តើអ្នកបានកើតជាថ្មីហើយឬនៅ?
ដោយBren thackett
October 27, 2024
យ៉ូហាន ៣:១-៩
ប្រាកដមែន ខ្ញុំប្រាប់អ្នកជាប្រាកដថា បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ។ យ៉ូហាន ៣:៥
នៅថ្ងៃបុណ្យសព មេចុងភៅដែលមានតួនាទីចាត់ចែងម្ហូបអាហារ សម្រាប់កម្មវិធីបុណ្យសព បានឮគ្រូអធិប្បាយចែកចាយ អំពីការកើតជាថ្មី។ គាត់សួរគេថា តើការកើតជាថ្មី មានន័យដូចម្តេចខ្លះ? គាត់ថា គាត់មិនដែលឮពាក្យនេះពីមុនមកសោះ។ កូនប្រុសរបស់បុរសដែលបានទទួលមរណៈភាព ក៏បានឆ្លៀតឱកាសពន្យល់គាត់ អំពីអត្ថន័យនៃពាក្យនេះ តាមបទគម្ពីរយ៉ូហាន ជំពូក៣។
គាត់ថា “យើងម្នាក់ៗសុទ្ធតែកើតបានមួយដង នៅលើផែនដីនេះ។ ព្រះអម្ចាស់មិនប្រើជញ្ជីងវេទមន្តណាមួយ ដើម្បីថ្លឹងអំពើល្អ ជាមួយអំពើអាក្រក់របស់យើងនោះទេ។ តែដើម្បីឲ្យយើងរួចពីបាប ព្រះអង្គតម្រូវឲ្យយើងមានការកើតជាថ្មី ពីព្រះវិញ្ញាណបរិសុទ្ធ ជាការចាប់ផ្តើមជីវិតថ្មីក្នុងព្រះគ្រីស្ទ”។ គាត់និយាយបន្តទៀតថា “ហេតុនេះហើយ ព្រះយេស៊ូវបានសុគតនៅលើឈើឆ្កាង។ ព្រះអង្គបានបង់ថ្លៃលោះយើង ហើយបើកផ្លូវឲ្យយើងអាចមានជីវិតអស់កល្ប សម្រាប់រស់នៅជាមួយព្រះអង្គ។ យើងមិនអាចជួយសង្គ្រោះខ្លួនឯងបានទេ”។
ក្នុងបទគម្ពីរយ៉ូហាន ជំពូក៣ លោកនីកូដេមបានឆ្ងល់អំពីរបៀបដែលគាត់អាចរួចពីបាប ហើយចូលនគរព្រះ។ ក្នុងនាមគាត់ជាគ្រូសាសន៍យូដាម្នាក់ ដែលមានការរៀនសូត្រជ្រៅជ្រះក្នុងព្រះគម្ពីរ(ខ.១) គាត់បានទទួលស្គាល់ថា ព្រះយេស៊ូវមានលក្ខណៈខុសគេ ហើយការបង្រៀនរបស់ព្រះអង្គទៀតសោត ក៏មានអំណាច(ខ.២)។ គាត់ចង់ស្វែងយល់ពីព្រះអង្គដោយផ្ទាល់ ដូចនេះ គាត់ក៏បានទៅជួបព្រះយេស៊ូវទាំងយប់ ដើម្បីបកស្រាយចម្ងល់របស់គាត់។ លោកនីកូដេមប្រាកដជាបានជឿព្រះបន្ទូលរបស់ព្រះយេស៊ូវ ដែលបង្គាប់ឲ្យ “កើតជាថ្មី”(ខ.៧) ហើយគាត់ប្រាកដជាបានជឿព្រះអង្គ ព្រោះគាត់បានជួយគេរៀបចំព្រះសពព្រះអង្គសង្គ្រោះ សម្រាប់ការបញ្ចុះ បន្ទាប់ពីព្រះអង្គបានសុគតនៅលើឈើឆ្កាង(១៩:៣៩)។
នៅថ្ងៃនោះ មេចុងភៅក៏បានសន្យាថា នឹងអានបទគម្ពីរយ៉ូហានដំណឹងល្អយ៉ូហាន នៅក្នុងជំពូក៣ នៅពេលគាត់ត្រឡប់ទៅផ្ទះវិញ។ ចូរយើងកត់ចំណាំព្រះបន្ទូលព្រះយេស៊ូវជាប់នៅក្នុងចិត្តយើង ហើយចែកចាយជាមួយអ្នកដទៃ ដោយជំនួយពីព្រះអង្គ ដូចដែលកូនប្រុសរបស់បុរសដែលបានទទួលមរណៈភាពនោះ បានចែកចាយដល់មេចុងភៅផងដែរ។—Brent Hackett
តើការកើតជាថ្មីមានអត្ថន័យយ៉ាងណា ចំពោះអ្នក? តើអ្នកអាចចែកចាយអំពីអត្ថន័យនៃការកើតជាថ្មី ជាមួយអ្នកដទៃដូចម្តេចខ្លះ?
ឱព្រះវរបិតា ទូលបង្គំសូមអរព្រះគុណព្រះអង្គ ដែលបានអនុញ្ញាតឲ្យទូលបង្គំកើតជាថ្មី។
សូមព្រះវិញ្ញាណព្រះអង្គ ធ្វើការក្នុងចិត្តមនុស្សដែលទូលបង្គំចែកចាយ អំពីភាពចាំបាច់នៃការកើតជាថ្មី។
Learn more here: ODB.org/personal-relationship-with-god.
គម្រោងអានព្រះគម្ពីររយៈពេល១ឆ្នាំ: យេរេមា ១២-១៤ និង ២ធីម៉ូថេ ១