេលព្រះអង្គជិតដល់ពេលយាងទៅព្រះវរបិតានៅស្ថានសួគ៌វិញ។ គឺដូចដែលព្រះអង្គមានបន្ទូលថា “គ្រប់ទាំងអំណាចបានប្រគល់មកខ្ញុំនៅលើស្ថានសួគ៌ ហើយលើផែនដីផង”(ម៉ាថាយ ២៨:១៨)។
ព្រះយេស៊ូវដែលបានសុគតនៅលើឈើឆ្កាង ហើយមានព្រះជន្មរស់ឡើងវិញ បានបើកផ្លូវឲ្យយើងចូលទៅរកព្រះអង្គ ទោះយើងមានអតីតកាលដូចម្តេចក៏ដោយ។ ព្រះអង្គគ្រប់គ្រងពេលអតីតកាល និងពេលអនាគតរបស់យើង។ ដោយសារព្រះអង្គបានសន្យាថា ព្រះអង្គនឹងគង់នៅជាមួយយើងជារៀងរហូត(ខ.២០) នោះយើងអាចទុកចិត្តថា ព្រះអង្គនឹងសម្រេចបំណងព្រះទ័យព្រះអង្គ ហើយជីវិតយើងស្ថិតក្នុងព្រះហស្តព្រះអង្គជានិច្ច។ ព្រះយេស៊ូវបានប្រទានយើងនូវក្តីសង្ឃឹម ប្រសើរជាងក្តីសង្ឃឹមទាំងអស់ ជាក្តីសង្ឃឹមដែលល្អយ៉ាងខ្លាំងចំពោះយើង បានជាយើងចង់ចែកចាយដល់អ្នកដទៃ។ អារក្ស និងលោកិយអាចមានអំណាចតែមួយរយៈពេលប៉ុណ្ណោះ តែគ្រប់ទាំងអំណាច ជាកម្មសិទ្ធិរបស់ព្រះយេស៊ូវជារៀងរហូត។—James Banks
តើអំណាចរបស់ព្រះយេស៊ូវបានផ្តល់ឲ្យអ្នកនូវក្តីសង្ឃឹមដូចម្តេចខ្លះ? តើមានការអ្វីខ្លះដែលព្រះអង្គបានធ្វើសម្រាប់អ្នក ដែលអ្នកអាចចែកចាយដល់អ្នកដទៃ នៅថ្ងៃនេះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការត្រាស់ហៅទូលបង្គំឲ្យចូលមករកព្រះអង្គ ដោយសេចក្តីស្រឡាញ់។ សូមព្រះអង្គដឹកនាំទូលបង្គំ ទៅរកនរណាម្នាក់ ដែលទូលបង្គំអាចចែកចាយសេចក្តីស្រឡាញ់របស់ព្រះអង្គ ដល់ពួកគេនៅថ្ងៃនេះ។
For further study, read Hope: Discovering the One True Source at DiscoverySeries.org/Q0760.
គម្រោងអានព្រះគម្ពីររយៈពេល១ឆ្នាំ : ១ពង្សាវតាក្សត្រ ១០-១១ និង លូកា ២១:២០-៣៨