អំណោយដែលល្អឥតខ្ចោះ
ដោយNancy Gavilanes
December 10, 2024
កិច្ចការ ៣:១-១០
ឯប្រាក់ ហើយនិងមាស ខ្ញុំគ្មានទេ តែរបស់ដែលខ្ញុំមាន នោះខ្ញុំនឹងឲ្យដល់អ្នក។ កិច្ចការ ៣:៦
កាលខ្ញុំកំពុងធ្វើដំណើរបេសកកម្មរយៈពេលខ្លី ទៅប្រទេសពេរូដើម្បីផ្សាយដំណឹងល្អ មានយុវជនម្នាក់បានសុំលុយខ្ញុំ។ ដើម្បីសុវត្ថិភាព ក្រុមការងាររបស់ខ្ញុំបានទទួលការណែនាំថា បើមាននរណាម្នាក់សុំលុយយើង យើងមិនត្រូវឲ្យលុយគាត់ទេ ដូចនេះ តើធ្វើដូចម្តេចឲ្យខ្ញុំអាចឲ្យលុយគាត់បាន? បន្ទាប់មក ខ្ញុំក៏បាននឹកចាំ អំពីការឆ្លើយតបពីសាវ័កពេត្រុស និងសាវ័កយ៉ូហាន ចំពោះជនពិការជើងម្នាក់ ក្នុងបទគម្ពីរកិច្ចការ ជំពូក៣។ ខ្ញុំក៏បានពន្យល់គាត់ថា ខ្ញុំមិនអាចឲ្យប្រាក់ដល់គាត់បានទេ ប៉ុន្តែ ខ្ញុំអាចផ្សាយដំណឹងល្អអំពីសេចក្តីស្រឡាញ់របស់ព្រះដល់គាត់។ ពេលគាត់ប្រាប់យើងថា គាត់ជាក្មេងកំព្រា ខ្ញុំក៏បានប្រាប់គាត់ថា ព្រះអម្ចាស់ចង់ធ្វើជាឪពុករបស់គាត់។ ការនេះបាននាំឲ្យគាត់ប៉ះពាល់ចិត្តរហូតដល់ស្រក់ទឹកភ្នែក។ ខ្ញុំក៏បានប្រាប់សមាជិកពួកជំនុំក្នុងតំបន់ដែលបានទទួលយើងស្នាក់នៅ ឲ្យទំនាក់ទំនងគាត់ ដើម្បីបង្រៀនព្រះបន្ទូលដល់គាត់។
ជួនកាល យើងអាចមានអារម្មណ៍ថា ពាក្យសម្តីរបស់យើងហាក់ដូចជាមានការខ្វះខាតយ៉ាងខ្លាំង ប៉ុន្តែ ព្រះវិញ្ញាណបរិសុទ្ធអាចចម្រើនកម្លាំងយើង ខណៈពេលដែលយើងចែកចាយដល់អ្នកដទៃ អំពីព្រះយេស៊ូវ។
កាលសាវ័កពេត្រុស និងសាវ័កយ៉ូហានជួបបុរសម្នាក់ ក្នុងបរិវេណព្រះវិហារ ពួកគេដឹងថា ការចែកចាយអំពីព្រះគ្រីស្ទ គឺជាអំណោយដែលប្រសើរបំផុត។ “តែពេត្រុសនិយាយថា ឯប្រាក់ ហើយនិងមាស ខ្ញុំគ្មានទេ តែរបស់ដែលខ្ញុំមាន នោះខ្ញុំនឹងឲ្យដល់អ្នក គឺដោយសារព្រះនាមព្រះយេស៊ូវគ្រីស្ទ ពីស្រុកណាសារ៉ែត ចូរអ្នកក្រោកឡើងដើរទៅចុះ”(ខ.៦)។ បុរសនោះក៏បានទទួលសេចក្តីសង្គ្រោះ និងការប្រោសឲ្យជានៅថ្ងៃនោះ។ ព្រះអម្ចាស់បន្តប្រើយើង ដើម្បីនាំមនុស្សបាត់បង់ចូលមករកព្រះអង្គ។
ខណៈពេលដែលយើងស្វែងរកអំណោយដ៏ឥតខ្ចោះ សម្រាប់អ្នកដទៃ ក្នុងថ្ងៃណូអែលខាងមុខនេះ ចូរយើងចាំថា អំណោយពិតប្រាកដ គឺជាការស្គាល់ព្រះយេស៊ូវ និងសេចក្តីសង្គ្រោះអស់កល្បជានិច្ច ដែលព្រះអង្គបានប្រទាន។ ចូរយើងបន្តបើកចិត្តឲ្យព្រះអង្គប្រើយើង ដើម្បីនាំមនុស្សជាច្រើន ទៅរកព្រះអង្គសង្គ្រោះ។—Nancy Gavilanes
តើអ្នកអាចអធិស្ឋានឲ្យនរណាខ្លះ ក្នុងរដូវកាលបុណ្យណូអែលឆ្នាំនេះ? តើអ្នកអាចចែកចាយអំពីព្រះគ្រីស្ទដល់នរណាខ្លះ?
ឱព្រះវរបិតាដែលគង់នៅស្ថានសួគ៌ ទូលបង្គំសូមអរព្រះគុណសម្រាប់ការប្រទានព្រះយេស៊ូវ
ធ្វើជាអំណោយដ៏ឥតខ្ចោះដែលជួយសង្គ្រោះយើងខ្ញុំឲ្យរួចពីបាប។
គម្រោងអានព្រះគម្ពីររយៈពេល១ឆ្នាំ: ហូសេ ១-៤ និង វិវរណៈ ១