ព្រឹក
អត់ទោសឲ្យ ដោយគ្មានកំណត់
ដោយElisa Morgan
April 23, 2025
ម៉ាថាយ ១៨:២១-៣៥
ដូច្នេះ តើមិនគួរឲ្យឯងអាណិតមេត្តាដល់គូកនឯង ដូចជាអញបានអាណិតមេត្តាដល់ឯងដែរទេឬអី? ម៉ាថាយ ១៨:៣៣
ក្នុងខ្សែភាពយន្តគំនូរជីវចល មានចំណងជើងថា រឿងរបស់ឧបករណ៍ក្មេងលេង ក្មេងប្រុសម្នាក់មានឧបករណ៍ក្មេងលេងជាច្រើន ដែលប្រែជាមានជីវិតរស់រវើក នៅពេលណាគាត់ចាកចេញពីបន្ទប់ ឬគេងលក់។ តួអង្គតុក្កតាមួយនោះ ជាអវកាសយានិក ឈ្មោះ ប៊ូស ឡៃយា(Buzz Lightyear) បានបង្ហាញសមត្ថភាពរបស់ខ្លួន ក្នុងការហោះហើរ ក្នុងបន្ទប់គេងនោះ ហើយក៏បានប្រើពាក្យដ៏ល្បីល្បាញមួយឃ្លាថា គាត់អាចហោះហើរ “គ្មានដែនកំណត់ ហើយលើសពីគ្មានដែនកំណត់ទៀត”។
ពាក្យមួយឃ្លានេះ បានធ្វើឲ្យមនុស្សជាច្រើនមានការភាន់ច្រឡំ។ តើភាពអស់កល្បជានិច្ច មិនមែនជារយៈពេលយូរបំផុតដែលយើងអាចទៅដល់ទេឬ? តើធ្វើដូចម្តេច ឲ្យអាចមានអ្វីមួយ ដែល “វែងជាង” ភាពអស់កល្បជានិច្ច? លោកអៀន ស្ទូវើត(Ian Stewart) ជាអ្នកប្រាជ្ញគណិតវិទ្យា បានដកស្រង់ទ្រឹស្តីរបស់អ្នកប្រាជ្ញទស្សនវិជ្ជាក្រិកបុរាណថា នៅបន្ទាប់ពីភាពអស់កល្បជានិច្ច គឺមានភាពអស់កល្បជានិច្ច ដែលធំជាងនេះទៀត ដែលចេះតែបន្តគ្នា ពីមួយទៅមួយទៀតឥតឈប់ឈរ។
ព្រះយេស៊ូវមិនបានមានបន្ទូលថា ពេលអស់កល្បជានិច្ច គឺជាពេលវេលាដែលបន្តពីមួយទៅមួយទៀតជាច្រើនដងនោះទេ តែព្រះអង្គបានមានបន្ទូលអំពីការអត់ទោស ដែលយើងត្រូវមានចំពោះអ្នកដទៃជាច្រើនលើកច្រើនសារ។ កាលសាវ័កពេត្រុសសួរព្រះអង្គ អំពីការអត់ទោសឲ្យអ្នកដទៃ គាត់ទូលសួរព្រះអង្គថា “ព្រះអម្ចាស់អើយ បើបងឬប្អូនធ្វើបាបនឹងខ្ញុំ នោះត្រូវឲ្យខ្ញុំអត់ទោសឲ្យគេដល់ប៉ុន្មានដង តើដល់៧ដងឬអី?” ព្រះយេស៊ូវទ្រង់មានបន្ទូលតបថា “ខ្ញុំមិនថា ឲ្យអ្នកអត់ទោសត្រឹមតែ៧ដងទេ គឺដល់៧ចិតសិបដងទៅទៀត”(ម៉ាថាយ ១៨:២១-២២)។ ព្រះយេស៊ូវក៏បានមានបន្ទូលអំពីរឿងប្រៀបប្រដូច ដោយប្រៀបធៀបអ្នកបម្រើដែលមានសេចក្តីមេត្តា និងអ្នកបម្រើដែលគ្មានសេចក្តីមេត្តា ដើម្បីបង្រៀនថា នៅពេលដែលនរណាម្នាក់ពិតជាសោកស្តាយចំពោះកំហុសរបស់ខ្លួន ព្រះអង្គមិនបានកំណត់ថា យើងអាចអត់ទោសឲ្យគេបានតែប៉ុន្មានដងនោះឡើយ។ តែយើងត្រូវអត់ទោសឲ្យអ្នកដទៃ ដូចដែលព្រះទ្រង់បានអត់ទោសឲ្យយើងដែរ(ខ.៣៣)។ គឺអត់ទោសឲ្យគេម្តងហើយម្តងទៀត ដោយគ្មានកំណត់។
ការអត់ទោសឲ្យគេដូចនេះ ហាក់ដូចជាលើសពីលទ្ធភាពដែលយើងអាចធ្វើបាន។ ហេតុនេះហើយយើងចាំបាច់ត្រូវទូលសូមជំនួយមកពីព្រះអង្គ។ ទាល់តែយើងពឹងផ្អែកកម្លាំងមកពីព្រះអង្គ ទើបយើងអាចធ្វើបាន។ មនុស្សដែលបានទទួលការអត់ទោសបាបពីព្រះ ក៏អត់ទោសឲ្យអ្នកដទៃផងដែរ។ គឺអត់ទោសឲ្យគេ ដោយគ្មានកំណត់។—Elisa Morgan
តើនរណាខ្លះចង់បានការអត់ទោសរបស់អ្នក? តើការអត់ទោសឲ្យអ្នកដទៃ តាមរបៀបដែលគោរពពួកគេ និងថ្វាយព្រះកិត្តិនាមដល់ព្រះ មានន័យដូចម្តេចចំពោះអ្នក?
ឱព្រះវរបិតា សូមព្រះអង្គជួយទូលបង្គំឲ្យមានចិត្តសប្បុរស និងមានប្រាជ្ញា ក្នុងការអត់ទោសឲ្យអ្នកដទៃ ដូចដែលព្រះអង្គបានអត់ទោសឲ្យទូលបង្គំ។
Visit ODBU.org/SF107 to learn more about how to find the strength to forgive others and how this can bring you peace.
គម្រោងអានព្រះគម្ពីររយៈពេល១ឆ្នាំ : ២សាំយ៉ូអែល ១៦-១៨ និង លូកា ១៧:២០-៣៧
ប្រភេទ
ល្ងាច
ជីវិតដែលបង្ហូរចេញទៅមនុស្សទាំងអស់ (សៀវភៅសេចក្ដីពិតសម្រាប់ជីវិត)
ដោយAlistair Begg
April 23, 2025
«ឯព័ទ្ធជុំវិញទីក្រុងនោះ ត្រូវជា១ម៉ឺន៨ពាន់ខ្នាត ហើយតាំងពីថ្ងៃនោះតទៅ ទីក្រុងនោះត្រូវមានឈ្មោះថា “ព្រះយេហូវ៉ាទ្រង់គង់នៅទីនេះ”» (អេសេគាល ៤៨:៣៥)។
រឿងល្អបំផុតមិនទាន់កើតឡើងនៅឡើយទេ។
ពួកអ៊ីស្រាអែលត្រូវគេនិរទេសអស់រយៈពេល៦ទសវត្សរ៍ បន្ទាប់ពីស្ដេច ស៊ីរូស នៃចក្រភពពើស៊ីឡើងកាន់អំណាចក្នុងសតវត្សរ៍ទី៦ មុនគ.ស។ មិនយូរប៉ុន្មាន ស្ដេចអង្គនេះបានអនុញ្ញាតឲ្យពួកអ៊ីស្រាអែលជាឈ្លើយសឹកមួយចំនួនវិលត្រឡប់ទៅស្រុកកំណើតរបស់ខ្លួនវិញ។ លោក អែសរ៉ា និងលោក នេហេមា ក៏បានដឹកនាំបណ្តាជនដោយមានក្តីសង្ឃឹម ក្នុងដំណើរវិលត្រឡប់ទៅវិញ និងការសាងសង់ព្រះវិហារ ព្រមទាំងជួសជល់កំផែងទីក្រុងយេរូសាឡឹមឡើងវិញ។
ពួកអ្នកវិលត្រឡប់មកវិញមានចំនួនតិច ហើយក៏បានប្រឈមមុខដាក់ការប្រឆាំងជាច្រើន។ ពួកគេមានភាពជោគជ័យក្នុងការប្រឹងប្រែងរបស់ខ្លួន តែពួកគេមិនទាន់មានជ័យជម្នះពិតប្រាកដទេ។ តាមពិត ពួកដែលមានវ័យចាស់ជាង និងមានប្រាជ្ញាជាងបានទួញយំ នៅពេលដែលពួកគេចាក់គ្រឹះព្រះវិហារ ព្រោះពួកគេដឹងថា ព្រះវិហារដែលពួកគេកំពុងសាងសង់ មិនមែនជាអ្វីដែលពួកហោរាបានរំពឹងគិតនោះទេ (អែសរ៉ា ៣:១០-១២)។
ក្តីប្រាថ្នារបស់អ្នកដែលបានទួញយំនោះ គឺបានឆ្លុះបញ្ចាំងអំពីការថ្លែងទំនាយចុងក្រោយរបស់ហោរា អេសេគាល ដែលផ្តល់ឲ្យនូវក្តីសង្ឃឹមដ៏ធំថា ថ្ងៃណាមួយ ព្រះវិហារថ្មីនឹងត្រូវគេសាងសង់ឡើង ក្នុងទីក្រុងយេរូសាឡឹមដែលមានទំហំធំជាងមុន។ ព្រះវិហារនោះនឹងមានភាពអស្ចារ្យជាងព្រះវិហារទីមួយ ដែលគេធ្លាប់បានឃើញ ហើយព្រះអង្គនឹងគង់នៅក្នុងសំណង់ព្រះវិហារដ៏អស្ចារ្យនោះ ដែលមានទន្លេហូរចេញមកនាំមកនូវជីវិតអស់កល្បដល់លោកីយ៍ (អេសេគាល ៤០-៤៨)។
ពួកអ៊ីស្រាអែលដឹងថា អ្វីដែលពួកគេកំពុងសាងសង់មិនមែនជាព្រះវិហារដែលហោរា អេសេគាល បានថ្លែងទំនាយទុកនោះទេ។ ពោលគឺមិនសូវដូចគ្នា។ ហើយការវិលត្រឡប់របស់ពួកគេពីចក្រភពបាប៊ីឡូនទៀតសោតក៏មិនមែនជាការវិលត្រឡប់ដ៏ធំសម្បើម ដែលហោរាបានថ្លែងទំនាយនោះដែរ។ ពួកគេមិនគ្រាន់តែត្រូវគិត អំពីទីក្រុងរបស់ពួកគេ និងការសាងសង់ព្រះវិហារឡើងប៉ុណ្ណោះឡើយ។ និយាយឲ្យខ្លី ហោរា អេសេគាល កំពុងថ្លែងទំនាយអំពីការមកដល់នៃនគរព្រះដែលប្រសើរលើសការយល់ដឹងរបស់គាត់។
ក្នុងកណ្ឌគម្ពីរវិវរណៈ លោក យ៉ូហាន បានពិពណ៌នាអំពីការបើកសម្ដែងឲ្យឃើញនគរស្ថានសួគ៌ ដែលផ្តល់ឲ្យនូវការយល់ដឹងបន្ថែមទៀត គឺការយល់ដឹងអំពីនគរព្រះ។ ផែនការរបស់ព្រះមិនបានរាប់បញ្ចូលតែពួកអ៊ីស្រាអែលផ្តាច់មុខនោះទេ តែក៏បានរាប់បញ្ចូលជាតិសាសន៍ជាច្រើនទៀត។ ព្រះអង្គបានប្ដេជ្ញាព្រះទ័យថា នឹងរំដោះមនុស្សឲ្យរួចពីផលវិបាកនៃអំពើបាប ហើយធ្វើឲ្យលោកីយ៍ទាំងមូលមានភាពថ្មីឡើង។ មនុស្សជាតិនឹងបានដឹងអំពីអត្ថន័យនៃការរស់នៅក្នុងព្រះវត្តមានព្រះអង្គជាប់ជានិច្ច ក្នុងទីក្រុងដែលមានឈ្មោះថា «ព្រះអម្ចាស់គង់នៅទីនោះ»។ ព្រះអង្គនឹងគង់នៅក្នុងចំណោមយើង ហើយជីវិតនឹងបង្ហូរចេញពីព្រះអង្គទៅដល់អ្នកជឿទាំងអស់ «យ៉ូហានខ្ញុំ ក៏ឃើញទីក្រុងដ៏បរិសុទ្ធ គឺជាក្រុងយេរូសាឡឹមថ្មី ចុះពីស្ថានសួគ៌មកអំពីព្រះ…ខ្ញុំមិនឃើញមានព្រះវិហារណានៅក្នុងក្រុងនោះទេ ដ្បិតព្រះអម្ចាស់ ជាព្រះដ៏មានព្រះចេស្ដាបំផុត ព្រមទាំងកូនចៀមដែរ ទ្រង់ជាព្រះវិហារនៃទីក្រុងនោះ ក្រុងនោះមិនត្រូវការនឹងព្រះអាទិត្យ ឬព្រះចន្ទសម្រាប់នឹងបំភ្លឺទេ ដ្បិតសិរីល្អនៃព្រះបានបំភ្លឺហើយ ឯកូនចៀមក៏ជាចង្កៀងនៃក្រុងនោះដែរ» (វិវរណៈ ២១:២, ២២-២៣)។
យើងក៏រស់នៅ ដោយមើលទៅពេលអនាគត ដូចពួកអ៊ីស្រាអែលនៅសម័យមុនផងដែរ។ គឺមើលទៅមុខ ដោយការរំពឹងគិតអំពីការយាងមកដល់របស់មហាក្សត្រ និងការសម្រេចនូវសេចក្តីសង្គ្រោះរបស់ព្រះអង្គ។ យើងនឹងបានចូលរួមជាមួយព្រះយេស៊ូវក្នុងនគរព្រះអង្គ និងបានដកពិសោធន៍ជាមួយនឹងក្តីអំណរដែលបានមកពីការនៅជាប់នឹងព្រះអង្គ។ ចូរកុំវីវក់នឹងការស្វែងរកទ្រព្យសម្បត្តិក្នុងជីវិតនេះ ឬមានភាពអស់សង្ឃឹម ដោយសារការខកចិត្តពីមួយពេលទៅមួយពេលនោះឡើយ។ យើងនឹងមានថ្ងៃល្អបំផុតក្នុងនគរព្រះ។
ព្រះគម្ពីរសញ្ជឹងគិត៖ អេសេគាល ៤៧:១-១២
គម្រោងអានព្រះគម្ពីររយៈពេល១ឆ្នាំ៖ សាស្ដា ១-៣ និងវិវរណៈ ១០