ព្រឹក
ចិត្តដែលស្វាគមន៍អ្នកដទៃ
ដោយElisa Morgan
August 12, 2024
ម៉ាកុស ៩:៣០-៣៧
អ្នកណាដែលទទួលកូនតូច១ ដូចជាកូននេះ ដោយនូវឈ្មោះខ្ញុំ នោះក៏ឈ្មោះថាទទួលខ្ញុំ។ ម៉ាកុស ៩:៣៧
មានពេលមួយ ខ្ញុំដើររកមើលក្រណាត់ជូតជើង នៅក្នុងផ្សារទំនើបមួយ ក្នុងតំបន់ដែលខ្ញុំរស់នៅ។ ពេលនោះ ខ្ញុំបានកត់សំគាល់ឃើញថា ពាក្យដែលគេបានបោះពុម្ពពីលើក្រណាត់ជូតជើងនីមួយៗ ដែលមានដូចជា ពាក្យ “សួស្តី!” ពាក្យ “ផ្ទះ” ដែលមានរូបបេះដូង។ ហើយខ្ញុំក៏បានជ្រើសរើសយកក្រណាត់ជូតជើង ដែលមានពាក្យ “សូមស្វាគមន៍” ជាពាក្យគេចូលចិត្តប្រើច្រើនជាងគេ នៅលើក្រណាត់ជូតជើង ដែលគេដាក់នៅមាត់ទ្វារផ្ទះ។ ពេលខ្ញុំយកវាទៅដាក់នៅមាត់ទ្វារផ្ទះខ្ញុំ ខ្ញុំក៏បានពិនិត្យមើលចិត្តខ្លួនឯង។ តើផ្ទះរបស់ខ្ញុំពិតជាមានភាពចៅរ៉ៅ ស្របតាមបំណងព្រះទ័យព្រះដែរឬទេ? តើចៅរ៉ៅចំពោះក្មេងដែលមកលក់ស្ករសូកូឡា ដើម្បីរកប្រាក់ទៅរៀន? តើចៅរ៉ៅចំពោះអ្នកជិតខាងដែលកំពុងខ្វះខាត? តើចៅរ៉ៅចំពោះសាច់ញាតិនៅខេត្ត ដែលបានទូរស័ព្ទមក នៅពេលយប់អាធ្រាត្រដែរឬទេ?
ក្នុងកណ្ឌគម្ពីរម៉ាកុស ជំពូក៩ ព្រះយេស៊ូវបានយាងចេញពីភ្នំដែលសាវ័កពេត្រុស យ៉ាកុប និងយ៉ូហាន បានឈរមើលព្រះអង្គប្រែព្រះភក្ត្រចេញពន្លឺ ដោយពួកគេមានចិត្តស្ញប់ស្ញែងចំពោះព្រះវត្តមានដ៏បរិសុទ្ធ(ខ.១-១៣) ហើយក៏បានបណ្តេញអារក្សចេញពីក្មេងប្រុសម្នាក់ ដែលកាលពីមុនឪពុកគាត់គ្មានសង្ឃឹមថា កូននោះអាចមានសេរីភាពបាន(ខ.១៤-២៩)។ បន្ទាប់មក ព្រះយេស៊ូវក៏បានប្រទានការបង្រៀនដោយឡែកដល់ពួកសាវ័ក អំពីការសុគតរបស់ព្រះអង្គដែលត្រូវមកដល់(ខ.៣០-៣២)។ តែពួកគេមិនទាន់យល់ព្រះបន្ទូលព្រះអង្គនៅឡើយទេ(ខ.៣៣-៣៤)។ ព្រះអង្គក៏បានឆ្លើយតប ដោយនាំក្មេងតូចម្នាក់ ដាក់នៅកណ្តាលចំណោមពួកគេ ដោយបន្ទូលថា “អ្នកណាដែលទទួលកូនតូច១ ដូចជាកូននេះ ដោយនូវឈ្មោះខ្ញុំ នោះក៏ឈ្មោះថាទទួលខ្ញុំ ហើយអ្នកណាដែលទទួលខ្ញុំ នោះមិនមែនទទួលខ្ញុំទេ គឺឈ្មោះថាទទួលព្រះដែលបានចាត់ឲ្យខ្ញុំមកវិញ”(ខ.៣៧)។ ពាក្យ “ទទួល” ក្នុងបទគម្ពីរនេះ គឺមានន័យថា ទទួល និងស្វាគមន៍ជាភ្ញៀវ។ ព្រះយេស៊ូវសព្វព្រះទ័យឲ្យសិស្សព្រះអង្គ ស្វាគមន៍មនុស្សទាំងអស់ រាប់បញ្ចូលទាំងអ្នកដែលគេមិនឲ្យតម្លៃ និងមិនរាប់រក និយាយរួម គឺត្រូវស្វាគមន៍គេដូចយើងស្វាគមន៍ព្រះអង្គដែរ។
ខ្ញុំបានគិតអំពីក្រណាត់ជូតជើងរបស់ខ្ញុំ ដែលមានពាក្យស្វាគមន៍ ហើយសួរខ្លួនឯងថា តើខ្ញុំបានចែកចាយសេចក្តីស្រឡាញ់របស់ព្រះអង្គដល់អ្នកដទៃ យ៉ាងដូចម្តេចខ្លះ។ ការនេះបានចាប់ផ្តើមដោយការស្វាគមន៍ព្រះយេស៊ូវ មិនគ្រាន់តែធ្វើជាភ្ញៀវ តែជាម្ចាស់ជីវិតរបស់ខ្ញុំ។ តើខ្ញុំនឹងអនុញ្ញាតឲ្យព្រះអង្គដឹកនាំខ្ញុំ ដោយស្វាគមន៍អ្នកដទៃ តាមរបៀបដែលព្រះអង្គសព្វព្រះទ័យដែរឬទេ?—Elisa Morgan
តើអ្នកស្វាគមន៍ព្រះយេស៊ូវចូលក្នុងចិត្តអ្នក នៅពេលណា និងដោយរបៀបណា? តើការនេះគួរតែមានឥទ្ធិពលយ៉ាងណាខ្លះ មកលើរបៀបដែលអ្នកស្វាគមន៍អ្នកដទៃ?
ឱព្រះយេស៊ូវ សូមព្រះអង្គដឹកនាំជីវិតទូលបង្គំ ហើយបង្រៀនទូលបង្គំឲ្យចេះស្វាគមន៍មនុស្សទាំងអស់ ដោយមិនរើសអើង។
Learn more here: ODB.org/personal-relationship-with-god.
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៨៤-៨៦ និង រ៉ូម ១២
ប្រភេទ
ល្ងាច
អ្នកទោសរបស់បាប
ដោយKenneth Petersen
August 12, 2024
អេសាយ ៤៣:១១-១៩
មើល អញនឹងធ្វើការ១ថ្មីវិញ ការនោះនឹងលេចឡើងឥឡូវ។ អេសាយ ៤៣:១៩
មានពេលមួយ កីឡាករដ៏ល្បីល្បាញម្នាក់ ជាខ្សែប្រយុទ្ធក្នុងកីឡាបាល់ទាត់អាមេរិក បានបោះជំហានឡើងនិយាយនៅលើវេទិកា តែមិនមែននៅក្នុងពហុកីឡាដ្ឋាននោះទេ។ ថ្ងៃនោះ គាត់ឈរនិយាយទៅកាន់អ្នកទោស៣រយនាក់ ក្នុងមណ្ឌលកែប្រែអេវើក្លេត ទីក្រុងម៉ៃអាមី រដ្ឋផ្លូរីដា ដោយចែកចាយដល់ពួកគេ នូវព្រះបន្ទូលក្នុងកណ្ឌអេសាយ។
តែពេលនោះ គាត់មិនចែកចាយអំពីភាពរុងរឿងរបស់កីឡាករដ៏ល្បីល្បាញនោះទេ តែគាត់បាននិយាយអំពីវិញ្ញាណមនុស្សជាច្រើន ដែលកំពុងមានភាពប្រេះបែក និងឈឺចាប់។ ក្នុងពេលដ៏ពិសេសនោះ ព្រះអម្ចាស់បានធ្វើការក្នុងមន្ទីរឃុំឃាំងនោះ។ អ្នកសង្កេតមើលព្រឹត្តិការណ៍នៅថ្ងៃនោះ ក៏បានបង្ហោះសារក្នុងបណ្ដាញសង្គមថា “កម្មវិធីជួបជុំគ្នានៅថ្ងៃនោះ ក៏បានផ្ទុះចេញជាការថ្វាយបង្គំ និងច្រៀងសរសើរដំកើងព្រះ”។ ពួកគេក៏បានទួញយំ និងអធិស្ឋានជាមួយគ្នានៅថ្ងៃនោះ ដោយចិត្តឆេះឆួល។ នៅចុងបញ្ចប់នៃកម្មវិធី អ្នកទោស២៧នាក់បានថ្វាយជីវិតរបស់ខ្លួន ដល់ព្រះគ្រីស្ទ។
តាមពិត ទោះយើងជាអ្នកទោសកំពុងជាប់ឃុំក្នុងមន្ទីរឃុំឃាំងឬអត់ យើងម្នាក់ៗសុទ្ធតែជាប់ឃុំ នៅក្នុងគុកនៃភាពលោភលន់ ភាពអាត្មានិយម និងការញៀនអ្វីមួយ។ ប៉ុន្តែ ព្រះអម្ចាស់ក៏បានយាងមករកយើង ដែលនេះជារឿងដ៏អស្ចារ្យណាស់។ ក្នុងមន្ទីរឃុំឃាំងនៅពេលព្រឹកនោះ គេបានដកស្រង់បទគម្ពីរអេសាយ ៤៣:១៩ ដែលក្នុងនោះ ព្រះអម្ចាស់មានបន្ទូលថា “មើល អញនឹងធ្វើការ១ថ្មីវិញ ការនោះនឹងលេចឡើងឥឡូវ តើឯងរាល់គ្នានឹងមិនស្គាល់ទេឬ?”។ បទគម្ពីរនេះក៏បានលើកទឹកចិត្តយើងឲ្យភ្លេចរឿងចាស់ ហើយឈប់រស់នៅក្នុងអតីតកាលទៀត(ខ.១៨) ដ្បិតព្រះអម្ចាស់មានបន្ទូលថា “គឺអញ អញនេះហើយជាអ្នកដែលលុបអំពើរំលងរបស់ឯងចេញ ដោយយល់ដល់ខ្លួនអញ ហើយអញមិននឹកចាំអំពើបាបរបស់ឯងទៀតឡើយ”(ខ.២៥)។
តែព្រះអម្ចាស់បានបញ្ជាក់ច្បាស់ថា ក្រៅពីព្រះអង្គ គ្មានព្រះសង្គ្រោះណាទៀតឡើយ(ខ.១១)។ គឺទាល់តែយើងថ្វាយជីវិតយើងដល់ព្រះគ្រីស្ទ ទើបយើងអាចមានសេរីភាព។ សម្រាប់អ្នកដែលបានថ្វាយជីវិតដល់ព្រះអង្គហើយ ពួកគេចាំបាច់ត្រូវចាំថា ព្រះអម្ចាស់នៃជីវិតយើងជានរណា។ ព្រះអង្គបានធានាថា ព្រះអង្គនឹងធ្វើការថ្មីមួយ តាមរយៈព្រះគ្រីស្ទ។ យើងនឹងបានឃើញការនោះលេចឡើងមិនខាន។—Kenneth Petersen
តើបាបរបស់អ្នកបានឃុំឃាំងអ្នក ដោយរបៀបណា? តើធ្វើដូចម្តេចឲ្យអ្នកអាចរំដោះខ្លួន ចេញពីភាពបាក់បែកនោះ?
ឱព្រះវរបិតាដែលគង់នៅស្ថានសួគ៌ សូមព្រះអង្គរំដោះទូលបង្គំឲ្យរួចផុតពីការឃុំឃាំងរបស់បាបទូលបង្គំ។
គម្រោងអានព្រះគម្ពីររយៈពេល១ឆ្នាំ: ទំនុកដំកើង ៨៧-៨៨ និង រ៉ូម ១៣