មានចិត្តរឹង ដោយសារការបោកបញ្ឆោតរបស់បាប
ដោយAlistair Begg
February 3, 2026
«កាលស្ដេចហេរ៉ូឌបានឃើញព្រះយេស៊ូវ នោះក៏អរណាស់ ដ្បិតស្ដេចចង់ឃើញទ្រង់ជាយូរមកហើយ ព្រោះបានឮរឿងពីទ្រង់ជាច្រើន ហើយបានសង្ឃឹមថា នឹងឃើញទ្រង់ធ្វើទីសំគាល់ណាមួយ ។ នោះស្ដេចមានបន្ទូលសួរទ្រង់ជាច្រើន ប៉ុន្តែទ្រង់មិនព្រមឆ្លើយសោះ» ។ លូកា ២៣:៨-៩
នៅពេលដែលគេបញ្ជូនព្រះយេស៊ូវ ទៅដល់រាជវាំងរបស់ស្តេចហេរ៉ូឌ នៅថ្ងៃសុក្រដ៏ល្អទី១ ស្តេចអង្គនេះមានព្រះទ័យត្រេកអរណាស់ ព្រោះទ្រង់ចង់ឃើញព្រះអង្គធ្វើទីសម្គាល់ ។ ព្រះយេស៊ូវកំពុងបំពេញព្រះរាជកិច្ច ក្នុងទឹកដីដែលស្តេចហេរ៉ូឌកំពុងគ្រប់គ្រង ដូចនេះស្តេចហេរ៉ូឌប្រាកដជាបានទទួលដំណឹងជាប្រចាំ អំពីការអស្ចារ្យ ការបង្រៀន និងឥទ្ធិពលរបស់ព្រះយេស៊ូវ ។ ហេតុនេះហើយ បន្ទាប់ពីគេបានចាប់ព្រះកាយព្រះយេស៊ូវ ស្តេចហេរ៉ូឌក៏បាន «ចោទសួរព្រះអង្គជាច្រើន» ហើយក៏សង្ឃឹមថា «នឹងឃើញទ្រង់ធ្វើទីសំគាល់ណាមួយ» ។ ប៉ុន្តែ ព្រះយេស៊ូវមិនបានមានបន្ទូលអ្វីឡើយ ។ នៅពេលដែលស្តេចហេរ៉ូឌ បានត្រៀមជាស្រេចដើម្បីជួបព្រះយេស៊ូវ ជាព្រះរាជបុត្រានៃព្រះ ព្រះអង្គ«មិនព្រមឆ្លើយសោះ» ។
ហេតុអ្វីព្រះយេស៊ូវមិនឆ្លើយតប? តើព្រះអង្គកំពុងតែបោះបង់ឱកាសផ្សាយដំណឹងល្អហើយមែនទេ? ទេ ព្រះយេស៊ូវជ្រាបអំពីបំណងរបស់ស្តេចហេរ៉ូឌ និងសណ្ឋានពិតនៃព្រះទ័យរបស់ទ្រង់ ដែលមានការរឹងទទឹង និងមិនព្រមប្រែចិត្ត ។ ដូចនេះ ព្រះអង្គបានបើកឱកាសឲ្យស្តេចហេរ៉ូឌបង្ហាញធាតុពិតរបស់ទ្រង់ចេញមក ដោយខ្លួនឯង ។ ក្នុងរឿងនេះ ភាពស្ងាត់ស្ងៀមរបស់ព្រះអង្គ បានធ្វើឲ្យស្តេចអង្គនេះមានការក្រេវក្រោធយ៉ាងខ្លាំង បានជាទ្រង់ «ចំអកមើលងាយព្រះយេស៊ូវរួចហើយ នោះក៏យកអាវដ៏រុងរឿងមកបំពាក់ទ្រង់ រួចបញ្ជូនត្រឡប់ទៅឯលោក ពីឡាត់វិញ» (លូកា ២៣:១១) ។
ក្នុងព្រះជន្មរបស់ស្តេចហេរ៉ូឌ មានពេលមួយទ្រង់មិនមានព្រះទ័យរឹងទទឹង ដោយសារការបោកបញ្ឆោតរបស់បាប ។ នៅពេលដែលទ្រង់ស្តាប់លោក យ៉ូហាន បាទីស្ទ បង្រៀនព្រះបន្ទូល ទ្រង់ «មានព្រះទ័យរារែកជាខ្លាំង ប៉ុន្តែបានស្ដាប់លោកដោយអំណរ» (ម៉ាកុស ៦:២០) ។ ការបង្រៀនរបស់លោក យ៉ូហាន បានធ្វើការក្នុងព្រះទ័យស្តេចហេរ៉ូឌ ។ ប៉ុន្តែ នៅពេលដែលគាត់ចាប់ផ្តើមនិយាយអំពីអំពើបាបរបស់ទ្រង់ ដែលជាការផិតក្បត់ និងចិត្តដែលត្រេកត្រអាល ទ្រង់ក៏មិនចង់ស្តាប់គាត់ទៀតទេ (ម៉ាថាយ ១៤:៤-៥) ។
រឿងអ្វីដែលបានកើតឡើងចំពោះស្តេចហេរ៉ូឌ ក៏អាចកើតឡើងចំពោះយើងផងដែរ ។ ស្តេចហេរ៉ូឌបានជាប់អន្ទាក់នៃអំពើបាបរបស់ទ្រង់ ហើយនៅពេលដែលទ្រង់ប្រឈមមុខដាក់បញ្ហារបស់ទ្រង់ ទ្រង់បានបដិសេធមិនព្រមប្រែចិត្ត ។ ជាជាងឆ្លើយតប ដោយការបន្ទាបខ្លួនប្រែចិត្ត ទ្រង់ចង់បិទបាំងអំពើបាបរបស់ទ្រង់ រហូតដល់យូរៗទៅ ព្រះទ័យទ្រង់កាន់តែលែងចង់ឆ្លើយតប ចំពោះដំណឹងល្អ ។ ទីបំផុត ការដែលស្តេចហេរ៉ូឌបដិសេធមិនព្រមស្តាប់ការបង្រៀនរបស់លោក យ៉ូហាន ក៏បានបណ្តាលឲ្យទ្រង់មានព្រះទ័យរឹង ដែលគ្រាន់តែអាចចំអក និងប្រមាថមើលងាយអង្គបុគ្គល ដែលលោក យ៉ូហានបានលើកមកនិយាយ ។ គឺដូចដែលលោកគ្រូ ស៊ីនគ្លែ ហ្វឺគូសិន (Sinclair Ferguson) បានសរសេរថា «បើយើងមិនបង្ក្រាបបាបរបស់យើង ឲ្យស្ងាត់មាត់ទេ នោះវានឹងបង្ក្រាបសម្បជញ្ញៈរបស់យើងឲ្យស្ងាត់មាត់ ។ បើយើងមិនស្តាប់តាមព្រះបន្ទូលព្រះទេ ថ្ងៃមួយ យើងនឹងស្អប់ព្រះរាជបុត្រានៃព្រះ ហើយព្រះអង្គនឹងមិនមានអ្វីសម្រាប់មានបន្ទូលមកកាន់យើងទៀតទេ» ។12រឿងរបស់ស្តេចហេរ៉ូឌបានធ្វើការដាស់តឿនយើង គឺដូចដែលអ្នកនិពន្ធទំនុកសកលបានលើកឡើងថា :
ចូរកុំរង់ចាំដល់ថ្ងៃលិច ទាល់តែអ្នកមានវ័យចាស់ឡើយ
ចូរក្រោកឈរឡើង ហើយច្រៀងថ្វាយព្រះយេស៊ូវ នៅកន្លែងណា ដែលអ្នកទៅដល់ ។ 13
អំពើបាបតែងតែបោកបញ្ឆោត ហើយធ្វើឲ្យចិត្តយើងរឹងរូស (ហេព្រើរ ៣:១៣) ។ ដូចនេះ ចូរពិនិត្យមើលខ្លួនឯង ។ តើព្រះទ្រង់បានមានបន្ទូលយ៉ាងច្បាស់ អំពីផ្នែកណាខ្លះនៃជីវិតអ្នក តែអ្នកបានប្រឆាំង ជាជាងប្រែចិត្ត? ចូរកុំប្រឆាំងទៀតឡើយ ។ ចូរស្វែងរកការអត់ទោសបាប និងប្ដេជ្ញាចិត្តថា អ្នកនឹងកែប្រែ ហើយដឹងថា អ្នកមិនចាំបាច់ត្រូវខ្លាចព្រះគ្រីស្ទឈប់មានបន្ទូលមកកាន់អ្នកឡើយ ។
ខគម្ពីរជញ្ជឹងគិត៖ យ៉ាកុប ៤:៤-១០
គម្រោងអានព្រះគម្ពីររយៈពេល១ឆ្នាំ៖ អេសាយ ៣៤-៣៦ និង ម៉ាកុស ៩:១-២៩