ការថ្វាយបង្គំជាប់ជានិច្ច
ដោយAlistair Begg
May 18, 2026
«កំពុងដែលទ្រង់ប្រទានពរ នោះព្រះវរបិតាបានញែកទ្រង់ចេញពីគេ លើកឡើងទៅស្ថានសួគ៌ទៅ ។
គេក៏ក្រាបថ្វាយបង្គំទ្រង់ រួចត្រឡប់ទៅឯក្រុងយេរូសាឡិមវិញ ដោយអំណរជាខ្លាំង ។ ក៏នៅក្នុងព្រះវិហារជានិច្ច ទាំងសរសើរ ហើយលើកដំកើងព្រះ» ។ លូកា ២៤:៥១-៥៣
កាលព្រះយេស៊ូវយាងឡើងស្ថានសួគ៌វិញ សាក្សីដែលបានឃើញព្រះអង្គត្រូវបាន «លើកឡើងទៅស្ថានសួគ៌» ក៏បានឆ្លើយតបចំពោះព្រឹត្តិការណ៍នេះ ដោយការថ្វាយបង្គំព្រះអង្គ ។ ពួកគេក៏បានដឹងដូចយើងផងដែរថា មានតែព្រះអង្គទេ ដែលសក្តិសមនឹងទទួលការថ្វាយបង្គំ ។
ក្នុងពេលចុងក្រោយនៃការចាកចេញនេះ គ្រប់ទាំងចម្ងល់ទាំងអស់ដែលពួកគេមាន ចំពោះព្រះអង្គ ប្រាកដជាបានស្រាយបំភ្លឺ ខណៈពេលដែលពួកគេបានឃើញព្រះគ្រីស្ទ មានរូបកាយឧត្តម យាងឡើងទៅព្រះវរបិតា ហើយការនេះបាននាំឲ្យពួកគេមានអំណរណាស់ ។ ការឆ្លើយតបរបស់ពួកគេ ប្រហែលជាបានធ្វើឲ្យយើងនឹកចាំ អំពីបុរសកើតឃ្លង់ម្នាក់ ក្នុងបទគម្ពីរ លូកា ១៧:១១-១៨ ដែលព្រះយេស៊ូវបានប្រោសឲ្យជា ។ គាត់វិលមករកព្រះអង្គវិញ ក្រាបនៅទៀបព្រះបាទទ្រង់ ហើយអរព្រះគុណព្រះអង្គ ។
ប៉ុន្តែ អ្នកជឿទាំងអស់នេះមិនគ្រាន់តែបានឆ្លើយតប ដោយការថ្វាយបង្គំ នៅពេលនោះប៉ុណ្ណោះទេ ។ ពួកគេក៏បាន «ត្រឡប់ទៅឯក្រុងយេរូសាឡិមវិញ ដោយអំណរជាខ្លាំង» ដែលនៅទីនោះ ពួកគេបន្តអរព្រះគុណព្រះ សម្រាប់ការអ្វីដែលព្រះអង្គបានធ្វើ ហើយគោរពស្រឡាញ់ព្រះអង្គ ដោយបានឃើញសេចក្តីអស្ចារ្យនៃព្រះយេស៊ូវ ។ នៅពេលនោះ ការថ្វាយបង្គំ ក្តីអំណរ និងការស្តាប់បង្គាប់ ក៏បានក្លាយជាសញ្ញាសំគាល់របស់ពួកគេ ។ ព្រះយេស៊ូវបានប្រាប់ពួកគេថា «ហើយមើល ខ្ញុំនឹងឲ្យសេចក្ដីសន្យារបស់ព្រះវរបិតា មកសណ្ឋិតលើអ្នករាល់គ្នា ចូរអ្នករាល់គ្នានៅតែក្នុងក្រុងយេរូសាឡិម ដរាបដល់ព្រះចេស្ដាពីស្ថានលើ បានមកគ្របដណ្ដប់លើអ្នករាល់គ្នា» (លូកា ២៤:៤៩) ។ ហើយពួកគេក៏បានធ្វើតាមបង្គាប់ព្រះអង្គ ។
ព្រះគ្រីស្ទសក្តិសមនឹងទទួលការថ្វាយបង្គំ និងការស្តាប់បង្គាប់ទាំងអស់របស់យើង ។ ព្រះអង្គគឺជាប្រភពនៃក្តីអំណររបស់យើង ។ យើងផ្ដោតចិត្តទៅលើព្រះអង្គ ពេលយើងសរសើរដំកើងព្រះអង្គ ។ ហើយព្រះអង្គទទួលស្គាល់យើង ។ ពួកសាវ័កនៅសម័យដើម បានយល់អំពីរឿងនេះ ។ ចុះចំណែកយើងវិញ ? ព្រះអង្គសព្វព្រះទ័យនឹងការថ្វាយបង្គំ ការស្តាប់បង្គាប់ ក្តីអំណរ និងការសរសើរដំកើងរបស់យើង មិនមែនដោយសារការអ្វីមួយដែលយើងបានធ្វើ តែដោយសារការអ្វីដែលព្រះអង្គកំពុងធ្វើនៅក្នុងយើង ដោយព្រះគុណទ្រង់ ។ ដោយជំនួយមកពីព្រះអង្គ យើងអាចទូលសូមសេចក្តីជំនឿមិនងាករេ ចំពោះព្រះរាជបុត្រានៃព្រះដែលបានយាងឡើងស្ថានសួគ៌វិញ គឺជំនឿដែលបណ្តាលចិត្តយើងឲ្យថ្វាយបង្គំព្រះអង្គ និងដើរតាមគំរូព្រះអង្គ នៅក្នុងការគិត ការនិយាយស្តី និងអ្វីៗទាំងអស់ដែលយើងធ្វើ ។ បើអ្នកពិបាកថ្វាយបង្គំ ស្គាល់ក្តីអំណរ និងស្តាប់បង្គាប់ព្រះអម្ចាស់នៅថ្ងៃនេះ ចូរទូលសូមព្រះអង្គជួយភ្នែកនៃសេចក្តីជំនឿរបស់អ្នក ផ្ដោតទៅលើព្រះអង្គសង្គ្រោះរបស់អ្នក ដែលមានព្រះជន្មរស់ឡើងវិញ បានយាងឡើងស្ថានសួគ៌វិញ និងកំពុងគ្រងរាជ្យ ។ ទាល់តែអ្នកបានស្គាល់ព្រះយេស៊ូវ ដូចពួកសាវ័កដែរ ទើបអ្នកអាចទទួលការបណ្តាលចិត្តឲ្យថ្វាយបង្គំ ដោយអំណរ ហើយអ្នកនឹងស្តាប់បង្គាប់ដោយអំណរ មិនមែនគ្រាន់តែដើម្បីបំពេញតួនាទីទៀតឡើយ ។
ខគម្ពីរជញ្ជឹងគិត៖ ទំនុកដំកើង ១៤៦
គម្រោងអានព្រះគម្ពីររយៈពេល១ឆ្នាំ៖ ១ពង្សាវតាក្សត្រ ១៤-១៥ និង ម៉ាថាយ ៩:១៨-៣៨