ព្រះបន្ទូលសន្យា និងព្រះពរ (សៀវភៅសេចក្ដីពិតសម្រាប់ជីវិត)
ដោយAlistair Begg
November 11, 2025
«អញនឹងបង្កើតនគរ១យ៉ាងធំពីឯង អញនឹងឲ្យពរដល់ឯង ទាំងលើកឈ្មោះឯងជាធំផង ឯងនឹងបានធ្វើជាទីបញ្ចេញពរដល់មនុស្សទាំងឡាយ។ អញនឹងឲ្យពរដល់អស់អ្នកណាដែលឲ្យពរដល់ឯង ហើយនឹងដាក់បណ្ដាសាដល់អស់អ្នកណាដែលផ្ដាសាឯង គ្រប់ទាំងគ្រួនៅផែនដីនឹងបានពរដោយសារឯង» (លោកុប្បត្ដិ ១២:១-៣)។
ក្មេងៗចូលចិត្តមករញ៉េរញ៉ៃក្នុងផ្ទះបាយ នៅពេលដែលម្តាយរបស់ពួកគេកំពុងធ្វើម្ហូប។ ជួនកាល ឪពុកម្តាយចង់តែស្រែកដាក់ពួកគេឲ្យពួកគេចេញក្រៅ។ នៅសម័យប៉មបាបិល មនុស្សជាតិមិនគ្រាន់តែបង្កភាពរញ៉េរញ៉ៃប៉ុណ្ណោះទេ តែពួកគេថែមទាំងបានបែរខ្នងដាក់ព្រះអម្ចាស់។ ពួកគេបានតាំងចិត្តថា នឹងបង្កើតនគររបស់ពួកគេបានជាពួកគេសង់ប៉មបាបិលឲ្យបានខ្ពស់ដល់ស្ថានសួគ៌ ដើម្បីឲ្យបានដឹងថា ពួកគេអាចធ្វើបានច្រើនប៉ុណ្ណាដោយពឹងអាងកម្លាំងខ្លួនឯង។ ដោយសារការបះបោរនេះ ព្រះអង្គក៏ជំនុំជម្រះពួកគេ ដោយបំបែកភាសារបស់ពួកគេ ហើយធ្វើឲ្យពួកគេបែកខ្ចាត់ខ្ចាយ ចេញទៅទូទាំងពិភពលោក (លោកុប្បត្ដិ ១១:១-៩)។
ដោយសារព្រះអង្គសុចរិតលើសឪពុកម្តាយដែលមានការធុញទ្រាន់នឹងកូន នោះព្រះអង្គអាចបណ្ដេញពួកគេឲ្យចេញពីព្រះភក្ត្រព្រះអង្គជារៀងរហូត តែព្រះអង្គមិនបានធ្វើដូចនេះទេ។
ដើម្បីបង្ហាញព្រះគុណរបស់ព្រះអង្គ នៅក្នុងជំនាន់បន្ទាប់ ព្រះទ្រង់បានចាប់ផ្ដើមជួសជុលអ្វីដែលបានបាក់បែក។ ព្រះអង្គបានមានបន្ទូលមកកាន់លោក អាប់រ៉ាម ជាចាស់ទុំដែលគ្មានកូន ឈ្មោះគាត់មានន័យថា «ឪពុកដែលបានតម្កើងឡើង» ហើយព្រះអង្គបានសន្យាថា នឹងដកផលវិបាកនៃការជំនុំជម្រះនៅប៉មបាបិល។ ប្រជាជននៅទីនោះ មានគោលបំណងលើកតម្កើងខ្លួនឯងឲ្យល្បីឈ្មោះ តែព្រះអង្គបានលើកតម្កើងឈ្មោះលោក អាប់រ៉ាម វិញ។ ពួកគេបានព្យាយាមកសាងនគររបស់ពួកគេ តែព្រះអង្គនឹងធ្វើឲ្យកូនចៅរបស់លោក អាប់រ៉ាម ក្លាយជាជាតិសាសន៍ដ៏ធំមួយ។ ពួកគេមានគម្រោងស្វែងរកព្រះពរក្នុងលោកីយ៍ ដោយមិនពឹងព្រះអង្គ។ តែព្រះអង្គនឹងប្រទានព្រះពរដល់លោកីយ៍ តាមរយៈគ្រួសាររបស់លោក អ័ប្រាហាំ។ ព្រះគុណរបស់ព្រះ នឹងដោះចំណងរបស់បាប ព្រមទាំងផលវិបាករបស់វាចេញ។
ក្នុងការតាំងសញ្ញានេះ ព្រះអង្គបានជ្រើសរើសលោក អាប់រ៉ាម ហើយបានប្ដូរឈ្មោះគាត់ទៅជាអ័ប្រាហាំ ដែលមានន័យថា «ឪពុកនៃមនុស្សជាច្រើន» ហើយទន្ទឹមនឹងនោះ ព្រះអង្គសន្យាថា ព្រះអង្គនឹងបន្តប្រទានព្រះគុណទៅដល់អ្នកបម្រើដែលព្រះអង្គបានជ្រើសរើសនេះ និងដល់មនុស្សជំនាន់ក្រោយ ដែលរស់នៅបែកខ្ញែក នៅទូទាំងពិភពលោក។
ការសន្យារបស់ព្រះអង្គចំពោះលោក អ័ប្រាហាំ គឺជាការបង្ហាញទុកជាមុនអំពីការសន្យានៃដំណឹងល្អ។ ព្រះអង្គបានសន្យាចំពោះលោក អ័ប្រាហាំ ហើយកូនចៅជំនាន់ក្រោយរបស់គាត់ក៏បានទទួលព្រះពរនោះ។ ទោះជាយ៉ាងណាក៏ដោយ ទីបំផុតពួកគេក៏បានដឹងថា ព្រះបន្ទូលសន្យា និងព្រះពរនោះ គឺសម្រាប់អ្នកជឿព្រះយេស៊ូវទាំងអស់ «ដ្បិតអ្នករាល់គ្នាសុទ្ធតែជាកូនព្រះ ដោយសារសេចក្ដីជំនឿជឿដល់ព្រះគ្រីស្ទយេស៊ូវ...ហើយបើអ្នករាល់គ្នាជារបស់ផងព្រះគ្រីស្ទ នោះក៏ពេញជាពូជរបស់លោក អ័ប្រាហាំ ហើយក៏ជាអ្នកគ្រងមរដកតាមសេចក្ដីសន្យាផង» (កាឡាទី ៣:២៦, ២៩)។ ដូចនេះ ព្រះបន្ទូលសន្យាដែលព្រះទ្រង់បានប្រទានលោក អ័ប្រាហាំ គឺបានសម្រេចនៅផ្នែកខ្លះក្នុងប្រជាជាតិអ៊ីស្រាអែលនៅគ្រាសញ្ញាចាស់ ប៉ុន្តែបានសម្រេចទាំងស្រុងក្នុងដំណឹងល្អនៃព្រះយេស៊ូវគ្រីស្ទ និងរាស្ត្ររបស់ព្រះអង្គ។ ចូរយើងមើលទៅវិសាលភាពនៃការសម្រេចនេះ នោះជីវិតយើងនឹងមានការផ្លាស់ប្ដូរជារៀងរហូត។ នៅថ្ងៃនេះ បើអ្នកនៅក្នុងព្រះគ្រីស្ទ នោះព្រះបន្ទូលសន្យាដែលព្រះទ្រង់មានចំពោះលោក អ័ប្រាហាំ ក៏មានឈ្មោះរបស់អ្នកផងដែរ។ អ្នកគឺជាពលរដ្ឋនៃស្ថានសួគ៌ ហើយបម្រើក្សត្រជាកូនចៅជំនាន់ក្រោយរបស់លោក អ័ប្រាហាំ មានព្រះនាមថា យេស៊ូវ។ ការអ្វីដែលទ្រង់បានចាប់ផ្ដើម នៅពេលដែលទ្រង់មានបន្ទូលមកលោក អ័ប្រាហាំ ក៏បានរាប់បញ្ចូលអ្នកផងដែរ ខណៈពេលដែលព្រះអង្គត្រាស់ហៅរាស្ត្រព្រះអង្គចូលនគររបស់ព្រះអង្គវិញ ដើម្បីមានអំណរជាមួយព្រះអង្គមុខទល់នឹងមុខជារៀងរហូត។ អត្តសញ្ញាណពិតរបស់អ្នកនៅថ្ងៃនេះគឺ ដោយសារជំនឿ អ្នកបានធ្វើជាកូនព្រះ ជាសមាជិកនៃកូនចៅរបស់លោក អ័ប្រាហាំ និងជាអ្នកស្នងមរតកនៃព្រះបន្ទូលសន្យាដ៏រុងរឿងទាំងនេះ។
ខគម្ពីរសញ្ជឹងគិត៖ លោកុប្បត្ដិ ១១:១-៩; ១២:១-៩
គម្រោងអានព្រះគម្ពីររយៈពេល១ឆ្នាំ៖ ១របាក្សត្រ ១-៣ និងយូដាស