កិច្ចការ ៤:៣២-៣៧
ឯមនុស្សទាំងហ្វូងដែលបានជឿ គេក៏មានចិត្តមានគំនិតតែ១ គ្មានអ្នកណាប្រកាន់ថា អ្វី‍ៗដែលខ្លួនមានជារបស់ផងខ្លួននោះទេ គឺគ្រប់របស់ទាំងប៉ុន្មាន ជារបស់សំរាប់ប្រើជាមួយគ្នាទាំងអស់។ កិច្ចការ ៤:៣២
អ្នកស្រីលីសា(Lisa) និងលោកហ្វ្រេឌី មែកមីលិន(Freddie McMillan) មានភោជនីយដ្ឋានមានលក្ខណៈខុសគេ ក្នុងទីក្រុងប្រ៊ូតុន រដ្ឋអាឡាបាម៉ា។ ពួកគេបានចែកអាហារក្តៅៗ ដោយមិនគិតថ្លៃ ដល់អ្នកដែលឈរតម្រង់ជួរ។ ប្តីប្រពន្ធមួយគូរនេះបានចំណាយប្រាក់សន្សំរបស់ខ្លួន ដើម្បីនាំមកនូវការផ្លាស់ប្តូរ សម្រាប់ជនចាស់ជរា ដែលច្រើនតែមិនមានអាហារបរិភោគ និងកម្រមានឱកាសបានញាំអាហារនៅភោជនីយដ្ឋាន។ ពួកគេក៏មានប្រអប់សម្រាប់ទទួលប្រាក់ឧបត្ថម្ភផងដែរ។ អ្នកស្រីលីសាបាននិយាយថា “ជួនកាល យើងមិនបានទទួលប្រាក់សូម្បីតែមួយសេន ក្នុងប្រអប់នោះ។ ជួនកាល យើងទទួលបានលិខិតថ្លែងអំណរគុណ។ ជួនកាល យើងឃើញលុយ១ពាន់ដុល្លា។ យើងតែងតែមានអ្វីៗដែលយើងត្រូវការ។ គោលដៅរបស់យើង គឺដើម្បីចែកអាហារដល់មនុស្សទុរគត ស្តារភាពថ្លៃថ្នូរឡើងវិញ និងអភិវឌ្ឍន៍សហគមន៍”។ 
ការយកអសារជនទុរគត អាចមានការពិបាកខ្លាំង បើសិនជាយើងមិនពឹងផ្អែកទៅលើព្រះអម្ចាស់ទេនោះ! កណ្ឌគម្ពីរដំណឹងល្អក៏បានចែង អំពីពេលដែលព្រះយេស៊ូវប្រទានអាហារដល់មនុស្សរាប់ពាន់នាក់ ដោយឲ្យពួកសាវ័ករបស់ទ្រង់ចូលរួមជាមួយព្រះអង្គ ដោយបង្គាប់ពួកគេថា “ចូរអ្នករាល់គ្នាឲ្យគេបរិភោគទៅ”(ម៉ាថាយ ១៤:‌១៦)។ ក្នុងកណ្ឌគម្ពីរកិច្ចការ យើងឃើញថា ក្នុងពួកជំនុំដំបូង អ្នកជឿបានចែករំលែកទ្រព្យសម្បត្តិដែលពួកគេមាន បានជាពួកគេមិនខ្វះខាតអ្វីសោះ(៤:៣២,៣៤)។ ពួកគេជាច្រើនបានលក់ផ្ទះ លក់ដី ហើយប្រគល់ប្រាក់ដែលលក់បាន ឲ្យទៅពួកសាវ័ក ហើយពួកសាវ័កក៏បានចែកដល់គ្រប់គ្នាតាមត្រូវការ។ ដោយយល់ឃើញថា ទ្រព្យសម្បត្តិរបស់ពួកគេគឺជាកម្មសិទ្ធិរបស់ព្រះ ពួកគេក៏បានស្ម័គ្រចិត្តចែករំលែកអ្វីដែលខ្លួនមាន ជាប្រយោជន៍ដល់ការរស់នៅរបស់អ្នកដទៃ។
ព្រះទ្រង់ផ្គត់ផ្គង់យើង ជួនកាល ដោយព្រះហស្តទ្រង់ផ្ទាល់ ហើយជួនកាល តាមរយៈដៃរបស់រាស្រ្តព្រះអង្គ។ ព្រះអង្គបំពេញតម្រូវការរបស់យើង ដើម្បីឲ្យយើងអាចបំពេញតម្រូវការរបស់អ្នកដទៃ។—Elisa Morgan

តើព្រះអម្ចាស់បានផ្គត់ផ្គង់អ្នកដូចម្តេចខ្លះ? តើអ្នកអាចចូលរួមជាមួយព្រះអង្គ 
ក្នុងការផ្គត់ផ្គង់មនុស្សនៅជុំវិញអ្នកដូចម្តេចខ្លះ? 
ឱព្រះអម្ចាស់ ទូលបង្គំសូមអរព្រះគុណព្រះអង្គ សម្រាប់ការបំពេញតម្រូវការជាបរិបូរ ក្នុងជីវិតទូលបង្គំ! 
សូមព្រះអង្គជួយទូលបង្គំឲ្យចែករំលែកដល់អ្នកដទៃ ដោយប្រើអ្វីដែលព្រះអង្គបានប្រទានមកទូលបង្គំ។
គម្រោងអានព្រះគម្ពីររយៈពេល១ឆ្នាំ : ទំនុកដំកើង ១០៧-១០៩ និង ១កូរិនថូស ៤