មានបំណងចិត្តល្អ និងអាក្រក់លាយគ្នា
ដោយAlistair Begg
February 18, 2026
«មានខ្លះសំដែងពីព្រះគ្រីស្ទ ដោយចិត្តឈ្នានីស ហើយចង់ឈ្លោះប្រកែកមែន តែខ្លះ ដោយចិត្តស្មោះសរវិញ ។ ឯពួកមួយ គេសំដែងពីព្រះគ្រីស្ទ ដោយចិត្តទទឹង មិនមែនដោយចិត្តស្អាតទេ នោះគឺដោយស្មានថា គេនឹងបន្ថែមសេចក្ដីទុក្ខលំបាកដល់ចំណងខ្ញុំទៀត ។ ឯពួកមួយទៀត គេប្រព្រឹត្តដោយស្រឡាញ់វិញ ដោយដឹងថា ខ្ញុំបានតាំងឡើង សំរាប់ដោះសាពីដំណឹងល្អ ។ ចុះតើអំពល់អ្វី ទោះបើយ៉ាងណាក៏ដោយ ទោះដោយពើ ឬដោយសេចក្ដីស្មោះក្ដី គង់តែគេសំដែងពីព្រះគ្រីស្ទដែរ ដូច្នេះ ខ្ញុំមានសេចក្ដីអំណរណាស់ ក៏នឹងចេះតែមានអំណរតទៅមុខទៀត» ។ ភីលីព ១:១៥-១៨
ក្នុងសំបុត្របេសកជន ដែលសាវ័កប៉ុលបានសរសេរផ្ញើទៅពួកជំនុំ នៅទីក្រុងភីលីព គាត់បាននិយាយត្រង់ៗ ដោយមិនលាក់លៀម ។ ទោះគាត់បានចែកចាយអំពីដំណឹងដែលលើកទឹកចិត្តក៏ដោយ ក៏គាត់មិនបាននិយាយអំពីរឿងរីករាយរហូតដែរ ។ មានអ្នកខ្លះបានផ្សាយដំណឹងល្អ ដោយគោលបំណងអាក្រក់ ។ ពួកគេមិនបានផ្សាយ ដោយបំណងល្អទេ តែដោយចិត្តឈ្នានីស និងដើម្បីបង្កការលំបាកដល់គាត់ ។
ទោះជាយ៉ាងណាក៏ដោយ ចេតនាអាក្រក់របស់អ្នកដទៃ មិនបានធ្វើជាកត្តាកំណត់មកលើអាកប្បកិរិយារបស់គាត់ឡើយ ។ ការចែកចាយព្រះបន្ទូលបែបអាត្មានិយមរបស់ពួកគេ មិនបានធ្វើឲ្យគាត់គេងមិនលក់ ឬរារាំងការប្ដេជ្ញាចិត្តរបស់គាត់ ដែលចង់ឃើញនគរព្រះចម្រើនឡើងនោះឡើយ ។ គាត់មានចិត្តឆេះឆួល ចង់ឲ្យគេផ្សាយដំណឹងល្អដ៏ពិត ហេតុនេះហើយ គាត់មិនបានខ្វល់ខ្វាយជាបឋម អំពីហេតុផលដែលអ្នកដទៃផ្សាយព្រះបន្ទូលនោះទេ ដរាបណាពួកគេនៅតែផ្សាយអំពីព្រះគ្រីស្ទ ។ គាត់ខ្វល់អំពីសិរីល្អរបស់ព្រះ គឺមិនមែនខ្វល់អំពីមុខមាត់ ឬសុវត្ថិភាពរបស់គាត់ទេ ។
យើងប្រហែលជាកំពុងស្ថិតក្នុងស្ថានភាពដូចសាវ័កប៉ុលផងដែរ ដោយយើងត្រូវបានហ៊ុមព័ទ្ធទៅដោយមនុស្សដែលចែកចាយសេចក្តីជំនឿ ដោយបំណងចិត្តមិនត្រឹមត្រូវ ។ ប៉ុន្តែ បើយើងអនុញ្ញាតឲ្យភាពខុសឆ្គងរបស់ពួកគេ ធ្វើជាកត្តាកំណត់ មកលើអាកប្បកិរិយា ឬសកម្មភាពរបស់យើង នោះយើងនឹងមិនអាចធ្វើអ្វីកើតឡើយ ។ យើងនឹងចំណាយពេល និងកម្លាំងច្រើនពេក ដើម្បីចោទសួរអំពីបំណងចិត្តរបស់អ្នកដទៃជាប់ជានិច្ច ឬបន្តប្រកែក និងរិះគន់ទង្វើរបស់ពួកគេ ។ ការធ្វើដូចនេះ នឹងធ្វើឲ្យអារក្សចំណេញ ដោយយើងបែកអារម្មណ៍ ចេញពីការផ្សាយដំណឹងល្អនៃព្រះយេស៊ូវគ្រីស្ទ ។ ការល្បួងនេះមានអំណាចណាស់! ប៉ុន្តែ សាវ័កប៉ុលមិនបានធ្លាក់ចូលក្នុងអន្ទាក់នេះទេ ។
ពុំនោះទេ យើងប្រហែលជាតយុទ្ធនឹងបំណងចិត្តមិនត្រឹមត្រូវ ដែលយើងមាន ក្នុងការផ្សាយដំណឹងល្អ ។ យើងអាចប្រែក្លាយជាផ្ដោតទៅលើខ្លួនឯង និងមានអំនួតដែលគួរឲ្យខ្លាច ។ នេះបញ្ហាប្រឈមលំបាកបំផុត ដែលយើងរាល់គ្នាអាចជួបប្រទះ ។ សូម្បីតែនៅក្នុងរឿងនៃសេចក្តីជំនឿ យើងច្រើនតែចង់ឲ្យអ្នកដទៃទទួលស្គាល់យើង ហេតុនេះហើយ យើងធ្វើរឿងដ៏ត្រឹមត្រូវ ដោយបំណងចិត្តមិនត្រឹមត្រូវ (ឬភាគច្រើនយើងមានបំណងចិត្តត្រឹមត្រូវ លាយឡំជាមួយបំណងចិត្តមិនត្រឹមត្រូវ) ។ ទន្ទឹមនឹងនោះ យើងរកឃើញថា ការច្រណែនឈ្នានីសក៏រារាំងយើង មិនឲ្យអរសប្បាយ នឹងផលផ្លែនៅក្នុងជីវិត និងការងាររបស់អ្នកដទៃ ។ ប៉ុន្តែ យើងអរព្រះគុណព្រះ ដែលព្រះអង្គនៅតែប្រើភាជនៈដែលប្រេះបែកដូចយើង ឲ្យបន្តនាំព្រះរាជសាររបស់ព្រះអង្គ ដែលជាអំណោយដ៏ធំប្រសើរ ។
ដូចនេះ ចូរយកគំរូតាមសាវ័កប៉ុល ដោយផ្ដោតទៅលើសេចក្តីសប្បុរសរបស់ព្រះយេស៊ូវ និងការចម្រើនឡើង នៃការផ្សាយដំណឹងល្អ ទោះកាលៈទេសៈនៅជុំវិញអ្នកមានលក្ខណៈដូចម្តេច ឬអ្នកសង្ស័យថា អ្នកដទៃ ឬខ្លួនឯងមានបំណងចិត្តមិនត្រឹមត្រូវ ក្នុងការបម្រើព្រះក៏ដោយ ។ ចូរព្យាយាមជម្រុះចោលអំនួត និងមហិច្ឆតារបស់អ្នក ដើម្បីឲ្យអ្នកខ្វល់ខ្លាំងបំផុត អំពីសិរីល្អរបស់ព្រះអម្ចាស់វិញ ហើយទន្ទឹមនឹងនោះ ចូរបន្តចែកចាយអំពីព្រះអង្គ ដល់មនុស្សនៅជុំវិញអ្នក ។ ដែលសំខាន់បំផុតនោះគឺ អ្នកដទៃបានឮការផ្សាយអំពីព្រះយេស៊ូវ ហើយយ៉ាងនោះ យើងអាចមានអំណរទាំងអស់គ្នា ។
ខគម្ពីរជញ្ជឹងគិត៖ អេសាយ ៥២:៧-១០
គម្រោងអានព្រះគម្ពីររយៈពេល១ឆ្នាំ៖ និក្ខមនំ ៧-៨ និង ម៉ាកុស ១៦