ព្រះយេស៊ូវលាងជម្រះស្នាមប្រឡាក់
ដោយadamholz
July 26, 2024
យេរេមា ២:១-៥,២១-២២
ដ្បិតទោះបើឯងលាងខ្លួនដោយក្បុង ហើយប្រើសាប៊ូជាច្រើនក៏ដោយ គង់តែព្រះអម្ចាស់យេហូវ៉ាទ្រង់មានព្រះបន្ទូលថា អំពើទុច្ចរិតរបស់ឯង នៅមានកត់ជាប់ចំពោះអញនៅឡើយដែរ។ យេរេមា ២:២២
មានពេលមួយ បន្ទាប់ពីខ្ញុំបានសម្ងួតខោអាវ បន្ទាប់ពីបោកគក់ហើយ ខ្ញុំក៏បានប្រមូលខោអាវរបស់ខ្ញុំចេញពីម៉ាស៊ីនសម្ងួត ហើយខ្ញុំមានការភ្ញាក់ផ្អើលយ៉ាងខ្លាំង ពេលដែលបានឃើញអាវរបស់ខ្ញុំមានស្នាមប្រឡាក់។
អាវពណ៌សរបស់ខ្ញុំមានស្នាមទឹកប៊ិច ដែលបានហៀចេញមក ធ្វើឲ្យខោអាវខ្ញុំប្រឡាក់ចេញស្នាមអុចៗធំៗ ដូចខ្លារខិន។ ច្បាស់ណាស់ ខ្ញុំមិនបានពិនិត្យមើលហោបៅអាវរបស់ខ្ញុំ ហើយប៊ិចដែលហៀទឹកក៏បានធ្វើឲ្យប្រឡាក់ខោអាវទាំងអស់ នៅក្នុងម៉ាស៊ីនសម្ងួត។
ព្រះគម្ពីរប៊ីបច្រើនតែប្រើពាក្យប្រឡាក់ ដើម្បីពិពណ៌នាអំពីបាប។ ស្នាមប្រឡាក់នៅជាប់នៅលើសាច់ក្រណាត់ ធ្វើឲ្យក្រណាត់នោះខូច។ ហេតុនេះហើយ ព្រះអម្ចាស់ក៏បានមានបន្ទូលតាមរយៈហោរាយេរេមា ដោយពិពណ៌នា អំពីបាប ដោយរំឭករាស្រ្តព្រះអង្គថា ស្នាមប្រឡាក់នោះ គឺលើសពីលទ្ធភាពដែលពួកគេអាចសម្អាតដោយខ្លួនឯងបាន។ គឺដូចដែលព្រះអង្គមានបន្ទូលថា “ដ្បិតទោះបើឯងលាងខ្លួនដោយក្បុង ហើយប្រើសាប៊ូជាច្រើនក៏ដោយ គង់តែព្រះអម្ចាស់យេហូវ៉ាទ្រង់មានព្រះបន្ទូលថា អំពើទុច្ចរិតរបស់ឯង នៅមានកត់ជាប់ចំពោះអញនៅឡើយដែរ”(យេរេមា ២:២២)។
តែអរព្រះគុណព្រះអង្គ ដែលបានប្រទានផ្លូវឲ្យយើងអាចរួចពីបាប។ ក្នុងបទគម្ពីរអេសាយ ១:១៨ ព្រះអម្ចាស់បានសន្យាថា ព្រះអង្គនឹងលាងសម្អាតស្នាមប្រឡាក់របស់បាបដែលយើងមាន គឺដូចដែលព្រះអង្គបានមានបន្ទូលថា “មកចុះ យើងនឹងពិភាក្សាជាមួយគ្នា ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ ទោះបើក្រហមឆ្អៅក៏ដោយ គង់តែនឹងបានដូចជារោមចៀមវិញ”។
ខ្ញុំមិនអាចលាងជម្រះស្នាមទឹកប៊ិចនៅលើអាវពណ៌សបានទេ។ ខ្ញុំក៏មិនអាចលាងជម្រះស្នាមប្រឡាក់របស់បាបខ្ញុំដែរ។ អរព្រះគុណព្រះអង្គ ដែលបានលាងសម្អាតយើង ក្នុងព្រះគ្រីស្ទ គឺដូចដែលបទគម្ពីរ១យ៉ូហាន ១:៩ បានសន្យាថា “បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនិងសំអាតយើង ពីគ្រប់អំពើទុច្ចរិតទាំងអស់ផង”។—Adam R. Holz
តើអ្នកបានឆ្លងកាត់ការអត់ទោសបាប និងការលាងសម្អាតឲ្យរួចពីបាប ក្នុងជីវិតអ្នកដូចម្តេចខ្លះ?
អ្នកនៅមាន “ស្នាមប្រឡាក់” អ្វីខ្លះ ដែលត្រូវនាំថ្វាយដល់ព្រះអម្ចាស់?
ឱព្រះវរបិតា សូមព្រះអង្គជួយទូលបង្គំឲ្យប្រកាន់ខ្ជាប់ព្រះបន្ទូលសន្យា ដែលបានចែងថា ក្នុងព្រះគ្រីស្ទមានការអត់ទោសបាប និងសេចក្តីបរិសុទ្ធ ពេលណាទូលបង្គំបានទទួលការលាងសម្អាតឲ្យស នៅចំពោះព្រះអង្គ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៤០-៤២ និង កិច្ចការ ២៧:១-២៦