និក្ខមនំ ៣៤:៤-១០
ទ្រង់យាងកាត់នៅមុខលោកទាំងប្រកាសថា យេហូវ៉ា គឺយេហូវ៉ាដ៏ជាព្រះទ្រង់មានព្រះហឫទ័យមេត្តាករុណា ហើយទន់សន្ដោស ទ្រង់យឺតនឹងខ្ញាល់ ហើយមានសេចក្ដីសប្បុរស នឹងសេចក្ដីទៀងត្រង់ ជាបរិបូរ។ និក្ខមនំ ៣៤:៦
ថ្ងៃមួយ ក្មេងប្រុសអាយុ៤ឆ្នាំម្នាក់ បានធ្វើឲ្យបែកក្រឡធ្វើពីលង្ហិន ដែលមានអាយុ៣៥០០ឆ្នាំ ដោយអចេតនា ក្នុងសារមន្ទីរមួយ នៅប្រទេសអ៊ីស្រាអែល។ ក្រោយមក គាត់ក៏បានទទួលការឆ្លើយតបដ៏សប្បុរស និងគួរឲ្យភ្ញាក់ផ្អើល។ បុគ្គលិករបស់សារមន្ទីរបានអត់ឱនទោសឲ្យគាត់ ហើយអញ្ជើញគាត់ឲ្យវិលត្រឡប់មកទស្សនានៅសារៈមន្ទីរនោះម្តងទៀត។ ជំនួសមុខឲ្យសារមន្ទីរហេច លោករ៉ូអ៊ី សាហ្វៀរ(Roee Shafir) បាននិយាយថា ការធ្វើដូចនេះបានលើកទឹកចិត្តមនុស្សនៅទូទាំងពិភពលោក ឲ្យមានចំណាប់អារម្មណ៍ចំពោះដំណើរការនៃការជួសជុលឡើងវិញ និងអាចបណ្តាលចិត្តក្មេងប្រុសនោះ ឲ្យមានចំណាប់អារម្មណ៍ ចំពោះប្រវត្តិសាស្រ្ត និងបុរាណវត្ថុវិទ្យា ជាដំណោះស្រាយវិជ្ជមាន ដែលនាំមកនូវការប្រោសឲ្យជា។ 
រឿងនេះបានធ្វើឲ្យខ្ញុំនឹកចាំ អំពីការប្រកាសរបស់ព្រះ អំពីការអត់ទោសបាប សម្រាប់រាស្រ្តអ៊ីស្រាអែល បន្ទាប់ពីពួកគេបះបោរទាស់នឹងព្រះអង្គ។ ពួកគេបានបះបោរទាស់នឹងព្រះអង្គ ដោយអង្វរលោកអើរ៉ុន ជាប្អូនប្រុសរបស់លោកម៉ូសេ ឲ្យធ្វើរូបកូនគោធ្វើពីមាស សម្រាប់ឲ្យពួកគេថ្វាយបង្គំ(និក្ខមនំ ៣២:‌១)។ កាលលោកម៉ូសេ “បានឃើញរូបកូនគោនោះ ហើយឃើញគេកំពុងតែលោតរាំលេង នោះម៉ូសេកើតមានសេចក្ដីកំហឹងខឹងក្ដៅជាខ្លាំង ក៏បោះបន្ទះថ្មទាំង២ចេញពីដៃបំបែកនៅជើងភ្នំទៅ”(ខ.១៩)។ 
តាមការបង្គាប់របស់ព្រះ “លោកក៏ដាប់បន្ទះថ្ម២ផ្ទាំង ឲ្យដូចជាថ្មទាំង២ពីមុននោះ រួចលោកក្រោកពីព្រលឹម ឡើងទៅលើភ្នំស៊ីណាយ”(៣៤:៤)។ នៅពេលដែលព្រះទ្រង់យាងចុះមក “ទ្រង់យាងកាត់នៅមុខលោកទាំងប្រកាសថា យេហូវ៉ា គឺយេហូវ៉ាដ៏ជាព្រះទ្រង់មានព្រះហឫទ័យមេត្តាករុណា ហើយទន់សន្ដោស ... ទ្រង់មានសេចក្ដីមេត្តាករុណាដល់មនុស្សទាំងពាន់ ក៏អត់ទោសចំពោះសេចក្ដីទុច្ចរិត សេចក្ដីរំលង នឹងអំពើបាប”(ខ.៦-៧)។
ការក្រើនរំឭកនេះពិតជាបានលើកទឹកចិត្តយើងខ្លាំងណាស់។ ទោះយើងមានបាបធ្ងន់យ៉ាងណា ក៏ព្រះអង្គនៅតែអត់ទោសឲ្យយើង ពេលណាយើងសូមព្រះអង្គអត់ទោសឲ្យយើង ហើយកែប្រែចិត្តចេញពីបាប។ ព្រះអង្គសព្វព្រះទ័យនឹងស្អាងយើងឡើងវិញ។—Patricia Raybon

តើអ្នកមានអំពើបាបណាខ្លះ ដែលព្រះទ្រង់បានអត់ទោសឲ្យ? 
ហេតុអ្វីការអត់ទោសរបស់ព្រះអង្គ គឺជាអំណោយនៃព្រះគុណដ៏អស្ចារ្យ? 
ឱព្រះអម្ចាស់ ពេលណាបាបរបស់ទូលបង្គំ ធ្វើឲ្យព្រះអង្គខ្ញាល់ ឬខកព្រះទ័យ 
សូមព្រះអង្គត្រាស់ហៅទូលបង្គំឲ្យវិលត្រឡប់មករកសេចក្តីអាណិត និងសេចក្តីស្រឡាញ់របស់ព្រះអង្គវិញ ដោយការអត់ទោស។
គម្រោងអានព្រះគម្ពីររយៈពេល១ឆ្នាំ : យេរេមា ៦-៨ និង ១ធីម៉ូថេ ៥