ព្រឹក
រកឃើញកំណប់ទ្រព្យ
ដោយBren thackett
August 19, 2025
វិវរណៈ ៤:១-៤,៦-១១
ឯព្រះអង្គដែលគង់នៅនោះ មើលទៅមានភាពដូចជាត្បូងមណីជោតិ នឹងត្បូងទទឹម ក៏មានឥន្ទធនូនៅព័ទ្ធជុំវិញបល្ល័ង្ក ដែលមើលទៅដូចជាត្បូងមរកត ។ វិវរណៈ ៤:៣
លោកគ្រីស្ទាន ស្ពេនស័រ(Christian Spencer) គឺជាអ្នកថតរូបអាជីពអូស្ត្រាលី ដែលបានចំណាយពេលជាង២០ឆ្នាំ ក្នុងការថតរូប ក្នុងឧទ្យានជាតិអីតាធីអៀ ក្នុងប្រទេសប្រេស៊ីល។ ជំនាញនៃការថតរូបរបស់គាត់ មានលក្ខណៈគួរឲ្យភ្ញាក់ផ្អើល នៅត្រង់ចំណុចដែលថា គាត់ថតរូបពន្លឺថ្ងៃ ចែងចាំងពីក្រោយស្លាបរបស់សត្វចាបហាំមីងបឺត ដែលកំពុងបើក។ គាត់បានរកឃើញថា ស្លាបរបស់ពួកវាបង្កើតពណ៌ដូចឥន្ទធនូ នៅពេលដែលពួកវាហើរ នៅចន្លោះពន្លឺថ្ងៃ និងលែនកាំមីរ៉ារបស់គាត់។ អ្នកថតរូបដទៃទៀតក៏បានថតយកពណ៌ឥន្ទធនូដែលចែងចាំងពីក្រោយសត្វបក្សីផ្សេងទៀតផងដែរ។
ការស្វែងរកពណ៌ឥន្ទធនូ នៅលើស្លាបបក្សី គឺជាគំរូនៃការស្វែងរកកំណប់ទ្រព្យ ដែលព្រះទ្រង់បានដាក់ក្នុងស្នាព្រះហស្តរបស់ព្រះអង្គ។ សម្រស់ដែលគួរឲ្យស្ញប់ស្ញែងនេះ អាចបណ្តាលចិត្តយើងឲ្យឆ្ងល់ថា អ្នកជឿព្រះយេស៊ូវនឹងមានអារម្មណ៍ដូចម្តេច នៅពេលដែលពួកគេបានឃើញព្រះអង្គគង់នៅលើបល្ល័ង្ក។ នៅពេលដែលសាវ័កយ៉ូហាន បានឃើញបល្ល័ង្កនៅស្ថានសួគ៌ ក្នុងបទគម្ពីរវិវរណៈ ជំពូក៤ គាត់ប្រាកដជាមានចិត្តស្ញប់ស្ញែងយ៉ាងខ្លាំង។ គាត់បានពិពណ៌នាថា ព្រះគ្រីស្ទបានគង់នៅលើបល្ល័ង្ក “មើលទៅមានភាពដូចជាត្បូងមណីជោតិ នឹងត្បូងទទឹម ក៏មានឥន្ទធនូនៅព័ទ្ធជុំវិញបល្ល័ង្ក ដែលមើលទៅដូចជាត្បូងមរកត”(ខ.៣)។ សិរីល្អរបស់ព្រះ ដែលបានបើកសម្ដែងដល់សាវ័កយ៉ូហាន គឺល្អលើសពាក្យដែលអាចពិពណ៌នាបាន។
នៅពេលណាយើងរកឃើញកំណប់ទ្រព្យ ក្នុងស្នាព្រះហស្តរបស់ព្រះ ចូរយើងមានចិត្តរីករាយឡើង ដោយដឹងថា នឹងមានអ្វីៗជាច្រើនទៀត កំពុងរង់ចាំយើង ក្នុងនគរស្ថានសួគ៌។ នៅទីនោះ យើងនឹងបានថ្វាយបង្គំព្រះអាទិកររបស់យើង និងសរសើរតម្កើងព្រះអង្គជារៀងរហូតថា “ទ្រង់គួរនឹងទទួលសិរីល្អ កិត្តិនាម នឹងព្រះចេស្ដា ដ្បិតទ្រង់បានបង្កើតរបស់សព្វសារពើមក ហើយគឺដោយបំណងព្រះហឫទ័យទ្រង់ហើយ ដែលរបស់ទាំងនោះបានកើតមក ហើយមាននៅផង”(ខ.១១)។—Brent Hackett
តើអ្នករកឃើញកំណប់ទ្រព្យអ្វីផ្សេងទៀត ក្នុងស្នាព្រះហស្តរបស់ព្រះ?
តើអ្នកអាចប្រើស្នាព្រះហស្តរបស់ព្រះអង្គ ដើម្បីចង្អុលបង្ហាញអ្នកដទៃ ឲ្យងាកទៅរកព្រះគ្រីស្ទ ដូចម្តេចខ្លះ?
ឱព្រះអម្ចាស់ ទូលបង្គំសូមអរព្រះគុណព្រះអង្គ ដែលបានដាក់គ្រាប់ពេជ្របង្កប់
ក្នុងស្នាព្រះហស្តព្រះអង្គ ដែលចង្អុលបង្ហាញឲ្យគេងាកទៅរកព្រះចេស្តារបស់ព្រះអង្គ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១០៣-១០៤ និង ១កូរិនថូស ២
ប្រភេទ
ល្ងាច
ក្សត្រពិតប្រាកដ (សៀវភៅសេចក្ដីពិតសម្រាប់ជីវិត)
ដោយAlistair Begg
August 19, 2025
«ពែងនេះជាសញ្ញាថ្មី ដែលតាំងដោយនូវឈាមខ្ញុំ គឺជាឈាម ដែលត្រូវច្រួចចេញសំរាប់អ្នករាល់គ្នា» (លូកា ២២:២០)។
ព្រះយេស៊ូវបានសម្រេចព្រះបន្ទូលសន្យារបស់ព្រះ ហើយបានប្រទានពរនីមួយៗ តាមព្រះបន្ទូលសន្យានោះ។ ព្រះអង្គបានប្រទានសេចក្តីសញ្ញាថ្មី ហើយទទួលយកតួនាទីរបស់ព្រះអង្គ ដែលគេបានរំពឹងជាយូរមកហើយ គឺតួនាទីជាក្សត្រដ៏ពិត។ ព្រះពរទាំងអស់ហូរចេញពីព្រះយេស៊ូវ។ ព្រះបន្ទូលសន្យានីមួយៗក៏សម្រេច តាមរយៈព្រះអង្គ។ សិរីល្អទាំងអស់សម្រាប់ថ្វាយដល់ព្រះអង្គ។
គ្រីស្ទបរិស័ទទទួលស្គាល់សេចក្តីពិតទាំងនេះក្នុងពិធីលៀងព្រះអម្ចាស់ នៅពេលដែលយើងទទួលពែងទឹកទំពាំងបាយជូរ ដោយនឹកចាំអំពីព្រះលោហិតរបស់ព្រះយេស៊ូវដែលបានហូរ ជាឈាមនៃសេចក្តីសញ្ញាថ្មី ដើម្បីអត់ទោសបាបឲ្យយើង។ ព្រះយេស៊ូវបានសុគតនៅលើឈើឆ្កាង ដោយទទួលទោសដែលយើងសមនឹងទទួល ដើម្បីឲ្យយើងជាមនុស្សមានបាប ដែលមិនសមនឹងទទួលសេចក្តីមេត្តា និងព្រះគុណព្រះអង្គ អាចអរសប្បាយនឹងព្រះពរនៃការអត់ទោសបាប។ បានសេចក្តីថា ពេលណាយើងទទួលជឿព្រះយេស៊ូវ យើងអាចប្រាកដថា ព្រះអង្គបានទទួលបាប និងទោសរបស់បាប ហើយប្រទានសេចក្តីសុចរិតមកយើងវិញ។ ព្រះយេស៊ូវទទួលយកសេចក្តីស្លាប់ ដែលយើងសមនឹងទទួល។ ព្រះអង្គបានរស់នៅក្នុងជីវិតល្អឥតខ្ចោះ ដែលយើងមិនអាចរស់នៅដូចព្រះអង្គបាន។ ព្រះអង្គបានដណ្តប់ខ្លួនយើង ដោយភួយនៃការអត់ទោសបាប តាមរយៈការប្រទានព្រះរាជបុត្រារបស់ព្រះអង្គ។ យើងគួរតែមានចិត្តស្ញប់ស្ញែងជានិច្ចដោយចាំថា សេចក្តីទាំងនេះគឺជាសេចក្តីពិត សម្រាប់យើង ដោយសារសេចក្តីជំនឿ។
ហោរានៅគ្រាសញ្ញាចាស់បានថ្លែងទំនាយយ៉ាងច្បាស់ថា នឹងមានក្សត្រមួយអង្គជាកូនចៅជំនាន់ក្រោយរបស់ស្តេច ដាវីឌ ដែលនឹងសម្រេចព្រះបន្ទូលសន្យារបស់ព្រះ។ ព្រះអង្គនឹងដាក់ការគ្រប់គ្រងរបស់ព្រះនៅលើផែនដីនាំមកនូវយុគសម័យថ្មី ហើយលុបបំបាត់ផលវិបាករបស់សេចក្តីអាក្រក់។ គេប្រហែលមិនឃើញព្រះយេស៊ូវមានលក្ខណៈជាក្សត្រ កាលព្រះអង្គកំពុងជាប់នៅលើឈើឆ្កាងទេ តែពេលដែលព្រះអង្គសុគត គឺជាពេលនៃជ័យជម្នះដ៏អស្ចារ្យ។ ហើយកាលព្រះអង្គយាងចេញពីផ្នូរ ការមានព្រះជន្មឡើងវិញរបស់ព្រះអង្គ គឺជាការប្រកាសថា ព្រះអង្គមិនគ្រាន់តែជាបុត្រារបស់ស្តេច ដាវីឌ ប៉ុណ្ណោះទេ តែក៏ជាព្រះរាជបុត្រានៃព្រះ ដែលបានឈ្នះសេចក្តីស្លាប់។
គ្រប់ទាំងអំណាច គឺជាកម្មសិទ្ធិរបស់ព្រះអង្គ ហើយព្រះគុណ និងសេចក្តីមេត្តាបានហូរចេញពីព្រះអង្គជារៀងរហូត។ មានតែព្រះដែលជាប្រភពនៃអំណាចដូចនេះទេ ដែលអាចកែប្រែចិត្ត និងស័ក្ដិសមឲ្យវិញ្ញាណយើងគោរពស្រឡាញ់។
សព្វថ្ងៃនេះ ព្រះយេស៊ូវកំពុងដឹកនាំ និងគ្រងរាជ្យនៅខាងស្តាំព្រះហស្តព្រះវរបិតា ប៉ុន្តែព្រះអង្គក៏គ្រងរាជ្យលើចិត្តរបស់អ្នកដែលទទួលជឿព្រះអង្គផងដែរ។ ថ្ងៃនេះជាថ្ងៃល្អបំផុត សម្រាប់ឲ្យមនុស្សលះបង់ការបះបោរ ដោយបន្ទាបខ្លួនក្រាបចុះនៅចំពោះមុខក្សត្រដ៏ស័ក្ដិសម ដោយទទួលជឿព្រះអង្គធ្វើជាព្រះអង្គសង្គ្រោះ ដែលពួកគេត្រូវការលើសអ្វីទាំងអស់ ហើយទូលសូមព្រះអង្គគ្រងរាជ្យនៅលើជីវិតរបស់ពួកគេ។ តើព្រះគ្រីស្ទបានគ្រងរាជ្យជាក្សត្ររបស់អ្នកដែរឬទេ? បើដូច្នោះមែន ក្នុងនាមជារាស្រ្តព្រះអង្គ ចូរថ្វាយបង្គំនិងសរសើរតម្កើងព្រះអង្គចុះ ហើយក្នុងនាមជាទូតរបស់ព្រះអង្គ ហើយចូរចេញទៅ ហើយនាំអ្នកដទៃឲ្យស្គាល់ក្តីសង្ឃឹមដែលអ្នកបានរកឃើញក្នុងព្រះអង្គចុះ។
ព្រះគម្ពីរសញ្ជឹងគិត៖ ១កូរិនថូស ១៥:១២-២៨
គម្រោងអានព្រះគម្ពីររយៈពេល១ឆ្នាំ៖ ទំនុកតម្កើង ១០៣-១០៤ និងកាឡាទី ៤