តើមានកិច្ចការអ្វីដែលល្អជាង?
ដោយAnne Cetas
October 6, 2023
១ធីម៉ូថេ ៤:៦-១៦ ដ្បិតគឺដោយហេតុនោះបានជាយើងខ្ញុំខំធ្វើការ ទាំងត្រូវគេត្មះតិះដៀល ពីព្រោះយើងខ្ញុំមានសេចក្តីសង្ឃឹម ដល់ព្រះដ៏មានព្រះជន្មរស់។ ១ធីម៉ូថេ ៤:១០ កាលលោកអេរិក(Eric) ស្ថិតក្នុងវ័យជាង២០ឆ្នាំ គាត់បានឮគេចែកចាយថា ព្រះយេស៊ូវស្រឡាញ់គាត់។ គាត់ក៏បានចាប់ផ្តើមចូលរួមកម្មវិធីថ្វាយបង្គំនៅព្រះវិហារ ដែលនៅទីនោះ គាត់ក៏បានជួបមនុស្សម្នាក់ ដែលបានជួយគាត់ឲ្យលូតលាស់ និងស្គាល់ព្រះគ្រីស្ទកាន់តែច្បាស់។ មិនយូរប៉ុន្មាន គ្រូបង្គោលរបស់គាត់ក៏បានចាត់តាំងគាត់ ឲ្យបង្រៀនក្មេងប្រុសៗ ក្នុងក្រុមតូចមួយ នៅព្រះវិហារ។ ក្នុងរយៈពេលប៉ុន្មានឆ្នាំនោះ ព្រះទ្រង់បានបណ្តាលចិត្តអេរិក ឲ្យជួយយុវជនដែលងាយរងគ្រោះ ក្នុងទីក្រុងរបស់គាត់ និងទៅសួរសុខទុក្ខមនុស្សចាស់ ហើយក៏បានបង្ហាញភាពរួសរាយ ចំពោះអ្នកជិតខាងរបស់គាត់ ដើម្បីថ្វាយព្រះកិត្តិនាមដល់ព្រះអង្គ។ សព្វថ្ងៃនេះ ក្នុងវ័យជិត៦០ឆ្នាំ លោកអេរិកបានបង្ហាញការដឹងគុណ ចំពោះព្រះអម្ចាស់ដែលបានបង្រៀនគាត់ ឲ្យចេះបម្រើអ្នកដទៃ កាលគាត់នៅក្មេង។ គឺដូចដែលគាត់បានបកស្រាយថា គាត់មានចិត្តឆេះឆួលចង់ចែកចាយ អំពីសេចក្តីសង្ឃឹម ដែលគាត់បានរកឃើញក្នុងព្រះយេស៊ូវ។ តើមានអ្វីដែលប្រសើរជាងការបម្រើព្រះអង្គ? ម្តាយ និងជីដូនរបស់លោកធីម៉ូថេបានចែកចាយសេចក្តីជំនឿដល់គាត់ តាំងពីគាត់នៅក្មេង(២ធីម៉ូថេ ១:៥)។ គាត់ទំនងជាស្ថិតក្នុងវ័យជំទង់ កាលគាត់បានជួបសាវ័កប៉ុល ដែលបានមើលឃើញសក្ដានុពលរបស់ការងារដែលគាត់ធ្វើថ្វាយព្រះគ្រីស្ទ ហើយក៏បាននាំគាត់ ទៅធ្វើដំណើរបេសកកម្ម(កិច្ចការ ១៦:១-៣)។ សាវ័កប៉ុលក៏បានក្លាយជាគ្រូបង្គោលរបស់គាត់ ក្នុងការងារបម្រើព្រះ និងការរស់នៅ។ សាវ័កប៉ុលបានលើកទឹកចិត្តគាត់ ឲ្យសិក្សាព្រះបន្ទូលព្រះ ឲ្យមានចិត្តក្លាហាន ក្នុងការប្រឈមមុខដាក់ការបង្រៀនខុសឆ្គង ហើយប្រើអំណោយទានរបស់គាត់ បម្រើព្រះ(១ធីម៉ូថេ ៤:៦-១៦)។ ហេតុអ្វីសាវ័កប៉ុលចង់ឲ្យលោកធីម៉ូថេមានចិត្តស្មោះត្រង់ ក្នុងការបម្រើព្រះ? ទាក់ទងនឹងសំណួរនេះ គាត់បានសរសេរក្នុងសំបុត្ររបស់គាត់ថា “ពីព្រោះយើងខ្ញុំមានសេចក្តីសង្ឃឹម ដល់ព្រះដ៏មានព្រះជន្មរស់ ដែលទ្រង់ជាព្រះអង្គសង្គ្រោះនៃមនុស្សទាំងឡាយ”(ខ.១០)។ ព្រះយេស៊ូវជាក្តីសង្ឃឹមរបស់យើង និងជាព្រះអង្គសង្គ្រោះនៃពិភពលោក។ តើយើងអាចធ្វើកិច្ចការអ្វី ដែលប្រសើរជាងការបម្រើព្រះអង្គ?—Anne Cetas
តើអ្នកបានរៀនសូត្រអ្វីខ្លះអំពីព្រះគ្រីស្ទ ដែលអ្នកចង់ឲ្យនរណាម្នាក់ដឹង? តើមាននរណាខ្លះ ដែលអ្នកអាចជួយបាន ហើយតើអ្នកត្រូវការជំនួយពីនរណា ក្នុងការចម្រើនឡើងនៃសេចក្តីជំនឿ?
ឱព្រះអម្ចាស់ សូមព្រះអង្គប្រទានទូលបង្គំនូវចិត្តដែលចង់នាំមកនូវក្តីសង្ឃឹមរបស់ព្រះអង្គ ដល់មនុស្សជុំវិញទូលបង្គំ។
គម្រោងអានព្រះគម្ពីររយៈពេល១ឆ្នាំ : អេសាយ ២៦-២៧ និង ភីលីព ២