ព្រឹក
ព្រះដែលយើងគួរស្ញប់ស្ញែង
ដោយDave Branon
August 1, 2024
អេសាយ ៥៣:២,៥
ទ្រង់ឥតមានទ្រង់ទ្រាយល្អ ឬសណ្ឋានរុងរឿងទេ ... យើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់។ អេសាយ ៥៣:១-៦
អស់រយៈពេលជាង១៣០ឆ្នាំហើយ ដែលប៉មអេហ្វ៊ែល (ឬទួអេហ្វ៊ែល) បានឈរខ្ពស់ត្រដែត នៅលើទឹកដីនៃទីក្រុងប៉ារីស ក្នុងលក្ខណៈគួរឲ្យស្ញប់ស្ញែង ធ្វើជានិមិត្តរូបនៃភាពវ័យឆ្លាត និងសម្រស់ផ្នែកស្ថាបត្យកម្មរបស់ជនជាតិបារាំង។ ទីក្រុងប៉ារីសបានលើកដំកើងប៉មមួយនេះ ថាជាផ្នែកមួយដ៏សំខាន់នៃភាពរុងរឿងរបស់ខ្លួន។
ទោះជាយ៉ាងណាក៏ដោយ កាលគេកំពុងសាងសង់ប៉មនេះ មានមនុស្សជាច្រើនមិនសូវបានឲ្យតម្លៃវាទេ។ ឧទាហរណ៍ លោកហ្កាយ ដឺ មួប៉ាសង់(Guy De Maupassant) ជាអ្នកនិពន្ធជនជាតិបារាំងដ៏ល្បីល្បាញ ធ្លាប់បាននិយាយថា “ទួអេហ្វ៊ែលមានរាងស្ដួច ហើយស្តើង ដូចបំពង់ផ្សែងរបស់រោងចក្រអញ្ចឹង”។ គាត់មិនអាចមើលឃើញសំណង់មួយនេះ មានភាពស្រស់ស្អាតត្រង់ណាទេ។
អ្នកដែលបានស្រឡាញ់ព្រះយេស៊ូវ ហើយបានថ្វាយចិត្តដាច់ដល់ព្រះអង្គ ដោយទទួលព្រះអង្គជាព្រះអង្គសង្រ្គោះ បានចាត់ទុកព្រះអង្គថា ជាព្រះដែលគួរឲ្យស្ញប់ស្ញែង ដោយដឹងថា ព្រះអង្គជានរណា និងបានធ្វើអ្វីខ្លះសម្រាប់យើង។ ប៉ុន្តែ ហោរាអេសាយបានលើកឡើងថា “ទ្រង់ឥតមានទ្រង់ទ្រាយល្អ ឬសណ្ឋានរុងរឿងទេ ហើយកាលយើងបានមើលទ្រង់ នោះក៏គ្មានភាពលំអណា ដែលឲ្យយើងរីករាយចិត្តដែរ”(៥៣:២)។
ប៉ុន្តែ ការអ្វីដែលព្រះអង្គបានធ្វើសម្រាប់យើង មានភាពខ្ពង់ខ្ពស់គួរឲ្យស្ញប់ស្ញែងបំផុត ដោយបានឆ្លុះបញ្ចាំងឲ្យយើងឃើញភាពស្រស់ស្អាតរបស់ព្រះអង្គ ក្នុងទម្រង់ដែលពិតបំផុត និងបរិសុទ្ធបំផុត ដែលមនុស្សធ្លាប់បានស្គាល់ និងដកពិសោធន៍ជាមួយ។ “ទ្រង់បានទ្រាំទ្រ រងអស់ទាំងសេចក្តីឈឺចាប់របស់យើង”(ខ.៤)។ ព្រះអង្គ “ត្រូវរបួស ដោយព្រោះអំពើរំលងរបស់យើង ក៏ត្រូវវាយជាំ ដោយព្រោះអំពើទុច្ចរិតរបស់យើងទេ ឯការវាយផ្ចាលដែលនាំឲ្យយើងបានជាមេត្រី នោះបានធ្លាក់ទៅលើទ្រង់ ហើយយើងរាល់គ្នាបានប្រោសឲ្យជា ដោយសារស្នាមរំពាត់នៅអង្គទ្រង់”(ខ.៥)។
យើងនឹងមិនដែលបានឃើញនរណាម្នាក់ មានភាពស្រស់ស្អាត និងគួរឲ្យស្ញប់ស្ញែង ដូចព្រះពិតតែមួយ ដែលបានសុគតជំនួសយើង នៅលើឈើឆ្កាង ដោយទទួលទោសនៃអំពើបាបរបស់យើង ដាក់នៅលើអង្គទ្រង់។
ព្រះអង្គមានព្រះនាម យេស៊ូវ។ ជាព្រះដែលគួរឲ្យស្ញប់ស្ញែង។ ចូរយើងមើលទៅព្រះអង្គ ហើយរស់នៅស្របតាមបំណងព្រះទ័យព្រះអង្គ។—Dave Branon
តើព្រះយេស៊ូវបានបង្ហាញភាពស្រស់ស្អាតរបស់ព្រះអង្គ ដល់អ្នកដូចម្តេចខ្លះ? តើអ្នកមានការលើកទឹកចិត្តយ៉ាងណាខ្លះ ពេលដែលបានដឹងថា មានតែព្រះអង្គទេ ដែលអាចប្រទានក្តីសង្ឃឹមដល់អ្នក?
ឱព្រះដែលមានភាពស្រស់ស្អាតគួរស្ញប់ស្ញែង ទូលបង្គំសូមអរព្រះគុណព្រះអង្គ ដែលបានធ្វើការលះបង់ ដើម្បីទូលបង្គំ ដោយមិនគិតប្រយោជន៍ផ្ទាល់ខ្លួន។
Learn more here: ODB.org/personal-relationship-with-god.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៥៤-៥៦ និង រ៉ូម ៣
ប្រភេទ
ល្ងាច
ដានរបស់យើង ដែលនាំទៅរកព្រះយេស៊ូវ
ដោយMarvin Williams
August 1, 2024
ដានីយ៉ែល ៦:១-១០
ពួកអធិបតី និងពួកចៅហ្វាយក៏ស្វែងរកហេតុពីដំណើររាជការផែនដី ឲ្យទាស់នឹងដានីយ៉ែល តែគេរកឱកាស ឬកំហុសអ្វីមិនបានឡើយ ក៏មិនឃើញមានថ្លស់ធ្លោយ ឬទោសទាស់អ្វីដែរ ពីព្រោះលោកជាមនុស្សស្មោះត្រង់។ ដានីយ៉ែល ៦:៤
អ្នកវិទ្យាសាស្រ្តមកពីសកលវិទ្យាល័យរដ្ឋកាលីហ្វូញ៉ា បានធ្វើតេស្តមកលើសំណាក ដែលអ្នកប្រើប្រាស់មួយចំនួនបានបន្សល់ទុកនៅលើទូរស័ព្ទចល័តរបស់ខ្លួន ដើម្បីមើលឲ្យស្គាល់លក្ខណៈពិសេស និងទម្លាប់នៃការរស់នៅរបស់អ្នកប្រើប្រាស់ទាំងនោះ។ ពួកគេក៏បានរកឃើញសំណាកជាច្រើនប្រភេទ ដែលជាបំណែកតូចល្អិតរបស់សាប៊ូដុំ ឡេ សាប៊ូកក់សក់ និងម្សៅលាបមុខ ដែលអ្នកប្រើប្រាស់ទូរស័ព្ទបានប្រើ ហើយក៏អាចដឹង អំពីប្រភេទអាហារ ភេសជ្ជៈ និងថ្នាំពេទ្យក៏ដូចជាសំលៀកបំពាក់ដែលពួកគេបានប្រើប្រាស់។ ការសិក្សារបស់ពួកគេបានអនុញ្ញាតឲ្យអ្នកស្រាវជ្រាវ បង្កើតប្រវត្តិរូបអំពីរបៀបនៃការរស់នៅ របស់អ្នកប្រើប្រាស់ទាំងនោះ។
រឿងនេះបានធ្វើឲ្យខ្ញុំនឹកចាំ រឿងរបស់លោកដានីយ៉ែល ដែលក្នុងនោះ ពួកនាម៉ឺន ក្នុងចក្រភពបាប៊ីឡូន បានព្យាយាមតាមដានរបៀបនៃការរស់នៅរបស់ហោរាដានីយ៉ែល ដើម្បីព្យាយាមស្វែងរកចំណុចអាក្រក់ ឬការថ្លស់ធ្លោយរបស់គាត់។ ប៉ុន្តែ គាត់បានបម្រើរាជការដោយចិត្តស្មោះត្រង់ អស់រយៈពេលជិត៧០ឆ្នាំហើយ បានជាគេ “មិនឃើញគាត់មានថ្លស់ធ្លោយ ឬទោសទាស់អ្វីដែរ ពីព្រោះគាត់ជាមនុស្សស្មោះត្រង់(ដានីយ៉ែល ៦:៤)។ តាមពិត ស្តេចដារីយ៉ូសបានដំឡើងមុខតំណែងរបស់គាត់ ឲ្យគ្រប់គ្រងពីលើពួកអធិបតីជាច្រើន(ខ.១-២)។ ប្រហែលដោយសារការច្រណែន ពួកមន្រ្តីដទៃទៀត ក៏បានព្យាយាមស្វែងរកដាននៃអំពើពុករលួយ នៅក្នុងការងាររបស់គាត់ ដើម្បីឲ្យពួកគេអាចកំចាត់គាត់។ ទោះជាយ៉ាងណាក៏ដោយ គាត់បានរក្សាភាពស្អាតស្អំ ហើយបន្តបម្រើ និងអធិស្ឋានដល់ព្រះអម្ចាស់ ដូចកាលពីមុន(ខ.១០)។ ទីបំផុត លោកដានីយ៉ែលក៏បានចម្រើនឡើង ក្នុងការបំពេញតួនាទី ក្នុងរាជ្យស្តេចដារីយ៉ូស(ខ.២៨)។
ការរស់នៅរបស់យើង បន្សល់ទុកដាន ដែលគេអាចមើលឃើញ ហើយដឹងថា យើងជានរណា និងបានធ្វើតំណាងឲ្យនរណា។ យើងពិបាករស់នៅឲ្យបានល្អ ហើយយើងមិនល្អឥតខ្ចោះ តែនៅពេលណាមនុស្សជុំវិញយើងសង្កេតមើលជីវិតយើង សូមឲ្យគេមើលឃើញដាន នៃភាពស្អាតស្អំ និងភាពប្តូរផ្តាច់ដែលយើងមាន ចំពោះព្រះយេស៊ូវ ខណៈពេលដែលព្រះអង្គកំពុងនាំយើង ដើរផ្លូវត្រូវ។—Marvin Williams
តើការរស់នៅរបស់អ្នក បាននាំអ្នកដទៃឲ្យស្គាល់ផ្លូវព្រះដែរឬទេ? តើអ្នកត្រូវមានការផ្លាស់ប្តូរអ្វីខ្លះ ដើម្បីឲ្យអ្នកអាចធ្វើជាតំណាងឲ្យព្រះអង្គ បានល្អជាងមុន?
ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំឲ្យធ្វើជាតំណាងព្រះអង្គ ឲ្យបានល្អ ក្នុងការនិយាយស្តី និងការប្រព្រឹត្តរបស់ទូលបង្គំ។
For further study, read Taking Sin Seriously at DiscoverODB.org.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៥៧-៥៩ និង រ៉ូម ៤