ការបង្ហាញការគ្រប់គ្រងរបស់ព្រះអង្គ
ដោយAlistair Begg
February 17, 2026
«ព្រះទ័យនៃស្ដេច នោះនៅក្នុងព្រះហស្តព្រះយេហូវ៉ា ដូចជាផ្លូវនៃទឹកហូរទាំងឡាយ ទ្រង់ឲ្យបែរហូរទៅខាងណាក៏តាមតែព្រះហឫទ័យ» ។ សុភាសិត ២១:១
ខគម្ពីរនេះបានឆ្លុះបញ្ចាំងអំពីគោលលទ្ធិនៃការគ្រប់គ្រងរបស់ព្រះ ។
នៅពេលដែលបុរស និងស្ត្រីទាំងឡាយចេញទៅធ្វើអាជីវកម្មរបស់ខ្លួន ព្រះហស្តរបស់ព្រះអង្គតែងតែចូលរួមជាមួយពួកគេជានិច្ច ។ សំណួរទីពីរ នៅក្នុងសៀវភៅសំណួរចម្លើយទីក្រុងថ្មី បានរាប់បញ្ចូលការសង្ខេបដ៏មានប្រយោជន៍អំពីគោលលទ្ធិនេះយ៉ាងដូចនេះថា «គ្មានអ្វីអាចកើតឡើង ដោយមិនបានឆ្លងកាត់ព្រះអង្គ និងតាមព្រះទ័យរបស់ព្រះអង្គឡើយ» ។ ព្រះគម្ពីរប៊ីបបានបង្រៀនយ៉ាងច្បាស់ថា ព្រះទ្រង់ប្រើព្រះចេស្តាទ្រង់ ក្នុងការបង្កើតពិភពលោកឲ្យចេញជារូបរាង្គឡើង ។ ក្នុងការគ្រប់គ្រងដ៏ឥតខ្ចោះរបស់ព្រះអង្គ ព្រះអង្គបន្តប្រើព្រះចេស្តាទ្រង់ ដើម្បីទ្រទ្រង់ចក្រវាល និងនាំអ្វីៗទាំងអស់ទៅរកទីបញ្ចប់របស់ពួកវា ដោយបង្រួបបង្រួមអ្វីៗទាំងអស់ នៅស្ថានសួគ៌ និងផែនដី នៅក្រោមព្រះគ្រីស្ទ (អេភេសូរ ១:៩-១០) ។
ព្រះទ្រង់ដឹកនាំហេតុការណ៍ទាំងអស់ តាមរបៀបអាថ៌កំបាំង ដោយមិនបំពានលក្ខណៈសម្បត្តិរបស់អ្វីៗ ឬរបស់បុគ្គលដែលចូលរួមក្នុងហេតុការណ៍នោះ ។ លោកគ្រូ ឆាល ប្រ៊ីជ (Charles Bridges) បានផ្តល់ឲ្យនូវការបកស្រាយដ៏មានប្រយោជន៍ អំពីបញ្ហានេះថា «ព្រះទ្រង់ធ្វើឲ្យអ្វីៗមានដំណើរទៅមុខ តាមរបៀបផ្សេងគ្នា: ព្រះអង្គធ្វើឲ្យវត្ថុគ្មានជីវិតបន្លាស់ទីដោយច្បាប់រូបវិទ្យា ធ្វើឲ្យសត្វមានចលនា ដោយសភាវគតិ និងបំណងចិត្ត ធ្វើឲ្យមនុស្សមានចលនា មានហេតុផល និងការជំរុញចិត្ត ហើយព្រះអង្គប្រោសលោះមនុស្ស ក្នុងចិត្តរបស់ពួកគេ ដោយកិច្ចការប្រកបដោយព្រះគុណ» ។17 ក្នុងការរៀបចំ និងគោលបំណងរបស់ព្រះ ព្រះអង្គប្រើហេតុ និងផល នៃព្រឹត្តិការណ៍ធម្មជាតិ កាលៈទេសៈ និងការសម្រេចចិត្តដោយសេរី ដើម្បីសម្រេចគោលដៅដ៏រុងរឿងរបស់ព្រះអង្គ ។ ព្រះអង្គបានប្រើគំរូនេះម្តងហើយម្តងទៀត ក្នុងព្រះគម្ពីរប៊ីបទាំងមូល ទោះតាមរយៈស្តេចនេប៊ូក្នេសា ស្តេចផារ៉ោន ស្តេចហេរ៉ូឌ លោក ពីឡាត់ ឬតួអង្គផ្សេងទៀតក្តី ។ ទោះអ្នកដឹកនាំនៅផែនដីតាំងខ្លួនទាស់ប្រឆាំងនឹងព្រះអម្ចាស់ ខណៈពេលដែលពួកគេប្រើឆន្ទៈដែលបះបោរក៏ដោយ ក៏ទន្ទឹមនឹងនោះ ពួកគេមានចំណែកនៅក្នុងផែនការនៃសេចក្តីសង្គ្រោះ ដែលព្រះអង្គបានរៀបចំទុកជាមុន (ទំនុកដំកើង ២:១-២ និង កិច្ចការ ៤:២៥-២៦) ។ ព្រះអង្គប្រើផែនការទាំងអស់ សូម្បីតែបំណងចិត្ត នៃមនុស្សដែលមានអំណាចបំផុត ដើម្បីសម្រេចបំណងព្រះទ័យទ្រង់ ។
សម្រាប់អ្នកដែលជាកម្មសិទ្ធិរបស់ព្រះយេស៊ូវ ការគ្រប់គ្រងរបស់ព្រះនាំមកនូវសន្តិសុខក្នុងចិត្ត ។ ពេលណាយើងមានការបាក់ទឹកចិត្ត ដោយសារយើងឃើញច្បាស់ថា ពួកមនុស្សអាក្រក់កំពុងចម្រុងចម្រើន ហើយគេហៅការអាក្រក់ថាការល្អ ព្រះគម្ពីរបានរំឭកយើងថា ព្រះទ្រង់មានអំណាចគ្រប់គ្រងមកលើអ្វីៗគ្រប់យ៉ាង ។ ជាការពិតណាស់ ការទាំងអស់នេះមិនធ្វើឲ្យព្រះអង្គភ្ញាក់ផ្អើល ឬបរាជ័យឡើយ ព្រោះជាញឹកញាប់ ព្រះអង្គប្រើពួកមនុស្សអាក្រក់ ដើម្បីការពារ និងឃុំគ្រងរាស្រ្តរបស់ព្រះអង្គ ហើយនៅពេលផ្សេងទៀត ព្រះអង្គប្រើពួកមនុស្សអាក្រក់ ដើម្បីសម្អាតរាស្រ្តទ្រង់ឲ្យបរិសុទ្ធ ។ បន្ទាប់ពីព្រឹត្តិការណ៍នោះកើតឡើង យើងអាចយល់គោលបំណងរបស់ព្រះអង្គ ហើយក្នុងអំឡុងព្រឹត្តិការណ៍នោះ យើងគ្រាន់តែត្រូវទុកចិត្តការគ្រប់គ្រងរបស់ព្រះអង្គ ។
ព្រះទ្រង់គឺជាព្រះវរបិតា ដែលបានព្យាយាមនាំអ្នកចូលមករកអង្គទ្រង់ និងធ្វើឲ្យអ្នកក្លាយជារាស្រ្តរបស់ព្រះអង្គ ។ សូម្បីក្នុងពេលសព្វថ្ងៃ អ្នកទំនងជាកំពុងគិតថា កាលៈទេសៈរបស់អ្នក ហាក់ដូចជាផ្ទុយនឹងបំណងព្រះទ័យព្រះ ហើយធ្វើឲ្យអ្នកមានការភាន់ភាំង ។ ចូរចាំថា អំណាចគ្រប់គ្រងរបស់ព្រះអង្គ ធ្វើឲ្យយើងនឹកចាំអំពីគោលបំណងរបស់ព្រះអង្គ ហើយច្រៀងថា :
ខ្ញុំទុកចិត្តព្រះ ខ្ញុំដឹងថា ព្រះអង្គយកព្រះទ័យទុកដាក់ចំពោះខ្ញុំ ។
នៅលើជ្រោះ ឬនៅក្នុងសមុទ្រដែលមានព្យុះ
ទោះមានទឹករលកធំៗប៉ុណ្ណាក៏ដោយ ព្រះអង្គរក្សាវិញ្ញាណរបស់ខ្ញុំ ។
ព្រះវរបិតានៃខ្ញុំដែលគង់នៅស្ថានសួគ៌ មើលថែខ្ញុំ ។ 18
ខគម្ពីរជញ្ជឹងគិត៖ កិច្ចការ ៤:២៤-៣១
គម្រោងអានព្រះគម្ពីររយៈពេល១ឆ្នាំ៖ និក្ខមនំ ៤-៦ និង ម៉ាកុស ១៥:២៦-៤៧