រៀនសូត្រពីគ្នាទៅវិញទៅមក
ដោយKatara Patton
June 25, 2024
នាងរស់ ២:១១-១២ ៣:១-៦
គេបានប្រាប់ដល់ខ្ញុំ ពីគ្រប់ទាំងកិរិយា ដែលនាងបានប្រព្រឹត្តនឹងម្តាយក្មេក តាំងពីប្តីនាងស្លាប់ចោលទៅ។ នាងរស់ ២:១១
រយៈពេលប៉ុន្មានឆ្នាំ មុនពេលកម្មវិធីហ្ស៊ូម(Zoom) ត្រូវបានគេយកមកប្រើ ក្នុងការជួបជុំជាក្រុមពីចម្ងាយ តាមបណ្ដាញអ៊ីនធឺណិត មិត្តភក្តិខ្ញុំម្នាក់បានអញ្ជើញខ្ញុំ ឲ្យចូលរួមជាមួយគាត់ ក្នុងការជួបគ្នាតាមអនឡាញមើលមុខគ្នាឃើញ ដើម្បីពិភាក្សាគ្នាអំពីកម្មវិធីមួយ។ តាមរយៈភាពតានតឹងដែលខ្ញុំបានបង្ហាញក្នុងអ៊ីមែល ដែលខ្ញុំបានផ្ញើទៅគាត់ គាត់អាចមើលដឹងថា ខ្ញុំមិនទាន់យល់អំពីរបៀបចូលរួមជាមួយគាត់ ដូចនេះ គាត់ក៏បានណែនាំខ្ញុំ ឲ្យស្វែងរកក្មេងជំទង់ម្នាក់ ជួយពន្យល់ខ្ញុំអំពីរបៀបចូលរួមក្នុងការជួបគ្នាតាមអនឡាញមើលមុខគ្នាឃើញ។
ការណែនាំរបស់គាត់ បានចង្អុលបង្ហាញ អំពីតម្លៃនៃទំនាក់ទំនងរវាងមនុស្ស ស្ថិតក្នុងជំនាន់ផ្សេងគ្នា។ រឿងនេះបានធ្វើឲ្យខ្ញុំនឹកចាំ អំពីទំនាក់ទំនងរវាងនាងរស់ និងនាងណាអូមី។ គេច្រើនតែសរសើរនាងរស់ ដោយសារគាត់ជាកូនប្រសារស្រី ដែលមានចិត្តស្មោះត្រង់ ដែលបានសម្រេចចិត្តមិនវិលត្រឡប់ទៅស្រុកកំណើត ដើម្បីរួមដំណើរជាមួយនាងណាអូមីជាម្តាយក្មេក ទៅភូមិបេថ្លេហិម(នាងរស់ ១:១៦-១៧)។ នៅពេលដែលពួកគេទៅដល់ភូមិនោះ នាងរស់ក៏បានប្រាប់នាងណាអូមីថា “ឥឡូវនេះ សូមបើកឲ្យខ្ញុំទៅឯស្រែ ដើម្បីនឹងរើសសន្សំស្រូវ តាមអ្នកណាដែលអាណិតមេត្តាដល់ខ្ញុំ”(២:២)។ នាងបានជួយស្រ្តីចំណាសម្នាក់នេះ ដែលក្រោយមក បានជួយនាងឲ្យបានរៀបការជាមួយលោកបូអូស ជាម្ចាស់ស្រែ។ ការណែនាំរបស់នាងណាអូមី សម្រាប់នាងរស់ បានបណ្តាលចិត្តលោកបូអូស ឲ្យទិញទ្រព្យសម្បត្តិរបស់បងប្អូនសាច់ថ្លៃរបស់នាង ហើយក៏បានទទួលយកនាងជាភរិយា(៤:៩-១០)។
ការប្រឹក្សាយោបល់ប្រកបដោយប្រាជ្ញា ដែលអ្នកជំនាន់មុនផ្តល់ឲ្យអ្នកជំនាន់ក្រោយ មានសារៈសំខាន់ និងគួរឲ្យយើងគោរព។ ប៉ុន្តែ រឿងរបស់នាងរស់ និងនាងណាអូមី បានរំឭកយើងថា ការប្រឹក្សាយោបល់ដែលមនុស្សវ័យក្មេងជាង ផ្តល់ឲ្យមនុស្សមានវ័យចាស់ជាង ក៏អាចមានតម្លៃផងដែរ។ យើងមានអ្វីៗជាច្រើនដែលត្រូវរៀនសូត្រពីមនុស្ស មានវ័យតិចជាងយើង ក៏ដូចជាពីមនុស្សដែលចាស់ជាងយើង។ ចូរយើងព្យាយាមបង្កើតទំនាក់ទំនងប្រកបដោយសេចក្តីស្រឡាញ់ និងភាពស្មោះត្រង់ ជាមួយមនុស្សស្ថិតក្នុងជំនាន់ផ្សេងពីយើង។ ការនេះនឹងនាំមកនូវព្រះពរ សម្រាប់យើង និងអ្នកដទៃ ហើយជួយយើងរៀនសូត្រ អំពីអ្វីដែលយើងមិនទាន់បានដឹង។—Katara Patton
តើអ្នកបានរៀនសូត្រអ្វីខ្លះ ពីមនុស្សដែលមានវ័យក្មេងជាងអ្នក? តើអ្នកអាចឈោងទៅរកមនុស្សក្នុងជំនាន់ផ្សេងពីអ្នក ដូចម្តេចខ្លះ នៅថ្ងៃនេះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការប្រទានប្រាជ្ញា តាមរយៈមនុស្សជំនាន់ចាស់ និងជំនាន់ថ្មី។ សូមព្រះអង្គបង្រៀនទូលបង្គំឲ្យយល់អំពីតម្លៃ នៃការឲ្យយោបល់ទៅវិញទៅមកពីមនុស្សក្នុងវ័យផ្សេងគ្នា។
គម្រោងអានព្រះគម្ពីររយៈពេល១ឆ្នាំ : យ៉ូប ៥-៧ និង កិច្ចការ ៨:១-២៥