ទំនុកដំកើង ១៣៩:៧-១២
ទោះបើទូលបង្គំនឹងឡើងទៅឯស្ថានសួគ៌ ក៏មានទ្រង់សណ្ឋិតនៅទីនោះ ទោះបើទូលបង្គំនឹងរៀបដំណេកនៅស្ថានឃុំព្រលឹងមនុស្សស្លាប់ នោះក៏ឃើញមានទ្រង់សណ្ឋិតនៅដែរ។ ទំនុកដំកើង ១៣៩:៨
កាលគេបានជូនដំណឹងដល់ជីដូនរបស់ខ្ញុំថា ជីតារបស់ខ្ញុំទំនងជាលាចាកលោក ក្នុងពេលពីរបីថ្ងៃទៀត យើងមានការព្រួយបារម្ភថា គាត់នឹងមានការពិបាកចិត្ត និងថប់បារម្ភ។ មានគេសួរគាត់ថា តើគាត់មានការព្រួយបារម្ភទេ? គេបានសួរដូចនេះ ដោយសារគេគិតថា គាត់ប្រហែលជាចង់ដឹងអំពីស្ថានភាពជំងឺរបស់ស្វាមីគាត់ ឬត្រូវការជំនួយសម្រាប់បំពេញតម្រូវការរបស់គាត់។ គាត់ក៏បានគិតមួយសន្ទុះ ហើយក៏បានឆ្លើយដោយចិត្តស្ងប់ថា “ទេ ខ្ញុំមិនព្រួយបារម្ភទេ។ ខ្ញុំដឹងថា គាត់នឹងទៅកន្លែងណា ពេលគាត់លាចាកលោក។ ព្រះទ្រង់នឹងគង់នៅទីនោះជាមួយគាត់”។ 
ការដែលគាត់បានរៀបរាប់ អំពីព្រះវត្តមានរបស់ព្រះ គង់នៅជាមួយស្វាមីរបស់គាត់ គឺបានធ្វើឲ្យខ្ញុំនឹកចាំ អំពីការពិពណ៌នាស្រដៀងនេះដែរ ក្នុងបទគម្ពីរទំនុកដំកើង ជំពូក ១៣៩ ដែលស្តេចដាវីឌបាននិពន្ធយ៉ាងដូចនេះថា “ទោះបើទូលបង្គំនឹងឡើងទៅឯស្ថានសួគ៌ ក៏មានទ្រង់សណ្ឋិតនៅទីនោះ ទោះបើទូលបង្គំនឹងរៀបដំណេកនៅស្ថានឃុំព្រលឹងមនុស្សស្លាប់ នោះក៏ឃើញមានទ្រង់សណ្ឋិតនៅដែរ” (ខ.៨)។ 
ភាពច្បាស់លាស់នៃព្រះវត្តមានរបស់ព្រះ ដែលបានពិពណ៌នា ក្នុងបទគម្ពីរទំនុកដំកើង ជំពូក១៣៩ បានដាស់តឿនយើងថា ទោះយើងទៅដល់ណាក៏ដោយ ក៏យើងមិនអាចគេចចេញពីព្រះវត្តមានរបស់ព្រះអង្គបានឡើយ តែក៏បាននាំមកនូវការកម្សាន្តចិត្តដ៏ប្រសើរ ដល់អ្នកដែលស្រឡាញ់ព្រះអង្គ ហើយចង់បានការធានាអំពីព្រះវត្តមានរបស់ព្រះអង្គ គឺដូចមានសេចក្តីចែងថា “តើទូលបង្គំនឹងទៅឯណា ឲ្យរួចពីព្រះវិញ្ញាណទ្រង់ តើនឹងរត់ទៅឯណា ឲ្យរួចពីព្រះភក្ត្រទ្រង់?” (ខ.៧)។ ក្នុងនាមយើងជារាស្រ្តដែលព្រះបានលោះ យើងអាចមានការកម្សាន្តចិត្តដោយដឹងថា ទោះយើងនៅទីណាក៏ដោយ ព្រះអង្គនឹងគង់នៅជាមួយ ដោយនាំផ្លូវ និងកាន់ដៃយើងជាប់ (ខ.១០)។
ពេលណាយើងឆ្លងកាត់ស្ថានភាពដ៏ពិបាក គួរឲ្យព្រួយបារម្ភ ហើយមិនមានអារម្មណ៍ថា ព្រះគង់នៅជាមួយយើង យើងអាចទុកចិត្តលើការធានាថា ព្រះអង្គតែងតែគង់នៅជាមួយអស់អ្នក ដែលព្រះអង្គស្រឡាញ់ និងអ្នកដែលស្រឡាញ់ព្រះអង្គ។ សូមឲ្យការយល់ដឹង អំពីព្រះវត្តមានដ៏ច្បាស់លាស់នេះ នាំមកនូវការកម្សាន្តចិត្ត និងក្តីសង្ឃឹមដែលអ្នកត្រូវការនៅថ្ងៃនេះ។—JASMINE GOH

តើមានអ្វីធ្វើឲ្យអ្នកព្រួយបារម្ភបំផុតនៅថ្ងៃនេះ? 
តើអ្នកមានការកម្សាន្តចិត្តយ៉ាងណា ពេលដែលបានដឹងច្បាស់ អំពីព្រះវត្តមានរបស់ព្រះអង្គ? 
ឱព្រះអម្ចាស់ ពេលណាទូលបង្គំមានការព្រួយបារម្ភ សូមព្រះអង្គជួយទូលបង្គំ 
ឲ្យដឹងថា ជីវិតទូលបង្គំស្ថិតក្នុងព្រះហស្តរបស់របស់ព្រះអង្គហើយ។ 
គម្រោងអានព្រះគម្ពីររយៈពេល១ឆ្នាំ : យ៉ូប ៤១-៤២ និង កិច្ចការ ១៦:២២-៤០