ព្រឹក
ការបញ្ចប់ដ៏ល្អ
ដោយJennifer Benson Schuldt
August 27, 2025
វិវរណៈ ២១:២-៥,៩-១១
យ៉ូហានខ្ញុំ ក៏ឃើញទីក្រុងដ៏បរិសុទ្ធ គឺជាក្រុងយេរូសាឡិមថ្មី ចុះពីស្ថានសួគ៌មកអំពីព្រះ តាក់តែងដូចជាប្រពន្ធថ្មោងថ្មីតែងខ្លួនទទួលប្ដី។ វិវរណៈ ២១:២
នៅពេលល្ងាច ដែលអាកាសធាតុក្តៅល្មម ខ្ញុំបានជួបជុំមិត្តភក្តិរបស់ខ្ញុំ ក្នុងតំបន់ប្រជុំជន ក្នុងទីក្រុង។ យើងមានចិត្តរំភើបរីករាយ ពេលដែលបានដឹងថា យើងបានញាំអាហារជុំគ្នា ក្នុងភោជនីយដ្ឋាន ដែលមានការប្រគំតន្ត្រីហ្សាស នៅខាងក្រៅ ប៉ុន្តែ នៅពេលដែលយើងទៅដល់ យើងមិនអាចរកបានតុទំនេរ សម្រាប់ចូលអង្គុយញាំអាហារទេ។ យើងក៏បានចាកចេញដោយការខកចិត្ត ហើយត្រូវដើរកាត់ប្លុកអាគារជាច្រើនប្លុក ដើម្បីស្វែងរកកន្លែងញាំអាហារ។
នៅលើផែនដីនេះ ការខកចិត្តអាចកើតមានគ្រប់ទំហំ គ្រប់រូបភាព។ ឧទាហរណ៍ សត្វចិញ្ចឹមជាទីស្រឡាញ់បានស្លាប់។ អាជីពរបស់យើងបានបញ្ចប់។ បញ្ហាសុខភាពបានកើតមានឡើង។ ឬយើងបាត់បង់ទំនាក់ទំនងជាមួយមនុស្សជាទីស្រឡាញ់។ នៅក្នុងពេលដ៏លំបាកដូចនេះ យើងអាចរកឃើញការកម្សាន្តចិត្តរបស់ព្រះអង្គ ប៉ុន្តែ រឿងនៃជីវិតរបស់យើងមិនតែងតែមានការបញ្ចប់ដ៏រីករាយ ដូចដែលយើងចង់បាននោះឡើយ។ ទោះជាយ៉ាងណាក៏ដោយ អ្នកជឿព្រះយេស៊ូវមានសង្ឃឹមថា យើងនឹងមានជីវិតអស់កល្បជានិច្ច ដែលមានពេញដោយអំណរ។
កណ្ឌគម្ពីរវិវរណៈបានចែងអំពីពេលដែលព្រះទ្រង់ប្រទានការបើកសម្ដែងដ៏អស្ចារ្យ ដល់សាវ័កយ៉ូហាន។ សាវ័កយ៉ូហានបានឃើញ “ក្រុងដ៏បរិសុទ្ធ គឺជាក្រុងយេរូសាឡិមថ្មី”(២១:២)។ ទីក្រុងនេះបានបង្ហាញចេញនូវសិរីល្អរបស់ព្រះ ដោយ “តាក់តែងដូចជាប្រពន្ធថ្មោងថ្មីតែងខ្លួនទទួលប្ដី”(ខ.២)។ ព្រះទ្រង់នឹងគង់នៅក្នុងទីក្រុងនេះ ជាមួយរាស្រ្តរបស់ព្រះអង្គទាំងអស់។ ក្នុងទីក្រុងរបស់ទ្រង់មិនមានឧក្រិដ្ឋកម្ម គ្មានភាពងងឹត និងគ្មានការភ័យខ្លាច(ខ.២៥-២៧)។ គឺមានតែពន្លឺ សុខសន្តិភាព និងសុច្ឆន្ទៈដ៏ពោរពេញ។
នៅថ្ងៃដែលខ្ញុំជួបជុំមិត្តភក្តិញាំអាហារពេលល្ងាច ក្រោយមក យើងក៏បានដើរត្រឡប់មកក្រោយវិញ កាត់ពីមុខភោជនីយដ្ឋានដែលយើងបានចូលពីដំបូងនោះ។ ពន្លឺភ្លើងពណ៌សបានបំភ្លឺផ្លូវដើរ ហើយយើងក៏បានឈប់ ដើម្បីស្តាប់តន្ត្រីដ៏ពីរោះ ខណៈពេលដែលយើងញាំការេមយ៉ាងឆ្ងាញ់ពិសារ។ ខ្ញុំបានកំណត់ចាំពេលដ៏រីករាយនេះ នៅក្នុងចិត្ត ប៉ុន្តែ យើងដឹងថា គ្មានក្តីអំណរណាមួយ នៅលើលោកិយនេះ ដែលអាចប្រៀបផ្ទឹមនឹងការបញ្ចប់ចុងក្រោយ ដែលអ្នកជឿទាំងអស់នឹងបានអរសប្បាយ ជារៀងរហូត។—Jennifer Benson Schuldt
តើអ្នកទន្ទឹងរង់ចាំអ្វីជាងគេ នៅក្នុងផ្ទៃមេឃ និងផែនដីថ្មី?
តើការសន្យាអំពីពេលអនាគត ដ៏រីករាយ បានលើកទឹកចិត្តអ្នកយ៉ាងណាខ្លះ?
ឱព្រះអម្ចាស់ សូមព្រះអង្គជួយទូលបង្គំ ឲ្យមើលឃើញការឈឺចាប់របស់ទូលបង្គំ
ដោយគិតដល់ក្តីអំណរដ៏អស់កល្បជានិច្ច ដោយដឹងថា ព្រះអង្គបានរៀបចំពេលអនាគតដែលប្រសើរជាង សម្រាប់ទូលបង្គំ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១២០-១២២ និង ១កូរិនថូស ៩
ប្រភេទ
ល្ងាច
ការស្វែងរកព្រះគុណ (សៀវភៅសេចក្ដីពិតសម្រាប់ជីវិត)
ដោយAlistair Begg
August 27, 2025
«ប៉ុន្តែ ណូអេបានប្រកបដោយព្រះគុណនៅចំពោះព្រះយេហូវ៉ាវិញ»(លោកុប្បត្ដិ ៦:៨)។
អ្នកជឿព្រះជាទូទៅបានចាត់ទុកលោកណូអេ ជាមនុស្សមានកម្លាំងខាងវិញ្ញាណដ៏អស្ចារ្យ និងជាវីរបុរសនៃសេចក្តីជំនឿ។ តាមពិត គាត់គ្រាន់តែជាមនុស្សសាមញ្ញប៉ុណ្ណោះ។ គាត់ធ្វើការងារប្រចាំថ្ងៃមានមុខរបរចិញ្ចឹមជីវិត និងគ្រួសារ គឺគាត់មិនខុសពីអ្នកដទៃទេ។
មុនពេលព្រះគម្ពីរប៊ីបពិពណ៌នាអំពីរឿងរបស់លោក ណូអេ មានសេចក្តីចែងថា «ព្រះយេហូវ៉ាទ្រង់ឃើញថា ការអាក្រក់របស់មនុស្សបានចម្រើនជាច្រើនឡើងនៅផែនដី ហើយអស់ទាំងគំនិតក្នុងចិត្តគេក៏សុទ្ធតែអាក្រក់ជានិច្ចដូច្នោះ នោះព្រះយេហូវ៉ាទ្រង់ស្តាយ ដោយបានបង្កើតមនុស្សមកនៅលើផែនដី ហើយទ្រង់មានព្រះហឫទ័យព្រួយ»(លោកុប្បត្ដិ ៦:៥-៦)។ ត្រង់ចំណុចនេះ ព្រះអង្គបានមានបន្ទូលអំពីមនុស្សទាំងអស់នៅផែនដី ដែលមានការអាក្រក់កើនឡើង ដោយរាប់បញ្ចូលទាំងលោកណូអេផងដែរ។
ព្រះអង្គមានបន្ទូលច្បាស់ថា មនុស្សទាំងអស់បានប្រព្រឹត្តអំពើបាប។ យើងសុទ្ធតែបានដាច់ចេញពីព្រះ ហើយត្រូវប្រឈមមុខដាក់ការជំនុំជម្រះ។ ព្រះគម្ពីរក៏បានប្រើពាក្យថា «ប៉ុន្តែ លោកណូអេ...»។ បានសេចក្តីថា ដោយសារព្រះគុណព្រះ ធាតុពិតនៃអំពើបាប និងការជំនុំជម្រះ តែងតែមានដំណោះស្រាយ ដោយព្រះអង្គប្រើពាក្យ «ប៉ុន្តែ»។ ព្រះអង្គបានប្រទានព្រះគុណដល់លោក ណូអេ ដោយមិនបានពន្យល់ ហើយគាត់ក៏មិនសមនឹងទទួលដែរ។ ការនេះបានញែកគាត់ឲ្យដាច់ពីមនុស្សជាតិទាំងមូល។ ព្រះអង្គបានជ្រើសរើសលោក ណូអេ និងក្រុមគ្រួសាររបស់គាត់ឲ្យធ្វើជាអ្នកទទួលព្រះគុណព្រះអង្គ ដោយបង្កើតទំនាក់ទំនងជាមួយគាត់ ដែលមិនធ្លាប់មានពីមុនមក។ ដោយសារព្រះគុណព្រះអង្គ លោក ណូអេ ក៏បានក្លាយជា «មនុស្សសុចរិត» ដែលបាន «ដើរជាមួយព្រះ»(លោកុប្បត្ដិ ៦:៩)។
លោក ណូអេ មិនអាចទាមទារអ្វីពីព្រះបានទេ។ ព្រះអង្គបានធ្វើអន្តរាគមន៍ក្នុងជីវិតលោក ណូអេ តែម្តង ដោយមិនបានបញ្ជាក់អំពីគុណធម៌របស់គាត់ ទោះកាលៈទេសៈមិនសមទំនងក៏ដោយ។ មនុស្សជាច្រើនយល់ឃើញថា ព្រះគម្ពីរសញ្ញាចាស់មិនបាននិយាយអំពីព្រះគុណព្រះទេ ពួកគេថា នៅសម័យនោះ គេនិយាយតែអំពីភ្លើងឆេះជាមួយស្ពាន់ធ័រ ក្រឹត្យវិន័យ និងការជំនុំជម្រះ ហើយទាល់តែដល់សម័យព្រះយេស៊ូវ ទើបព្រះអង្គចាប់ផ្តើមបង្ហាញព្រះគុណ។ ទោះជាយ៉ាងណាក៏ដោយ តាមពិតព្រះអង្គមិនគ្រាន់តែបានបង្ហាញព្រះគុណ មុនពេលព្រះអង្គបង្កើតរបស់សព្វសារពើ តែក៏បានបង្ហាញព្រះគុណនៅក្នុងការជំនុំជម្រះ ក្នុងប្រវត្តិសាស្ត្រ និងគ្រប់ទំព័រទាំងអស់ក្នុងព្រះគម្ពីរប៊ីប។
ហើយព្រះគុណរបស់ព្រះបានធ្វើការក្នុងព្រះគម្ពីរប៊ីបទាំងមូល។ លោក ណូអេ បានធ្វើទូក ដោយការស្តាប់បង្គាប់តាមព្រះបន្ទូលព្រះ នៅពេលដែលគាត់មិនអាចទុកចិត្តអ្វីផ្សេងក្រៅពីព្រះបន្ទូលព្រះ។ ពេលណាយើងដកពិសោធន៍ជាមួយព្រះគុណយ៉ាងពេញលេញ ព្រះគុណបន្ទាបខ្លួនយើងចុះ ហើយលើកតម្កើងព្រះ។ ព្រះគុណធ្វើឲ្យយើងដឹងថា ជីវិតយើងរស់នៅ គឺសម្រាប់ព្រះអង្គ និងសេចក្តីសប្បុរសរបស់ព្រះអង្គ ចំពោះយើង។ ព្រះគុណបណ្តាលចិត្តយើងឲ្យទុកចិត្តព្រះបន្ទូលព្រះអង្គ ហើយស្តាប់បង្គាប់ព្រះរាជបញ្ជារបស់ព្រះអង្គ។
សេចក្តីសប្បុរស និងសេចក្តីស្រឡាញ់ ដែលព្រះអង្គបានប្រទានមក មិនផ្អែកទៅលើការប្រព្រឹត្តរបស់យើងឡើយ ហើយបានធ្វើឲ្យយើងមានភាពខុសប្លែកពីវប្បធម៌ក្នុងលោកីយ៍ ក៏ដូចជាធ្វើឲ្យលោក ណូអេ មានលក្ខណៈពិសេសខុសពីមនុស្សក្នុងសម័យរបស់គាត់។ ហេតុនេះហើយ ចូរយើងប្រុងប្រយ័ត្ន ដើម្បីកុំឲ្យមានអំនួតខាងវិញ្ញាណ ក៏ដូចជាកុំឲ្យមានការបន្ថែមបន្ថយសេចក្តីពិតតាមលោកីយ៍នោះឡើយ។ គ្មានមនុស្សណាម្នាក់ដែលមានប្រាជ្ញាល្មមនឹងអាចយល់អំពីសេចក្តីសង្គ្រោះ ឬមានលក្ខណសម្បត្តិល្អគ្រប់គ្រាន់ល្មមនឹងអាចស្គាល់ក្តីអំណរនៃសេចក្តីសង្គ្រោះបានទេ។ យើងសុទ្ធតែមិនសមនឹងទទួលសេចក្តីសង្គ្រោះ ប៉ុន្តែព្រះអង្គបានប្រទានដំណោះស្រាយ។ ទាល់តែព្រះគុណរបស់ព្រះបានគ្រប់គ្រងចិត្តរបស់យើង ទើបយើងអាចដើរ ដូចលោក ណូអេ តាមផ្លូវរបស់ព្រះអាទិករ ជាជាងតាមផ្លូវរបស់លោកីយ៍ ហើយរស់នៅដោយការបន្ទាបខ្លួនស្តាប់បង្គាប់ និងមានក្តីសង្ឃឹមដែលមានទំនុកចិត្ត។ មានតែព្រះគុណទេ ដែលអាចធ្វើដូចនេះបាន។
ព្រះគម្ពីរសញ្ជឹងគិត៖ លោកុប្បត្ដិ ៦
គម្រោងអានព្រះគម្ពីររយៈពេល១ឆ្នាំ៖ ទំនុកតម្កើង ១២០-១២២ និង២កូរិនថូស ៦